ساحل پہ لوگ یوں ہی کھڑے دیکھتے رہے

دریا میں ہم جو اترے تو دریا اتر گیا

پھر نئی ہجرت کوئی درپیش ہے

خواب میں گھر دیکھنا اچھا نہیں

کربلا میں رخ اصغر کی طرف

تیر چلتے نہیں دیکھے جاتے

اس ہی بنیاد پر کیوں نہ مل جائیں ہم

آپ تنہا بہت ہم اکیلے بہت

تم اپنے عکس میں کیا دیکھتے ہو

تمہارا عکس بھی تم سا نہیں ہے

آپ کے جاتے ہی ہم کو لگ گئی آوارگی

آپ کے جاتے ہی ہم سے گھر نہیں دیکھا گیا

جب تھی منزل نظر میں تو رستہ تھا ایک

گم ہوئی ہے جو منزل تو رستے بہت

سجاتے ہو بدن بے کار جاویدؔ

تماشا روح کے اندر لگے گا

شاعری پیٹ کی خاطر جاویدؔ

بیچ بازار کے آ بیٹھی ہے

زمیں کو اور اونچا مت اٹھاؤ

زمیں کا آسماں سے سر لگے گا

یقیں کا دائرہ دیکھا ہے کس نے

گماں کے دائرے میں کیا نہیں ہے

اشک ڈھلتے نہیں دیکھے جاتے

دل پگھلتے نہیں دیکھے جاتے

ہر اک رستے پہ چل کر سوچتے ہیں

یہ رستہ جا رہا ہے اپنے گھر کیا

دیکھتے ہم بھی ہیں کچھ خواب مگر ہائے رے دل

ہر نئے خواب کی تعبیر سے ڈر جاتا ہے

ترک کرنی تھی ہر اک رسم جہاں

ہاں مگر رسم وفا رکھنی ہی تھی

کبھی سوچا ہے مٹی کے علاوہ

ہمیں کہتے ہیں یہ دیوار و در کیا

منظروں کے بھی پرے ہیں منظر

آنکھ جو ہو تو نظر جائے جی

سمندر پار آ بیٹھے مگر کیا

نئے ملکوں میں بن جاتے ہیں گھر کیا