کی تلاش کا نتیجه | موضو - نظم, صفحہ saazish

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "saazish"

نظم کے متعلقہ نتیجہ "saazish"

نظم

جذبوں کے بیری وقت کی سازش نہ ہو کوئی
تمہارے اس طرح ہر لمحہ یاد آنے سے

جون ایلیا

نظم

سو سال سے جو تربت چادر کو ترستی تھی
اب اس پہ عقیدت کے پھولوں کی نمائش ہے
اردو کے تعلق سے کچھ بھید نہیں کھلتا
یہ جشن یہ ہنگامہ خدمت ہے کہ سازش ہے

ساحر لدھیانوی

نظم

رخصت ہوا وہ باپ سے لے کر خدا کا نام
راہ وفا کی منزل اول ہوئی تمام
منظور تھا جو ماں کی زیارت کا انتظام
دامن سے اشک پونچھ کے دل سے کیا کلام
اظہار بے کسی سے ستم ہوگا اور بھی
دیکھا ہمیں اداس تو غم ہوگا اور بھی
دل کو سنبھالتا ہوا آخر وہ نونہال
خاموش ماں کے پاس گیا صورت خیال
دیکھا تو ایک در میں ہے بیٹھی وہ خستہ حال
سکتا سا ہو گیا ہے یہ ہے شدت ملال
تن میں لہو کا نام نہیں زرد رنگ ہے
گویا بشر نہیں کوئی تصویر سنگ ہے
کیا جانے کس خیال میں گم تھی وہ بے گناہ
نور نظر یہ دیدۂ حسرت سے کی نگاہ
جنبش ہوئی لبوں کو بھری ایک سرد آہ
لی گوشہ ہائے چشم سے اشکوں نے رخ کی راہ
چہرہ کا رنگ حالت دل کھولنے لگا
ہر موئے تن زباں کی طرح بولنے لگا
آخر اسیر یاس کا قفل دہن کھلا
افسانۂ شدائد رنج و محن کھلا
اک دفتر مظالم چرخ کہن کھلا
وا تھا دہان زخم کہ باب سخن کھلا
درد دل غریب جو صرف بیاں ہوا
خون جگر کا رنگ سخن سے عیاں ہوا
رو کر کہا خموش کھڑے کیوں ہو میری جاں
میں جانتی ہوں جس لیے آئے ہو تم یہاں
سب کی خوشی یہی ہے تو صحرا کو ہو رواں
لیکن میں اپنے منہ سے نہ ہرگز کہوں گی ہاں
کس طرح بن میں آنکھوں کے تارے کو بھیج دوں
جوگی بنا کے راج دلارے کو بھیج دوں
دنیا کا ہو گیا ہے یہ کیسا لہو سپید
اندھا کیے ہوئے ہے زر و مال کی امید
انجام کیا ہو کوئی نہیں جانتا یہ بھید
سوچے بشر تو جسم ہو لرزاں مثال بید
لکھی ہے کیا حیات ابد ان کے واسطے
پھیلا رہے ہیں جال یہ کس دن کے واسطے
لیتی کسی فقیر کے گھر میں اگر جنم
ہوتے نہ میری جان کو سامان یہ بہم
ڈستا نہ سانپ بن کے مجھے شوکت و حشم
تم میرے لال تھے مجھے کس سلطنت سے کم
میں خوش ہوں پھونک دے کوئی اس تخت و تاج کو
تم ہی نہیں تو آگ لگا دوں گی راج کو
کن کن ریاضتوں سے گزارے ہیں ماہ و سال
دیکھی تمہاری شکل جب اے میرے نونہال
پورا ہوا جو بیاہ کا ارمان تھا کمال
آفت یہ آئی مجھ پہ ہوئے جب سفید بال
چھٹتی ہوں ان سے جوگ لیا جن کے واسطے
کیا سب کیا تھا میں نے اسی دن کے واسطے
ایسے بھی نامراد بہت آئیں گے نظر
گھر جن کے بے چراغ رہے آہ عمر بھر
رہتا مرا بھی نخل تمنا جو بے ثمر
یہ جائے صبر تھی کہ دعا میں نہیں اثر
لیکن یہاں تو بن کے مقدر بگڑ گیا
پھل پھول لا کے باغ تمنا اجڑ گیا
سرزد ہوئے تھے مجھ سے خدا جانے کیا گناہ
منجدھار میں جو یوں مری کشتی ہوئی تباہ
آتی نظر نہیں کوئی امن و اماں کی راہ
اب یاں سے کوچ ہو تو عدم میں ملے پناہ
تقصیر میری خالق عالم بہل کرے
آسان مجھ غریب کی مشکل اجل کرے
سن کر زباں سے ماں کی یہ فریاد درد خیز
اس خستہ جاں کے دل پہ چلی غم کی تیغ تیز
عالم یہ تھا قریب کہ آنکھیں ہوں اشک ریز
لیکن ہزار ضبط سے رونے سے کی گریز
سوچا یہی کہ جان سے بیکس گزر نہ جائے
ناشاد ہم کو دیکھ کے ماں اور مر نہ جائے
پھر عرض کی یہ مادر ناشاد کے حضور
مایوس کیوں ہیں آپ الم کا ہے کیوں وفور
صدمہ یہ شاق عالم پیری میں ہے ضرور
لیکن نہ دل سے کیجیے صبر و قرار دور
شاید خزاں سے شکل عیاں ہو بہار کی
کچھ مصلحت اسی میں ہو پروردگار کی
یہ جعل یہ فریب یہ سازش یہ شور و شر
ہونا جو ہے سب اس کے بہانے ہیں سر بسر
اسباب ظاہری میں نہ ان پر کرو نظر
کیا جانے کیا ہے پردۂ قدرت میں جلوہ گر
خاص اس کی مصلحت کوئی پہچانتا نہیں
منظور کیا اسے ہے کوئی جانتا نہیں
راحت ہو یا کہ رنج خوشی ہو کہ انتشار
واجب ہر ایک رنگ میں ہے شکر کرد گار
تم ہی نہیں ہو کشتہ نیرنگ روزگار
ماتم کدے میں دہر کے لاکھوں ہیں سوگوار
سختی سہی نہیں کہ اٹھائی کڑی نہیں
دنیا میں کیا کسی پہ مصیبت پڑی نہیں

