der se gūñjte haiñ sannāTe

jaise ham ko pukārtā hai koī

der se gunjte hain sannaTe

jaise hum ko pukarta hai koi

zindagī yuuñ huī basar tanhā

qāfila saath aur safar tanhā

zindagi yun hui basar tanha

qafila sath aur safar tanha

haath chhūTeñ bhī to rishte nahīñ chhoḌā karte

vaqt kī shāḳh se lamhe nahīñ toḌā karte

hath chhuTen bhi to rishte nahin chhoDa karte

waqt ki shaKH se lamhe nahin toDa karte

shaam se aañkh meñ namī sī hai

aaj phir aap kī kamī sī hai

sham se aankh mein nami si hai

aaj phir aap ki kami si hai

kabhī to chauñk ke dekhe koī hamārī taraf

kisī kī aañkh meñ ham ko bhī intizār dikhe

kabhi to chaunk ke dekhe koi hamari taraf

kisi ki aankh mein hum ko bhi intizar dikhe

kitnī lambī ḳhāmoshī se guzrā huuñ

un se kitnā kuchh kahne kī koshish kī

kitni lambi KHamoshi se guzra hun

un se kitna kuchh kahne ki koshish ki

vaqt rahtā nahīñ kahīñ Tik kar

aadat is kī bhī aadmī sī hai

waqt rahta nahin kahin Tik kar

aadat is ki bhi aadmi si hai

ḳhushbū jaise log mile afsāne meñ

ek purānā ḳhat kholā anjāne meñ

KHushbu jaise log mile afsane mein

ek purana KHat khola anjaane mein

ādatan tum ne kar diye va.ade

ādatan ham ne e'tibār kiyā

aadatan tum ne kar diye wade

aadatan hum ne e'tibar kiya

bhare haiñ raat ke reze kuchh aise āñkhoñ meñ

ujālā ho to ham āñkheñ jhapakte rahte haiñ

bhare hain raat ke reze kuchh aise aankhon mein

ujala ho to hum aankhen jhapakte rahte hain

din kuchh aise guzārtā hai koī

jaise ehsāñ utārtā hai koī

din kuchh aise guzarta hai koi

jaise ehsan utarta hai koi

chand ummīdeñ nichoḌī thiiñ to aa.heñ Tapkīñ

dil ko pighlā.eñ to ho saktā hai sāñseñ nikleñ

chand ummiden nichoDi thin to aahen Tapkin

dil ko pighlaen to ho sakta hai sansen niklen

apne maazī kī justujū meñ bahār

piile patte talāsh kartī hai

apne mazi ki justuju mein bahaar

pile patte talash karti hai

ye shukr hai ki mire paas terā ġham to rahā

vagarna zindagī bhar ko rulā diyā hotā

ye shukr hai ki mere pas tera gham to raha

wagarna zindagi bhar ko rula diya hota

jab bhī ye dil udaas hotā hai

jaane kaun ās-pās hotā hai

jab bhi ye dil udas hota hai

jaane kaun aas-pas hota hai

ruke ruke se qadam ruk ke baar baar chale

qarār de ke tire dar se be-qarār chale

ruke ruke se qadam ruk ke bar bar chale

qarar de ke tere dar se be-qarar chale

aap ke ba.ad har ghaḌī ham ne

aap ke saath hī guzārī hai

aap ke baad har ghaDi hum ne

aap ke sath hi guzari hai

tumhāre ḳhvāb se har shab lipaT ke sote haiñ

sazā.eñ bhej do ham ne ḳhatā.eñ bhejī haiñ

tumhaare KHwab se har shab lipaT ke sote hain

sazaen bhej do hum ne KHataen bheji hain

jis kī āñkhoñ meñ kaTī thiiñ sadiyāñ

us ne sadiyoñ kī judā.ī dī hai

jis ki aankhon mein kaTi thin sadiyan

us ne sadiyon ki judai di hai

ham ne aksar tumhārī rāhoñ meñ

ruk kar apnā hī intizār kiyā

hum ne aksar tumhaari rahon mein

ruk kar apna hi intizar kiya