ik janam ke pyāse bhī sair hoñ to ham jāneñ

yuuñ to rahmat-e-yazdāñ chār-sū barastī hai

ek janam ke pyase bhi sair hon to hum jaanen

yun to rahmat-e-yazdan chaar-su barasti hai

vaqt kī laash pe rone ko jigar hai kis kā

kis janāze ko liye ahl-e-nazar aate haiñ

waqt ki lash pe rone ko jigar hai kis ka

kis janaze ko liye ahl-e-nazar aate hain

udaas rātoñ kī tīrgī meñ na koī taarā na koī jugnū

kisī kā naqsh-e-qadam hī chamke to nuur kā e'tibār aa.e

udas raaton ki tirgi mein na koi tara na koi jugnu

kisi ka naqsh-e-qadam hi chamke to nur ka e'tibar aae

maiñ ne apnī palkoñ par ġham-kade sajā.e haiñ

aarzū ke mātam meñ sogvār hastī hai

main ne apni palkon par gham-kade sajae hain

aarzu ke matam mein sogwar hasti hai

unheñ kyā fikr ki pūchheñ dil-e-bīmār kā haal

be-niyāzāna vo andāz-e-suḳhan hai ki jo thā

unhen kya fikr ki puchhen dil-e-bimar ka haal

be-niyazana wo andaz-e-suKHan hai ki jo tha

chashm-e-nargis ko havas hai ki chaman meñ dekhe

ātish-e-gul ke bhaḌakne kā samāñ kyā hogā

chashm-e-nargis ko hawas hai ki chaman mein dekhe

aatish-e-gul ke bhaDakne ka saman kya hoga

phir mashiyyat se ulajhtī hai mirī dīvāngī

nāla-e-shab-gīr ashkoñ ke guhar kaafī nahīñ

phir mashiyyat se ulajhti hai meri diwangi

nala-e-shab-gir ashkon ke guhar kafi nahin

shaam kī bhīgī huī palkoñ meñ phir

koī aañsū aa.e aur taarā bane

sham ki bhigi hui palkon mein phir

koi aansu aae aur tara bane

kitnī nādīda bahāroñ kī tamannā-e-javāñ

dāman-e-jāñ meñ mire aag lagā detī hai

kitni nadida bahaaron ki tamanna-e-jawan

daman-e-jaan mein mere aag laga deti hai

na chhoḌā sard jhoñkoñ ne vafā ko

jo shāḳh-e-dard kī tanhā kalī thī

na chhoDa sard jhonkon ne wafa ko

jo shaKH-e-dard ki tanha kali thi

maiñ terī jumbish-e-mizhgāñ se kaañp jaatā hoñ

agarche dil ko ġham-e-do-jahāñ se Dar bhī nahīñ

main teri jumbish-e-mizhgan se kanp jata hon

agarche dil ko gham-e-do-jahan se Dar bhi nahin

toḌ Dāleñ ham nizām-e-ḳhastagī

ye jahān-e-kohna dobārā bane

toD Dalen hum nizam-e-KHastagi

ye jahan-e-kohna dobara bane