Sher on Tanz

ham ko ma.alūm hai jannat kī haqīqat lekin

dil ke ḳhush rakhne ko 'ġhālib' ye ḳhayāl achchhā hai

hum ko malum hai jannat ki haqiqat lekin

dil ke KHush rakhne ko 'ghaalib' ye KHayal achchha hai

ham kyā kaheñ ahbāb kyā kār-e-numāyāñ kar ga.e

B.A hue naukar hue pension milī phir mar ga.e

hum kya kahen ahbab kya kar-e-numayan kar gae

BA hue naukar hue pension mili phir mar gae

ham aisī kul kitābeñ qābil-e-zabtī samajhte haiñ

ki jin ko paḌh ke laḌke baap ko ḳhabtī samajhte haiñ

hum aisi kul kitaben qabil-e-zabti samajhte hain

ki jin ko paDh ke laDke bap ko KHabti samajhte hain

dil ḳhush huā hai masjid-e-vīrāñ ko dekh kar

merī tarah ḳhudā kā bhī ḳhāna ḳharāb hai

dil KHush hua hai masjid-e-viran ko dekh kar

meri tarah KHuda ka bhi KHana KHarab hai

koī hindū koī muslim koī īsā.ī hai

sab ne insān na banñe kī qasam khaa.ī hai

koi hindu koi muslim koi isai hai

sab ne insan na banne ki qasam khai hai

baat tak karnī na aatī thī tumheñ

ye hamāre sāmne kī baat hai

baat tak karni na aati thi tumhein

ye hamare samne ki baat hai

qaum ke ġham meñ dinner khāte haiñ hukkām ke saath

rañj leader ko bahut hai magar ārām ke saath

qaum ke gham mein dinner khate hain hukkaam ke sath

ranj leader ko bahut hai magar aaram ke sath

raqīboñ ne rapaT likhvā.ī hai jā jā ke thāne meñ

ki 'akbar' naam letā hai ḳhudā kā is zamāne meñ

raqibon ne rapaT likhwai hai ja ja ke thane mein

ki 'akbar' nam leta hai KHuda ka is zamane mein

rakhnā hai kahīñ paañv to rakkho ho kahīñ paañv

chalnā zarā aayā hai to itrā.e chalo ho

rakhna hai kahin panw to rakkho ho kahin panw

chalna zara aaya hai to itrae chalo ho

mai bhī hotel meñ piyo chanda bhī do masjid meñ

shaiḳh bhī ḳhush raheñ shaitān bhī be-zār na ho

mai bhi hotel mein piyo chanda bhi do masjid mein

shaiKH bhi KHush rahen shaitan bhi be-zar na ho

sunegā kaun merī chāk-dāmānī kā afsāna

yahāñ sab apne apne pairahan kī baat karte haiñ

sunega kaun meri chaak-damani ka afsana

yahan sab apne apne pairahan ki baat karte hain

leaderoñ kī dhuum hai aur follower koī nahīñ

sab to general haiñ yahāñ āḳhir sipāhī kaun hai

leaderon ki dhum hai aur follower koi nahin

sab to general hain yahan aaKHir sipahi kaun hai

muTThiyoñ meñ ḳhaak le kar dost aa.e vaqt-e-dafn

zindagī bhar kī mohabbat kā silā dene lage

muTThiyon mein KHak le kar dost aae waqt-e-dafn

zindagi bhar ki mohabbat ka sila dene lage

shaiḳh apnī rag ko kyā kareñ reshe ko kyā kareñ

maz.hab ke jhagḌe chhoḌeñ to peshe ko kyā kareñ

shaiKH apni rag ko kya karen reshe ko kya karen

mazhab ke jhagDe chhoDen to peshe ko kya karen

hue is qadar mohazzab kabhī ghar kā muñh na dekhā

kaTī umr hoTaloñ meñ mare aspatāl jā kar

hue is qadar mohazzab kabhi ghar ka munh na dekha

kaTi umr hoTalon mein mare aspatal ja kar

sunā ye hai banā karte haiñ joḌe āsmānoñ par

to ye samjheñ ki har biivī balā-e-āsmānī hai

suna ye hai bana karte hain joDe aasmanon par

to ye samjhen ki har biwi bala-e-asmani hai

āshiqī kā ho burā us ne bigāḌe saare kaam

ham to a.b meñ rahe aġhyār b.a ho ga.e

aashiqi ka ho bura us ne bigaDe sare kaam

hum to ab mein rahe aghyar ba ho gae

uThte huoñ ko sab ne sahārā diyā 'kalīm'