چکبست برج نرائن

نظم

لمبے وقت سے سوچ رہا ہوں
جانے کیوں ایسا ہوں میں
ملنے سے گھبراتا ہوں میں جھوٹ نہیں کہہ پاتا ہوں
اس کے شکوے اس کی شکایت جھگڑے سے ڈر جاتا ہوں
ادھر ادھر کی باتیں مجھ کو ذرا نہ خوش کر پاتی ہیں
جانے کیوں ایسا ہوں میں
دوست نہیں بن پاتے میرے
رشتے نہیں سنبھلتے ہیں
بے جا محبت بے جا تکلف
دونوں اوچھے لگتے ہیں
اوروں کی کمیوں کو بالکل
اچھا نہیں کہہ پاتا ہوں
جانے کیوں ایسا ہوں میں
اچھے بھلے کاموں میں اکثر
دیر بہت کر دیتا ہوں
امی سے باتیں کرنی ہوں بیٹی کے اسکول ہو جانا
کوئی نیا ناول پڑھنا ہو کوئی کہانی لکھنی ہو
سب کو ٹالتا رہتا ہوں
جانے کیوں ایسا ہوں میں
بھیڑ بھرے شہروں سے مجھ کو
وحشت سی ہو جاتی ہے
گاؤں جنگل سنسان جگہیں
اکثر خوش آ جاتی ہیں
کوئی الھڑ چہرہ دیکھوں من کو وہ بھا جاتا ہے
جانے کیوں ایسا ہوں میں
پیڑوں کے پیراہن دیکھوں پھولوں کی خوشبو کو سونگھوں
رنگ برنگی تتلیاں پکڑوں ہلکی ہلکی بوندیں بھی
ٹھنڈی نرم ہوائیں جب جب چپکے سے چھو جاتی ہیں
یا کوئل کی بولی سن لوں من بیاکل ہو جاتا ہے
جانے کیوں ایسا ہوں میں
نٹ بنجارن سنیاسی اور کھیل تماشے والے لوگ
کھنڈر ویرانہ جلتی دھوپ پھولی سرسوں دھان کے کھیت
لال پتنگ اور پیلی مینا اندر دھنش اور ندی کی دھار
آتے ہیں جب خواب میں میرے دیوانہ ہو جاتا ہوں
جانے کیوں ایسا ہوں میں
بہت مجھے اچھا کہتے ہیں برا بھی کوئی کہتا ہے
سامنے میری مدح سرائی پیچھے گالی دیتا ہے
ہمدردی ہے کوئی دکھاتا کوئی سازش کرتا ہے
پھر بھی چپ چپ سا رہتا ہوں جیسے بہت انجان ہوں میں
جانے کیوں ایسا ہوں میں
تھوڑی سی آزادی مجھ کو تھوڑا بہت وقت کا زیاں
کبھی کبھار کی اچھی باتیں کسی کسی کا سچا پیار
چھوٹی موٹی کوئی شرارت کھلکھلا کر ہنسنا بھی
یہ سب خوش کر جاتے ہیں جب تو
لگتا ہے کہ زندہ ہوں
جانے کیوں ایسا ہوں میں

