Raahat Indori: Chaand Paagal Hai

roz tāroñ ko numā.ish meñ ḳhalal paḌtā hai

chāñd pāgal hai añdhere meñ nikal paḌtā hai

roz taron ko numaish mein KHalal paDta hai

chand pagal hai andhere mein nikal paDta hai

sūraj sitāre chāñd mire saath meñ rahe

jab tak tumhāre haath mire haath meñ rahe

suraj sitare chand mere sath mein rahe

jab tak tumhaare hath mere hath mein rahe

raat kī dhaḌkan jab tak jaarī rahtī hai

sote nahīñ ham zimmedārī rahtī hai

raat ki dhaDkan jab tak jari rahti hai

sote nahin hum zimmedari rahti hai

so.e rahte haiñ oḌh kar ḳhud ko

ab zarūrat nahīñ razā.ī kī

soe rahte hain oDh kar KHud ko

ab zarurat nahin razai ki

sitāro aao mirī raah meñ bikhar jaao

ye merā hukm hai hālāñki kuchh nahīñ huuñ maiñ

sitaro aao meri rah mein bikhar jao

ye mera hukm hai haalanki kuchh nahin hun main

charāġhoñ kā gharānā chal rahā hai

havā se dostāna chal rahā hai

charaghon ka gharana chal raha hai

hawa se dostana chal raha hai

ab itnī saarī shaboñ kā hisāb kaun rakhe

baḌe savāb kamā.e ga.e javānī meñ

ab itni sari shabon ka hisab kaun rakhe

baDe sawab kamae gae jawani mein

chāñd sūraj mirī chaukhaT pe ka.ī sadiyoñ se

roz likkhe hue chehre pe savāl aate haiñ

chand suraj meri chaukhaT pe kai sadiyon se

roz likkhe hue chehre pe sawal aate hain

jā-namāzoñ kī tarah nuur meñ ujlā.ī sahar

raat bhar jaise farishtoñ ne ibādat kī hai

ja-namazon ki tarah nur mein ujlai sahar

raat bhar jaise farishton ne ibaadat ki hai

shaam ne jab palkoñ pe ātish-dān liyā

kuchh yādoñ ne chuTkī meñ lobān liyā

sham ne jab palkon pe aatish-dan liya

kuchh yaadon ne chuTki mein loban liya