اک جنم کے پیاسے بھی سیر ہوں تو ہم جانیں

یوں تو رحمت یزداں چار سو برستی ہے

وقت کی لاش پہ رونے کو جگر ہے کس کا

کس جنازے کو لیے اہل نظر آتے ہیں

اداس راتوں کی تیرگی میں نہ کوئی تارا نہ کوئی جگنو

کسی کا نقش قدم ہی چمکے تو نور کا اعتبار آئے

میں نے اپنی پلکوں پر غم کدے سجائے ہیں

آرزو کے ماتم میں سوگوار ہستی ہے

انہیں کیا فکر کہ پوچھیں دل بیمار کا حال

بے نیازانہ وہ انداز سخن ہے کہ جو تھا

چشم نرگس کو ہوس ہے کہ چمن میں دیکھے

آتش گل کے بھڑکنے کا سماں کیا ہوگا

پھر مشیت سے الجھتی ہے مری دیوانگی

نالۂ شبگیر اشکوں کے گہر کافی نہیں

شام کی بھیگی ہوئی پلکوں میں پھر

کوئی آنسو آئے اور تارا بنے

کتنی نادیدہ بہاروں کی تمنائے جواں

دامن جاں میں مرے آگ لگا دیتی ہے

نہ چھوڑا سرد جھونکوں نے وفا کو

جو شاخ درد کی تنہا کلی تھی

میں تیری جنبش مژگاں سے کانپ جاتا ہوں

اگرچہ دل کو غم دو جہاں سے ڈر بھی نہیں

توڑ ڈالیں ہم نظام خستگی

یہ جہان کہنہ دوبارا بنے