ابوبکر عباد

نظم

اک خواہش تھی
کبھی ایسا ہو
کبھی ایسا ہو کہ اندھیرے میں
(جب دل وحشت کرتا ہو بہت
جب غم شدت کرتا ہو بہت)
کوئی تیر چلے
کوئی تیر چلے جو ترازو ہو مرے سینے میں
اک خواہش تھی
کبھی ایسا ہو
کبھی ایسا ہو کہ اندھیرے میں
(جب نیندیں کم ہوتی ہوں بہت
جب آنکھیں نم ہوتی ہوں بہت)
سر آئینہ کوئی شمع جلے
کوئی شمع جلے اور بجھ جائے مگر عکس رہے آئینے میں
اک خواہش تھی
وہ خواہش پوری ہو بھی چکی
دل جیسے دیرینہ دشمن کی سازش پوری ہو بھی چکی
اور اب یوں ہے
جینے اور جیتے رہنے کے بیچ ایک خواب کی
دوری ہے
وہ دوری ختم نہیں ہوتی
اور یہ دوری سب خواب دیکھنے والوں کی مجبوری ہے
مجبوری ختم نہیں ہوتی

افتخار عارف

نظم

ہوا گر ہجر کی سازش میں حصہ دار بن کر درمیاں آئے
ہجر کے پر بھیگ جائیں اور
ہوا پانی میں مل جائے

نوشی گیلانی

نظم

اس سے پہلے میں دروازہ کھولوں
کچھ بولوں
افواہوں کی گرد میں لپٹے زہر آلود محبت نامے لئے ہوئے تم
ادھڑے ہوئے رشتوں کے جامے سیے ہوئے تم
مجھ میں آن سمائے
میں رہنے کے لئے بنا ہوں
جو آئے مجھ میں رہ جائے
مجھے سجائے
جتنا پیار کرے اتنا سکھ پائے
تم سے پہلے بھی کچھ لوگ یوں ہی آئے تھے
اپنے اندر مجھ میں تبدیلی کے خواب سجا لائے تھے
اور پھر اک دن
جس نے جو بھی عہد کیا وہ توڑ دیا
جس نے جو بھی بات کہی وہ رد کر دی
لیکن تم نے تو حد کر دی
میرے دن ویران ہوئے ہیں
میری صبح کے چہرے پر کتنی راتوں کے زخم لگے ہیں
میری شام اداس کھڑی ہے
میرے افق پر سورج لہولہان پڑا ہے
دیواروں سے خوں رستا ہے
دروازوں سے میرا اک اک راز عیاں ہے
میرے صحن میں دشمن کی سازش رقصاں ہے
سنا ہے اب اس حال میں مجھ کو چھوڑ کے تم جانے والے ہو
میرے باہر بیٹھ کے میری یاد کا غم کھانے والے ہو
تم سے اور امید بھی کیا ہو
تم بھی تو دنیا والے ہو
جب تک عشق سے عشق نہیں ملتا تنہا دکھ سہنا ہے
گھر کی فکر تو اس کو ہوگی جس کو گھر میں رہنا ہے

