Sher on Parliament

ham aah bhī karte haiñ to ho jaate haiñ badnām

vo qatl bhī karte haiñ to charchā nahīñ hotā

hum aah bhi karte hain to ho jate hain badnam

wo qatl bhi karte hain to charcha nahin hota

maanā ki terī diid ke qābil nahīñ huuñ maiñ

tū merā shauq dekh mirā intizār dekh

mana ki teri did ke qabil nahin hun main

tu mera shauq dekh mera intizar dekh

hazāroñ ḳhvāhisheñ aisī ki har ḳhvāhish pe dam nikle

bahut nikle mire armān lekin phir bhī kam nikle

hazaron KHwahishen aisi ki har KHwahish pe dam nikle

bahut nikle mere arman lekin phir bhi kam nikle

kuchh to majbūriyāñ rahī hoñgī

yuuñ koī bevafā nahīñ hotā

kuchh to majburiyan rahi hongi

yun koi bewafa nahin hota

tum takalluf ko bhī iḳhlās samajhte ho 'farāz'

dost hotā nahīñ har haath milāne vaalā

tum takalluf ko bhi iKHlas samajhte ho 'faraaz'

dost hota nahin har hath milane wala

ye jabr bhī dekhā hai tārīḳh kī nazroñ ne

lamhoñ ne ḳhatā kī thī sadiyoñ ne sazā paa.ī

ye jabr bhi dekha hai tariKH ki nazron ne

lamhon ne KHata ki thi sadiyon ne saza pai

ham ko un se vafā kī hai ummīd

jo nahīñ jānte vafā kyā hai

hum ko un se wafa ki hai ummid

jo nahin jaante wafa kya hai

nasha pilā ke girānā to sab ko aatā hai

mazā to tab hai ki girtoñ ko thaam le saaqī

nasha pila ke girana to sab ko aata hai

maza to tab hai ki girton ko tham le saqi

shaam tak sub.h kī nazroñ se utar jaate haiñ

itne samjhautoñ pe jiite haiñ ki mar jaate haiñ

sham tak subh ki nazron se utar jate hain

itne samjhauton pe jite hain ki mar jate hain

shohrat kī bulandī bhī pal bhar kā tamāshā hai

jis Daal pe baiThe ho vo TuuT bhī saktī hai

shohrat ki bulandi bhi pal bhar ka tamasha hai

jis Dal pe baiThe ho wo TuT bhi sakti hai

safar meñ dhuup to hogī jo chal sako to chalo

sabhī haiñ bhiiḌ meñ tum bhī nikal sako to chalo

safar mein dhup to hogi jo chal sako to chalo

sabhi hain bhiD mein tum bhi nikal sako to chalo

saare jahāñ se achchhā hindostāñ hamārā

ham bulbuleñ haiñ is kī ye gulsitāñ hamārā

sare jahan se achchha hindostan hamara

hum bulbulen hain is ki ye gulsitan hamara

tū idhar udhar kī na baat kar ye batā ki qāfile kyuuñ luTe

tirī rahbarī kā savāl hai hameñ rāhzan se ġharaz nahīñ

tu idhar udhar ki na baat kar ye bata ki qafile kyun luTe

teri rahbari ka sawal hai hamein rahzan se gharaz nahin

tum se pahle vo jo ik shaḳhs yahāñ taḳht-nashīñ thā

us ko bhī apne ḳhudā hone pe itnā hī yaqīñ thā

tum se pahle wo jo ek shaKHs yahan taKHt-nashin tha

us ko bhi apne KHuda hone pe itna hi yaqin tha

chehre pe saare shahr ke gard-e-malāl hai

jo dil kā haal hai vahī dillī kā haal hai

chehre pe sare shahr ke gard-e-malal hai

jo dil ka haal hai wahi dilli ka haal hai

yaqīn ho to koī rāsta nikaltā hai

havā kī oT bhī le kar charāġh jaltā hai

yaqin ho to koi rasta nikalta hai

hawa ki oT bhi le kar charagh jalta hai

tumhāre paaoñ ke nīche koī zamīn nahīñ

kamāl ye hai ki phir bhī tumheñ yaqīn nahīñ

tumhaare paon ke niche koi zamin nahin

kamal ye hai ki phir bhi tumhein yaqin nahin

maz.hab nahīñ sikhātā aapas meñ bair rakhnā

hindī haiñ ham vatan hai hindostāñ hamārā

mazhab nahin sikhata aapas mein bair rakhna

hindi hain hum watan hai hindostan hamara

kisī ke vāste rāheñ kahāñ badaltī haiñ

tum apne aap ko ḳhud hī badal sako to chalo

kisi ke waste rahen kahan badalti hain

tum apne aap ko KHud hi badal sako to chalo

sach ghaTe yā baḌhe to sach na rahe

jhuuT kī koī intihā hī nahīñ

sach ghaTe ya baDhe to sach na rahe

jhuT ki koi intiha hi nahin

ye kah kah ke ham dil ko bahlā rahe haiñ

vo ab chal chuke haiñ vo ab aa rahe haiñ

ye kah kah ke hum dil ko bahla rahe hain

wo ab chal chuke hain wo ab aa rahe hain

dopahar tak bik gayā bāzār kā har ek jhuuT

aur maiñ ik sach ko le kar shaam tak baiThā rahā

dopahar tak bik gaya bazar ka har ek jhuT

aur main ek sach ko le kar sham tak baiTha raha

tumhārī fā.iloñ meñ gaañv kā mausam gulābī hai

magar ye āñkḌe jhūThe haiñ ye dā'vā kitābī hai

tumhaari failon mein ganw ka mausam gulabi hai

magar ye aankDe jhuThe hain ye da'wa kitabi hai

zindagī dī hai to jiine kā hunar bhī denā

paañv baḳhsheñ haiñ to taufīq-e-safar bhī denā

zindagi di hai to jine ka hunar bhi dena

panw baKHshen hain to taufiq-e-safar bhi dena