jannat kī zindagī hai jis kī fazā meñ jiinā

merā vatan vahī hai merā vatan vahī hai

jannat ki zindagi hai jis ki faza mein jina

mera watan wahi hai mera watan wahi hai

dil se niklegī na mar kar bhī vatan kī ulfat

merī miTTī se bhī ḳhushbū-e-vafā aa.egī

dil se niklegi na mar kar bhi watan ki ulfat

meri miTTi se bhi KHushbu-e-wafa aaegi

vatan kī pāsbānī jān-o-īmāñ se bhī afzal hai

maiñ apne mulk kī ḳhātir kafan bhī saath rakhtā huuñ

watan ki pasbani jaan-o-iman se bhi afzal hai

main apne mulk ki KHatir kafan bhi sath rakhta hun

ai ahl-e-vatan shām-o-sahar jāgte rahnā

aġhyār haiñ āmāda-e-shar jāgte rahnā

ai ahl-e-watan sham-o-sahar jagte rahna

aghyar hain aamada-e-shar jagte rahna

diloñ meñ hubb-e-vatan hai agar to ek raho

nikhārnā ye chaman hai agar to ek raho

dilon mein hubb-e-watan hai agar to ek raho

nikhaarna ye chaman hai agar to ek raho

tan-man miTā.e jaao tum nām-e-qaumiyat par

rāh-e-vatan par apnī jāneñ laḌā.e jaao

tan-man miTae jao tum nam-e-qaumiyat par

rah-e-watan par apni jaanen laDae jao

vatan kī ret zarā eḌiyāñ ragaḌne de

mujhe yaqīñ hai ki paanī yahīñ se niklegā

watan ki ret zara eDiyan ragaDne de

mujhe yaqin hai ki pani yahin se niklega

kārvāñ jin kā luTā raah meñ āzādī kī

qaum kā mulk kā un dard ke māroñ ko salām

karwan jin ka luTa rah mein aazadi ki

qaum ka mulk ka un dard ke maron ko salam

miTTī kī mohabbat meñ ham āshufta-saroñ ne

vo qarz utāre haiñ ki vājib bhī nahīñ the

miTTi ki mohabbat mein hum aashufta-saron ne

wo qarz utare hain ki wajib bhi nahin the

na pūchho ham-safaro mujh se mājrā-e-vatan

vatan hai mujh pe fidā aur maiñ fidā-e-vatan

na puchho ham-safaro mujh se majra-e-watan

watan hai mujh pe fida aur main fida-e-watan

hai mohabbat is vatan se apnī miTTī se hameñ

is liye apnā kareñge jān-o-tan qurbān ham

hai mohabbat is watan se apni miTTi se hamein

is liye apna karenge jaan-o-tan qurban hum

vatan kī ḳhaak se mar kar bhī ham ko uns baaqī hai

mazā dāmān-e-mādar kā hai is miTTī ke dāman meñ

watan ki KHak se mar kar bhi hum ko uns baqi hai

maza daman-e-madar ka hai is miTTi ke daman mein

ḳhuuñ shahīdān-e-vatan kā rañg lā kar hī rahā

aaj ye jannat-nishāñ hindostāñ āzād hai

KHun shahidan-e-watan ka rang la kar hi raha

aaj ye jannat-nishan hindostan aazad hai

lahū vatan ke shahīdoñ kā rañg laayā hai

uchhal rahā hai zamāne meñ nām-e-āzādī

lahu watan ke shahidon ka rang laya hai

uchhal raha hai zamane mein nam-e-azadi

kyā karishma hai mire jazba-e-āzādī kā

thī jo dīvār kabhī ab hai vo dar kī sūrat

kya karishma hai mere jazba-e-azadi ka

thi jo diwar kabhi ab hai wo dar ki surat

maz.hab nahīñ sikhātā aapas meñ bair rakhnā

hindī haiñ ham vatan hai hindostāñ hamārā

mazhab nahin sikhata aapas mein bair rakhna

hindi hain hum watan hai hindostan hamara

us mulk kī sarhad ko koī chhū nahīñ saktā

jis mulk kī sarhad kī nigahbān haiñ āñkheñ

us mulk ki sarhad ko koi chhu nahin sakta

jis mulk ki sarhad ki nigahban hain aankhen

vo hindī naujavāñ ya.anī alam-bardār-e-āzādī

vatan kī pāsbāñ vo teġh-e-jauhar-dār-e-āzādī

wo hindi naujawan yani alam-bardar-e-azadi

watan ki pasban wo tegh-e-jauhar-dar-e-azadi

vatan ke jāñ-nisār haiñ vatan ke kaam ā.eñge

ham is zamīñ ko ek roz āsmāñ banā.eñge

watan ke jaan-nisar hain watan ke kaam aaenge

hum is zamin ko ek roz aasman banaenge