سلیم کوثر

نظم

دکانیں لٹ رہی ہیں گولیوں کی بارش ہے
سیاہ کاروں سے اہل دول کی سازش ہے

وامق جونپوری

نظم

محبتوں کا خیال رکھنا
کہیں نہ ایسا ہو بے دھیانی میں
تم ہتھیلی کو کھول ڈالو
ہوائیں سازش پہ آن اتریں
تو خشک پتوں سا حال ہوگا
گلاب رت کا زوال ہوگا
محبتوں کا خیال رکھنا

ﻓﺎﺧﺮﮦ ﺑﺘﻮﻝ

نظم

جوانی کا خوں ہے
بہاریں ہیں موسم زمیں پر!
پسند آج مجھ کو جنوں ہے
نگاہوں میں ہے میرے نشے کی الجھن
کہ چھایا ہے ترغیب کا جال ہر اک حسیں پر
رسیلے جرائم کی خوشبو مجھے آج للچا رہی ہے!
قوانین اخلاق کے سارے بندھن شکستہ نظر آ رہے ہیں
حسین اور ممنوع جھرمٹ مرے دل کو پھسلا رہے ہیں
یہ ملبوس ریشم کے اور ان کی لرزش
یہ غازہ..... یہ انجن
نسائی فسوں کی ہر اک موہنی آج کرتی ہے سازش
مرے دل کو بہکا رہی ہے!
مرے ذہن میں آ رہی ہے
رسیلے جرائم کی خوشبو!

میراجی

نظم

سلام اے افق ہند کے حسیں تارو
سلام تم پہ سپہر وطن کے مہ پارو
سلام تم پہ مرے بچو اے مرے پیارو
بھلائے بیٹھے ہو تم مجھ کو کس لئے یارو
جلاؤ میرے پیامات کے دئے یارو
سنو کہ میری تمنا و آرزو تم ہو
سنو کہ مادر بھارت کی آبرو تم ہو
سنو کہ امن زمانہ کی جستجو تم ہو
خموش بیٹھے ہو کیوں اپنے لب سیے یارو
جلاؤ میرے پیامات کے دئے یارو
سلام تم پہ کہ میرے چمن کے پھول ہو تم
مری نظر مری فطرت مرا اصول ہو تم
مگر یہ کیا ہوا کس واسطے ملول ہو تم
یہ تم نے چند غلط کام کیوں کئے یارو
جلاؤ میرے پیامات کے دئے یارو
وطن میں خون کے دریا بہا دئے تم نے
سبھی نقوش اہنسا مٹا دئے تم نے
رواج کار محبت بھلا دئے تم نے
رسوم مہر و وفا ترک کر دئے یارو
جلاؤ میرے پیامات کے دئے یارو
سبق پڑھایا تھا تم کو عدم تشدد کا
تمہیں بتایا تھا میں نے گناہ ہے ہنسا
یہ تم نے کس لئے تیغ و تبر سے کام لیا
تمہارے ہاتھوں میں خنجر ہیں کس لئے یارو
جلاؤ میرے پیامات کے دئے یارو
تمہارے ذہنوں میں مکروہ سازش اور فساد
دلوں میں نفرت و کینہ ہے اور بغض و عناد
مگر لبوں پہ ہے بابائے‌‌ قوم زندہ باد
مجھے یہ کھوکھلے نعرے نہ چاہیے یارو
جلاؤ میرے پیامات کے دئے یارو
زمین نانک و چشتی پکارتی ہے تمہیں
دیار بدھ کی تجلی پکارتی ہے تمہیں
سنو کنہیا کی بنسی پکارتی ہے تمہیں
اب اور دیر بھی کرنی نہ چاہیے یارو
جلاؤ میرے پیامات کے دئے یارو
اٹھو زمانۂ حاضر ہے اک پیام عمل
اٹھو کہ کانپ رہی ہے نوائے ساز غزل
اٹھو کہ ماند نہ ہو جائے حسن تاج محل
اٹھو کہ سینوں میں پھر روشنی جئے یارو
جلاؤ میرے پیامات کے دئے یارو
پھر اپنے ذہنوں میں لہکاؤ دوستی کا چمن
پھر اپنی سانسوں سے مہکاؤ پیار کا مدھوبن
پھر اپنے کاموں سے چمکاؤ سر زمین وطن
تمہارے میکدے میں دہر پھر پئے یارو
جلاؤ میرے پیامات کے دئے یارو
نہ چھوڑو زندہ وطن میں کسی لٹیرے کو
کچل دو بڑھ کے ہر اک سانپ کو سپیرے کو
مٹاؤ فرقہ پرستی کے ہر اندھیرے کو
بچاؤ دیش کو بھگوان کے لئے یارو
جلاؤ میرے پیامات کے دئے یارو
مجھے یہ کھوکھلے نعرے نہ چاہیے یارو

