kaash lauTeñ mire paapā bhī khilaune le kar

kaash phir se mire hāthoñ meñ ḳhazāna aa.e

kash lauTen mere papa bhi khilaune le kar

kash phir se mere hathon mein KHazana aae

hādse jaan to lete haiñ magar sach ye hai

hādse hī hameñ jiinā bhī sikhā dete haiñ

hadse jaan to lete hain magar sach ye hai

hadse hi hamein jina bhi sikha dete hain

har ḳhudā jannatoñ meñ hai mahdūd

koī sansār tak nahīñ pahuñchā

har KHuda jannaton mein hai mahdud

koi sansar tak nahin pahuncha

jamhūriyat kī laash pe tāqat hai ḳhanda-zan

is barahna nizām meñ har aadmī kī ḳhair

jamhuriyat ki lash pe taqat hai KHanda-zan

is barahna nizam mein har aadmi ki KHair

jab bhī milte haiñ to jiine kī duā dete haiñ

jaane kis baat kī vo ham ko sazā dete haiñ

jab bhi milte hain to jine ki dua dete hain

jaane kis baat ki wo hum ko saza dete hain

shāyad zabāñ pe qarz thā ham ne chukā diyā

ḳhāmosh ho ga.e haiñ tujhe ham pukār ke

shayad zaban pe qarz tha hum ne chuka diya

KHamosh ho gae hain tujhe hum pukar ke

peḌ ko apnā hī saaya nahīñ miltā logo

fasl apnī kabhī paate nahīñ bone vaale

peD ko apna hi saya nahin milta logo

fasl apni kabhi pate nahin bone wale

chāra-gar sab ke paas jaatā thā

sirf bīmār tak nahīñ pahuñchā

chaara-gar sab ke pas jata tha

sirf bimar tak nahin pahuncha

aise sulag uThā tirī yādoñ se dil mirā

jaise dhadhak uTheñ kahīñ jañgal chīnār ke

aise sulag uTha teri yaadon se dil mera

jaise dhadhak uThen kahin jangal chinar ke

ik band ho gayā hai to kholeñge baab aur

ubhreñge apnī raat se sau āftāb aur

ek band ho gaya hai to kholenge bab aur

ubhrenge apni raat se sau aaftab aur

har aadmī ke qad se us kī qabā baḌī hai

sūraj pahan ke nikle dhuñdle charāġh yaaro

har aadmi ke qad se us ki qaba baDi hai

suraj pahan ke nikle dhundle charagh yaro

fan jo me.aar tak nahīñ pahuñchā

apne shahkār tak nahīñ pahuñchā

fan jo mear tak nahin pahuncha

apne shahkar tak nahin pahuncha

vo ret par ik nishān jaisā thā mom ke ik makān jaisā

baḌā sambhal kar chhuā thā maiñ ne pa ek pal meñ bikhar gayā vo

wo ret par ek nishan jaisa tha mom ke ek makan jaisa

baDa sambhal kar chhua tha main ne pa ek pal mein bikhar gaya wo

ek muddat se dhadhaktā rahā merā ye zehn

tab kahīñ jā ke farozāñ hue lafzoñ ke charāġh

ek muddat se dhadhakta raha mera ye zehn

tab kahin ja ke farozan hue lafzon ke charagh

kis ne bechā nahīñ suḳhan apnā

kaun bāzār tak nahīñ pahuñchā

kis ne becha nahin suKHan apna

kaun bazar tak nahin pahuncha

yuuñ abas kisī ko sadā na do dil-e-zār ko ye batā bhī do

kabhī ab na ā.eñge lauT kar vo jo ek baar chale ga.e

yun abas kisi ko sada na do dil-e-zar ko ye bata bhi do

kabhi ab na aaenge lauT kar wo jo ek bar chale gae