maiñ lauTne ke irāde se jā rahā huuñ magar

safar safar hai mirā intizār mat karnā

main lauTne ke irade se ja raha hun magar

safar safar hai mera intizar mat karna

tumhārī yaad sukūñ kā sabab to hai lekin

tumhārī yaad se tanhā.ī kam nahīñ hotī

tumhaari yaad sukun ka sabab to hai lekin

tumhaari yaad se tanhai kam nahin hoti

muflisī meñ kyā manā.ī jaa.eñ ḳhushiyāñ 'iid kī

dil meñ nashtar ban ke chubhtī haiñ sivayyāñ 'iid kī

muflisi mein kya manai jaen KHushiyan 'id ki

dil mein nashtar ban ke chubhti hain siwayyan 'id ki

bachchoñ kī zid vāpas laa.ī hañsne-hañsāne vāloñ meñ

barsoñ baa'd hue ham shāmil 'iid manāne vāloñ meñ

bachchon ki zid wapas lai hansne-hansane walon mein

barson ba'd hue hum shamil 'id manane walon mein

nayā chehra nayā lahja nayā mazmūn dete haiñ

ġhazal kahte haiñ ham jab bhī ġhazal ko ḳhuun dete haiñ

naya chehra naya lahja naya mazmun dete hain

ghazal kahte hain hum jab bhi ghazal ko KHun dete hain

maiñ aise shahr ke bāzār meñ sajā ki jahāñ

mujhe ḳharīdne vāloñ kī jeb ḳhālī hai

main aise shahr ke bazar mein saja ki jahan

mujhe KHaridne walon ki jeb KHali hai

rafta rafta vaqt-e-anjām-e-safar aa jā.egā

rāste jab ḳhatm ho jā.eñge ghar aa jā.egā

rafta rafta waqt-e-anjam-e-safar aa jaega

raste jab KHatm ho jaenge ghar aa jaega

zindagī se guftugū ke rābte kaT jā.eñge

itnā mat chillāo varna phephḌe phaT jā.eñge

zindagi se guftugu ke rabte kaT jaenge

itna mat chillao warna phephDe phaT jaenge

merā hamdard agar hai to 'adū kis kā hai

kuchh pata to chale kis rang meñ tū kis kā hai

mera hamdard agar hai to 'adu kis ka hai

kuchh pata to chale kis rang mein tu kis ka hai

zindagī ke mausamoñ kī barq-raftārī to dekh

uḌ rahe haiñ 'umr ke din raat pattoñ kī tarah

zindagi ke mausamon ki barq-raftari to dekh

uD rahe hain 'umr ke din raat patton ki tarah

apne vatan kī chhoḌ ke miTTī nahīñ ga.e

achchhe vahī rahe jo karāchi nahīñ ga.e

apne watan ki chhoD ke miTTi nahin gae

achchhe wahi rahe jo karachi nahin gae