نازش پرتاپ گڑھی

نظم

ادھوری لڑکیو
تم اپنے کمروں میں پرانے سال کے بوسیدہ کلینڈر سجا کر سوچتی ہو
یہ بدن عمروں کی سازش میں نہ آئیں گے
تمہیں کس نے بتایا ہے
گھڑی کی سوئیوں کو روکنے سے دوڑتا اور ہانپتا سورج مثال نقش پا
افلاک پر جم جائے گا
تمہیں معلوم ہے عریانیوں کو ڈھانپ کر تم اور عریاں ہو رہی ہو
روز ان آنکھوں کی تکڑی میں تمہارے جسم تلتے ہیں
ہر اک شب ہاسٹل میں تاش کی بازی میں تم کو جیت کر اک جشن ہوتا ہے
ہماری خواب گاہوں میں تمہارے خواب روشن ہیں
چلی آؤ
کہ باہر برف ہے
اور اب ہمیں تم سے جدا بستر کہاں تسلیم کرتے ہیں
چلی آؤ کہ عمریں رائیگاں ہونے سے بچ جائیں!

جاوید انور

نظم

اس نے کہا تھا چھوٹی سی فرمائش ہے!
میں نے کہا تھا بھولی بھالی خواہش ہے!
اس نے کہا تھا روح میں خارش ہوتی ہے
میں نے کہا تھا جسموں کی سازش ہوتی ہے
اس نے کہا تھا بادل کالے ہوتے ہیں
میں نے کہا تھا بجلی گوری ہوتی ہے!
اس نے کہا تھا جب دونوں ٹکراتے ہیں!!
میں نے کہا تھا پھر تو بارش ہوتی ہے!!!!
اس نے کہا تھا بارش میں چھینٹے پڑتے ہیں
میں نے کہا تھا کپڑے بھی گیلے ہوتے ہیں
اس نے کہا تھا بھیگنے والا ہے موسم
میں نے کہا بھاگ نہیں پائیں گے ہم!!

