میرے تصور نے بخشی ہے تنہائی کو بھی اک محفل

تو محفل محفل تنہا ہو یہ بھی تو ہو سکتا ہے

لوٹا جو اس نے مجھ کو تو آباد بھی کیا

اک شخص رہزنی میں بھی رہبر لگا مجھے

میں تجھ کو بھول نہ پاؤں یہی سزا ہے مری

میں اپنے آپ سے لیتا ہوں انتقام اپنا

وہی مایوسی کا عالم وہی نومیدی کا رنگ

زندگی بھی کسی مفلس کی دعا ہو جیسے

عجیب اس سے تعلق ہے کیا کہا جائے

کچھ ایسی صلح نہیں ہے کچھ ایسی جنگ نہیں

کبھی خوشبو کبھی سایہ کبھی پیکر بن کر

سبھی ہجروں میں وصالوں میں مرے پاس رہو

حرف دشنام سے یوں اس نے نوازا ہم کو

یہ ملامت ہی محبت کا صلہ ہو جیسے

وہ ایک لمحہ مجھے کیوں ستا رہا ہے کہ جو

نہیں کے بعد مگر اس کی ہاں سے پہلے تھا

یہ پڑی ہیں صدیوں سے کس لیے ترے میرے بیچ جدائیاں

کبھی اپنے گھر تو مجھے بلا کبھی راستے مرے گھر کے دیکھ

یاد بن کے پہلو میں موسموں کے بستر پر

کروٹیں بدلتی ہیں مہربانیاں ساری

وہی گماں ہے جو اس مہرباں سے پہلے تھا

وہیں سے پھر یہ سفر ہے جہاں سے پہلے تھا

دھنک کی طرح نکھرتا ہے شب کو خوابوں میں

وہی جو دن کو مری چشم تر میں رہتا ہے

یہ اک سوال ہے شکوہ نہیں گلہ بھی نہیں

مرے خدا ترا لطف و عطا ہے کس کے لیے

غم ایام پہ یوں خوش ہیں ترے دیوانے

غم ایام بھی اک تیری ادا ہو جیسے

اسی تلاش میں پہونچا ہوں عشق تک تیرے

کہ اس حوالے سے پا جاؤں میں دوام اپنا

ضبط جنوں سے اندازوں پر در تو بند نہیں ہوتے

تو مجھ سے بڑھ کر رسوا ہو یہ بھی تو ہو سکتا ہے

لاؤ اک لمحے کو اپنے آپ میں ڈوب کے دیکھ آؤں

خود مجھ میں ہی میرا خدا ہو یہ بھی تو ہو سکتا ہے

جب آ رہی ہیں بہاریں لیے پیام جنوں

یہ پیرہن کو مرے حاجت رفو کیا تھی

تمہیں نہیں ہو اگر آج گوش بر آواز

یہ میری فکر یہ میری نوا ہے کس کے لیے

سر خار سے سر سنگ سے جو ہے میرا جسم لہو لہو

کبھی تو بھی تو مرے سنگ میل کبھی رنگ میرے سفر کے دیکھ

جو بار دوش رہا سر وہ کب تھا شوریدہ

بہا نہ جس سے لہو وہ رگ گلو کیا تھی

صراحئ مئے ناب و سفینہ ہائے غزل

یہ حرف‌ حسن مقدر لکھا ہے کس کے لیے

وہ سن رہا ہے مری بے زبانیوں کی زباں

جو حرف و صوت و صدا و زباں سے پہلے تھا