girte hue ġharīb sambhāle kahāñ ga.e

uThte huon ko sab ne sahaara diya 'kalim'

girte hue gharib sambhaale kahan gae

mar.ūb ho ga.e haiñ vilāyat se shaiḳh-jī

ab sirf man.a karte haiñ desī sharāb ko

marub ho gae hain wilayat se shaiKH-ji

ab sirf mana karte hain desi sharab ko

milī hai duḳhtar-e-raz laḌ-jhagaḌ ke qaazī se

jihād kar ke jo aurat mile harām nahīñ

mili hai duKHtar-e-raz laD-jhagaD ke qazi se

jihad kar ke jo aurat mile haram nahin

pī leñge zarā shaiḳh to kuchh garm raheñge

ThanDā na kahīñ kar deñ ye jannat kī havā.eñ

pi lenge zara shaiKH to kuchh garm rahenge

ThanDa na kahin kar den ye jannat ki hawaen

hajv ne to tirā ai shaiḳh bharam khol diyā

tū to masjid meñ hai niyyat tirī mai-ḳhāne meñ

hajw ne to tera ai shaiKH bharam khol diya

tu to masjid mein hai niyyat teri mai-KHane mein

professor ye urdu ke jo urdu se kamāte haiñ

isī paise se bachchoñ ko ye añgrezī paḌhāte haiñ

professor ye urdu ke jo urdu se kamate hain

isi paise se bachchon ko ye angrezi paDhate hain

ilm hāsil kar ke bhī miltī nahīñ hai naukrī

rahm ke qābil hai bas hālat hamārī in dinoñ

ilm hasil kar ke bhi milti nahin hai naukri

rahm ke qabil hai bas haalat hamari in dinon

ḳhud tiis kā hai aur dulhan saaTh baras kī

girtī huī dīvār ke saa.e meñ khaḌā hai

KHud tis ka hai aur dulhan saTh baras ki

girti hui diwar ke sae mein khaDa hai

juute ke intiḳhāb ko masjid meñ jab ga.e

vo jūtiyāñ paḌīñ ki ḳhudā yaad aa gayā

jute ke intiKHab ko masjid mein jab gae

wo jutiyan paDin ki KHuda yaad aa gaya

pahle ham ko bahan kahā ab fikr hamīñ se shādī kī

ye bhī na sochā bahan se shādī kar ke kyā kahlā.eñge

pahle hum ko bahan kaha ab fikr hamin se shadi ki

ye bhi na socha bahan se shadi kar ke kya kahlaenge

chehre to jhurriyoñ se bhare dil javān haiñ

din meñ haiñ shaiḳh raat meñ salmān-ḳhān haiñ

chehre to jhurriyon se bhare dil jawan hain

din mein hain shaiKH raat mein salman-KHan hain

fātiha-ḳhvānī meñ ahbāb uḌā.eñge polāv

aur kareñge mirī baḳhshish kī duā mere ba.ad

fatiha-KHwani mein ahbab uDaenge polaw

aur karenge meri baKHshish ki dua mere baad

kahtī hai ai 'riyāz' darāzī ye riish kī

TaTTī kī aaḌ meñ hai mazā kuchh shikār kā

kahti hai ai 'riyaz' daraazi ye rish ki

TaTTi ki aaD mein hai maza kuchh shikar ka

kalām-e-mīr samjhe aur zabān-e-mīrzā samjhe

magar un kā kahā yā aap samjheñ yā ḳhudā samjhe

kalam-e-mir samjhe aur zaban-e-mirza samjhe

magar un ka kaha ya aap samjhen ya KHuda samjhe

aa ke bazm-e-sher meñ shart-e-vafā puurī to kar

jitnā khānā khā gayā hai utnī mazdūrī to kar

aa ke bazm-e-sher mein shart-e-wafa puri to kar

jitna khana kha gaya hai utni mazduri to kar

vahāñ jo log anāḌī haiñ vaqt kāTte haiñ

yahāñ bhī kuchh mutashā.er dimāġh chāTte haiñ

wahan jo log anaDi hain waqt kaTte hain

yahan bhi kuchh mutashaer dimagh chaTte hain

ham mānte haiñ aap baḌe ġham-gusār haiñ

lekin ye āstīn meñ kyā hai dikhā.iye

hum mante hain aap baDe gham-gusar hain