خورشید اکبر

نظم

لیکن پرویز کے دورے کی
ایک اور وجہ بھی تھی
تیس برس تک
دو روحوں کے شب خانوں میں
عجب طرح کی پاگل نفرت پلتی رہی
اور اپنا زہر اگلتی رہی
وہ بدلے کی آگ میں جلتے
انگاروں پر چلتے رہے
اسی لیے کوئی دس دن پہلے
اس سازش نے جنم لیا تھا
اور ممتاز نے کسی پرانے
کاروباری ''ساتھی'' سے
خون کا سودا کر ڈالا تھا
آج اسی کا سندیسا آنے والا تھا

ساقی فاروقی

نظم

نگاہ بد سے دیکھا ہے کسی نے گر گلستاں کو
تو گلچی کی ہر اک سازش ہمیں کو سازگار آئی

جے کرشن چودھری حبیب

نظم

عجب تھا دشت بلا کا منظر
جہاں نئی نفرتوں کے خنجر
پرانی رسم وفا کے دل میں اتر گئے تھے
جہاں پرایوں کی سازش بے اماں کے باعث
لہو کے رشتے بھی دشمن جاں بنے ہوئے تھے
جہاں زمیں پر خریف آتش اگی ہوئی تھی
جہاں فضا میں طیور آہن ابھر رہے تھے

ظہیر کاشمیری

نظم

نام لے کر دیش بھکتی کا جو خوں ریزی کرے
کیسی سازش کیسی نفرت اس دل قاتل میں ہے

اختر حسین شافی

نظم

یہ کیسی سازش ہے جو ہواؤں میں بہہ رہی ہے
میں تیری یادوں کی ساری شمعیں
بجھا کے خوابوں میں چل رہا ہوں
تری محبت مجھے ندامت سے دیکھتی ہے
وہ آبگینہ ہوں خواہشوں کا
کہ دھیرے دھیرے پگھل رہا ہوں
یہ میری آنکھوں میں
کیسا صحرا ابھر رہا ہے
میں بال روموں میں بجھ رہا ہوں
شراب خانوں میں جل رہا ہوں
جو میرے اندر دھڑک رہا تھا
وہ مر رہا ہے

ساقی فاروقی

نظم

امن کی چادر میں
بارود اور مہلک ہتھیاروں کی گٹھڑی باندھ کے
دنیا بھر میں بھیجنے والے بے حس لوگو
اپنی سازش گاہ سے باہر جھانک کے دیکھو
چہرے پر جانی پہچانی بے مقصد سی کچھ تحریریں
تھکے ہوئے پیروں میں بھاگتے رستوں کی ساکت زنجیریں
جیسے آزادی کے گھر میں قید ہوں دو ننگی تصویریں
خشک لبوں پر پیاس بھری تلخی کے سارے ذائقے لکھے
خالی پیٹ کو آنکھوں کی دہلیز پہ رکھے
سامنے ایک سڑک کے موڑ پہ
دو زندہ سائے روتے ہیں
چہرے مہرے رنگ اور نسل میں
بالکل تم جیسے ہوتے ہیں
میلے جسم پر اندر کا احوال سجائے
ہاتھوں کو کشکول بنائے
آنے جانے والوں سے کہتے رہتے ہیں
بابا کوئی کام کرا لو
اور اس کے بدلے میں ہم کو
روٹی لا دو
بھوک مٹا دو

سلیم کوثر

نظم

فاصلہ ضروری ہے
میں روزانہ دفتر میں تاخیر سے پہنچتی ہوں
اور اپنی زنجیر پہن کر بیٹھ جاتی ہوں
میں
ٹائپ رائیٹر پر ہاتھوں کا غلط استعمال نہیں کرتی
چھ بجتے ہی
پاؤں کی زنجیر گلے میں آ جاتی ہے
اور میں
اسٹاپ پر کھڑی
بسوں اور رکشوں کے دھویں میں ہوتی ہوئی سازش کو دیکھ سکتی ہوں
میں جس بس میں بے بس ہوں
وہاں شور گھبراہٹ پسینہ اور غصہ بھرا ہوا ہے
غصے سے بھری ہوئی بس
مجھے گھر سے کچھ فاصلے پر اتار دیتی ہے
میں جاتی ہوئی بس کو حیرت سے دیکھتی ہوں
بس کے پیچھے لکھا ہے
فاصلہ ضروری ہے
بس کے پیچھے جو لکھا ہے
اس کا اطلاق بس کے اندر کیوں نہیں ہوتا

سحر علی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے