Sher on Mausam

baiThe baiThe pheñk diyā hai ātish-dān meñ kyā kyā kuchh

mausam itnā sard nahīñ thā jitnī aag jalā lī hai

baiThe baiThe phenk diya hai aatish-dan mein kya kya kuchh

mausam itna sard nahin tha jitni aag jala li hai

jo un ma.asūm āñkhoñ ne diye the

vo dhoke aaj tak maiñ khā rahā huuñ

jo un masum aankhon ne diye the

wo dhoke aaj tak main kha raha hun

mausam ne khet-khet ugaa.ī hai fasl-e-zard

sarsoñ ke khet haiñ ke jo piile nahīñ rahe

mausam ne khet-khet ugai hai fasl-e-zard

sarson ke khet hain ke jo pile nahin rahe

jaisā muuD ho vaisā manzar hotā hai

mausam to insān ke andar hotā hai

jaisa muD ho waisa manzar hota hai

mausam to insan ke andar hota hai

sardī meñ din sard milā

har mausam bedard milā

sardi mein din sard mila

har mausam bedard mila

vo log mere bahut pyaar karne vaale the

guzar ga.e haiñ jo mausam guzarne vaale the

wo log mere bahut pyar karne wale the

guzar gae hain jo mausam guzarne wale the

tumhāre shahr kā mausam baḌā suhānā lage

maiñ ek shaam churā luuñ agar burā na lage

tumhaare shahr ka mausam baDa suhana lage

main ek sham chura lun agar bura na lage

bahut se ġham december meñ december ke nahīñ the

use bhī june kā ġham thā magar royā december meñ

bahut se gham december mein december ke nahin the

use bhi june ka gham tha magar roya december mein

duur tak chhā.e the bādal aur kahīñ saaya na thā

is tarah barsāt kā mausam kabhī aayā na thā

dur tak chhae the baadal aur kahin saya na tha

is tarah barsat ka mausam kabhi aaya na tha

mere paas se uTh kar vo us kā jaanā

saarī kaifiyyat hai guzarte mausam sī

mere pas se uTh kar wo us ka jaana

sari kaifiyyat hai guzarte mausam si

aatī jaatī hai jā-ba-jā badlī

sāqiyā jald aa havā badlī

aati jati hai ja-ba-ja badli

saqiya jald aa hawa badli

bikhrī zulfoñ ne sikhā.ī mausamoñ ko shā.irī

jhuktī āñkhoñ ne batāyā mai-kashī kyā chiiz hai

bikhri zulfon ne sikhai mausamon ko shairi

jhukti aankhon ne bataya mai-kashi kya chiz hai