lekin ye aastin mein kya hai dikhaiye

pareshānī se sar ke baal tak sab jhaḌ ga.e lekin

purānī jeb meñ kanghī jo pahle thī so ab bhī hai

pareshani se sar ke baal tak sab jhaD gae lekin

purani jeb mein kanghi jo pahle thi so ab bhi hai

jo chāhtā hai ki ban jaa.e vo baḌā shā.er

vo jā ke dostī gāñThe kisī mudīr ke saath

jo chahta hai ki ban jae wo baDa shaer

wo ja ke dosti ganThe kisi mudir ke sath

pata hotā to na kartā kabhī koī nekī

tumhīñ jannat meñ milogī mujhe ma.alūm na thā

pata hota to na karta kabhi koi neki

tumhin jannat mein milogi mujhe malum na tha

un ke gunāh kyā kaheñ kis kis ke sar ga.e

tum ko ḳhabar nahīñ ka.ī ustād mar ga.e

un ke gunah kya kahen kis kis ke sar gae

tum ko KHabar nahin kai ustad mar gae

vaa.iz ne mujh meñ dekhī hai īmān kī kamī

vaa.iz meñ sirf dum kī kasar dekhtā huuñ maiñ

waiz ne mujh mein dekhi hai iman ki kami

waiz mein sirf dum ki kasar dekhta hun main

yahāñ tak silsila pahuñchā hai us kī kam-bayānī kā

vo nau bachchoñ kī maañ hai phir bhī dā'vā hai javānī kā

yahan tak silsila pahuncha hai us ki kam-bayani ka

wo nau bachchon ki man hai phir bhi da'wa hai jawani ka

hamāre laal ko darkār hai vahī laḌkī

ki jis kā baap police meñ ho kam se kam deputy

hamare lal ko darkar hai wahi laDki

ki jis ka bap police mein ho kam se kam deputy

be-vaqūfī ke anokhe kārnāme dekh kar

achchhe-ḳhāse leaderoñ ko bhī gadhā kahnā paḌā

be-waqufi ke anokhe karname dekh kar

achchhe-KHase leaderon ko bhi gadha kahna paDa

abhī to hazrat-e-vā.iz mazammat mai kī karte haiñ

agar mai-ḳhāne meñ un kā guzar hogā to kyā hogā

abhi to hazrat-e-waiz mazammat mai ki karte hain

agar mai-KHane mein un ka guzar hoga to kya hoga

naam ke saath ek do alfāz kī dum chāhiye

sher phīkā hī sahī lekin tarannum chāhiye

nam ke sath ek do alfaz ki dum chahiye

sher phika hi sahi lekin tarannum chahiye

shaiḳh-sāhab ne masā.il meñ jakaḌ rakkhā hai

varna islām to āsān thā achchhā-ḳhāsā

shaiKH-sahab ne masail mein jakaD rakkha hai

warna islam to aasan tha achchha-KHasa

jo apnā bhaa.ī hai rahtā hai vo paañv kī Thokar meñ

magar jorū kā bhaa.ī to gale kā haar hotā hai

jo apna bhai hai rahta hai wo panw ki Thokar mein

magar joru ka bhai to gale ka haar hota hai

vo degrē kī bajā.e mam le kar lauT aayā hai

milā thā dāḳhila jis ko samundar-pār college meñ

wo degree ki bajae mam le kar lauT aaya hai

mila tha daKHila jis ko samundar-par college mein

izzat hai gadhoñ kī na Thikāna hai gadhoñ kā

leader yahī kahtā hai zamāna hai gadhoñ kā

izzat hai gadhon ki na Thikana hai gadhon ka

leader yahi kahta hai zamana hai gadhon ka

apnī shohrat kī alag raah nikālī ham ne

kisī dīvāñ se ġhazal koī churā lī ham ne

apni shohrat ki alag rah nikali hum ne

kisi diwan se ghazal koi chura li hum ne

aa.ī sadā-e-haq ki yahī band-o-bast haiñ

tere vatan ke log to murda-parast haiñ

aai sada-e-haq ki yahi band-o-bast hain

tere watan ke log to murda-parast hain