dil dukhānā mirā nahīñ maqsad

haq-bayānī mirī nahīñ jaatī

dil dukhana mera nahin maqsad

haq-bayani meri nahin jati

ik to vaise hī udāsī kī ghaTā chhā.ī hai

aur chheḌoge to aañsū bhī nikal sakte haiñ

ek to waise hi udasi ki ghaTa chhai hai

aur chheDoge to aansu bhi nikal sakte hain

aap mazlūm ke ashkoñ se na khilvāḌ kareñ

ye vo dariyā haiñ jo shahroñ ko nigal sakte haiñ

aap mazlum ke ashkon se na khilwaD karen

ye wo dariya hain jo shahron ko nigal sakte hain

raushnī ke liye 'muḳhtār' jalā.e the charāġh

kyā ḳhabar thī ki mire haath bhī jal sakte haiñ

raushni ke liye 'muKHtar' jalae the charagh

kya KHabar thi ki mere hath bhi jal sakte hain

aaj aisī vādiyoñ se ho ke aaya huuñ jahāñ

peḌ the nazdīk lekin duur tak saaya na thā

aaj aisi wadiyon se ho ke aaya hun jahan

peD the nazdik lekin dur tak saya na tha

thakā diyā hai mujhe is qadar masāfat ne

safar ke naam se ab ruuh kaañp jaatī hai

thaka diya hai mujhe is qadar masafat ne

safar ke nam se ab ruh kanp jati hai

jis vaqt huā kartī hai bechain tabī.at

us vaqt bayābān se lagte haiñ chaman bhī

jis waqt hua karti hai bechain tabiat

us waqt bayaban se lagte hain chaman bhi

shiddat-e-pyās ke ehsās ko baḌhne diije

eḌiyoñ se kabhī chashme bhī ubal sakte haiñ

shiddat-e-pyas ke ehsas ko baDhne dije

eDiyon se kabhi chashme bhi ubal sakte hain

rahā na kaam us kī justujū meñ

idhar maiñ ḳhud se bhī gum ho gayā huuñ

raha na kaam us ki justuju mein

idhar main KHud se bhi gum ho gaya hun

mirī hañsī ko sar-e-bazm sah liyā us ne

phir us ke baa'd akele meñ intiqām liyā

meri hansi ko sar-e-bazm sah liya us ne

phir us ke ba'd akele mein intiqam liya

hamāre zehn pe us kā asar to ab bhī hai

bichhaḌne vaalā sharīk-e-safar to ab bhī hai

hamare zehn pe us ka asar to ab bhi hai

bichhaDne wala sharik-e-safar to ab bhi hai

irāde phir bhī mustahkam bahut haiñ

mirī rāhoñ meñ pech-o-ḳham bahut haiñ

irade phir bhi mustahkam bahut hain

meri rahon mein pech-o-KHam bahut hain

miTānā chāhūñ to mumkin kahāñ miTā bhī sakūñ

vo ek baal jo ā.īna-e-ḳhayāl meñ hai

miTana chahun to mumkin kahan miTa bhi sakun

wo ek baal jo aaina-e-KHayal mein hai

hamārī samt se be-raġhbatī na kar varna

tire baġhair qarār aa gayā to kyā hogā

hamari samt se be-raghbati na kar warna

tere baghair qarar aa gaya to kya hoga

un se bāteñ karte karte dil meñ Tiis chamak uTThī thī

lafzoñ par phūloñ kī ridā thī ma.anī meñ nashtar pinhāñ the

un se baaten karte karte dil mein Tis chamak uTThi thi

lafzon par phulon ki rida thi mani mein nashtar pinhan the

vo aa.eñ ham se dalīl māñgeñ

jo kah rahe haiñ ḳhudā nahīñ hai

wo aaen hum se dalil mangen

jo kah rahe hain KHuda nahin hai