برس رہی تھی بارش باہر

اور وہ بھیگ رہا تھا مجھ میں

کوئی مجھ کو ڈھونڈھنے والا

بھول گیا ہے رستہ مجھ میں

یوں تجھے دیکھ کے چونک اٹھتی ہیں سوئی یادیں

جیسے سناٹے میں آواز لگا دے کوئی

بکھرتا جاتا ہے کمرے میں سگرٹوں کا دھواں

پڑا ہے خواب کوئی چائے کی پیالی میں

بچے نے تتلی پکڑ کر چھوڑ دی

آج مجھ کو بھی خدا اچھا لگا

بس ہم دونوں زندہ ہیں

باقی دنیا فانی ہے

نیا لباس پہن کر بھی

دنیا وہی پرانی ہے

چلتے چلتے میں اس کو گھر لے آیا

وہ بھی اپنا ہاتھ چھڑانا بھول گیا

خواب کیا تھا جو مرے سر میں رہا

رات بھر اک شور سا گھر میں رہا

پتھر ہوتا جاتا ہوں

ہنسنے دو یا رونے دو

جب وہ ساتھ ہوتا ہے

ہم اکیلے ہوتے ہیں

میں اسے کیسے جیت سکتا ہوں

وہ مجھے اپنا جسم ہارتی ہے

اب کے بار میں تجھ سے ملنے نہیں آیا

تجھ کو اپنے ساتھ لے جانے آیا ہوں

اس نے خط میں بھیجے ہیں

بھیگی رات اور بھیگا دن

بکھر کے جاتا کہاں تک کہ میں تو خوشبو تھا

ہوا چلی تھی مجھے اپنے ہم رکاب لیے

ابھر رہے ہیں کئی ہاتھ شب کے پردے سے

کوئی ستارہ لیے کوئی ماہتاب لیے

رنگ لائی ہے حسرت تعمیر

گر رہی ہیں عمارتیں کیا کیا

کبھی کرنا ہو اندازہ جب اپنے درد کا مجھ کو

میں اس بے درد کے دل کو دکھا کر دیکھا لیتا ہوں