'shād' ġhair-mumkin hai shikva-e-butāñ mujh se

maiñ ne jis se ulfat kī us ko bā-vafā paayā

'shad' ghair-mumkin hai shikwa-e-butan mujh se

main ne jis se ulfat ki us ko ba-wafa paya

tum salāmat raho qayāmat tak

aur qayāmat kabhī na aa.e 'shād'

tum salamat raho qayamat tak

aur qayamat kabhi na aae 'shad'

kaTtī hai aarzū ke sahāre pe zindagī

kaise kahūñ kisī kī tamannā na chāhiye

kaTti hai aarzu ke sahaare pe zindagi

kaise kahun kisi ki tamanna na chahiye

dekh kar shā.ir ne us ko nukta-e-hikmat kahā

aur be-soche zamāne ne use ''aurat'' kahā

dekh kar shair ne us ko nukta-e-hikmat kaha

aur be-soche zamane ne use aurat kaha

rañg lā.egī hamārī tañg-dastī ek din

misl-e-ġhālib 'shād' gar sab kuchh udhār aatā gayā

rang laegi hamari tang-dasti ek din

misl-e-ghaalib 'shad' gar sab kuchh udhaar aata gaya

jab chalī apnoñ kī gardan par chalī

chuum luuñ muñh aap kī talvār kā

jab chali apnon ki gardan par chali

chum lun munh aap ki talwar ka

nahīñ hai insāniyat ke baare meñ aaj bhī zehn saaf jin kā

vo kah rahe haiñ ki jis se nekī karoge us se badī milegī

nahin hai insaniyat ke bare mein aaj bhi zehn saf jin ka

wo kah rahe hain ki jis se neki karoge us se badi milegi

kahīñ fitrat badal saktī hai nāmoñ ke badalne se

janāb-e-shaiḳh ko maiñ barhaman kah duuñ to kyā hogā

kahin fitrat badal sakti hai namon ke badalne se

janab-e-shaiKH ko main barhaman kah dun to kya hoga

rafta rafta merī al-ġharzī asar kartī rahī

merī be-parvā.iyoñ par us ko pyaar aatā gayā

rafta rafta meri al-gharzi asar karti rahi

meri be-parwaiyon par us ko pyar aata gaya

jahān-e-dard meñ insāniyat ke naate se

koī bayān kare merī dāstāñ hogī

jahan-e-dard mein insaniyat ke nate se

koi bayan kare meri dastan hogi

shaiḳh par haath uThāne ke nahīñ ham qaa.el

haath uThāne kī jo Thānī hai to bātil se uThā

shaiKH par hath uThane ke nahin hum qael

hath uThane ki jo Thani hai to baatil se uTha

ab unheñ tashrīf laanā chāhiye

raat meñ likhtī hai raanī raat kī

ab unhen tashrif lana chahiye

raat mein likhti hai rani raat ki