sub.h-saverā daftar biivī bachche mahfil nīndeñ raat

yaar kisī ko mushkil bhī hotī hai is āsānī par

subh-sawera daftar biwi bachche mahfil ninden raat

yar kisi ko mushkil bhi hoti hai is aasani par

hañsnā ronā paanā khonā marnā jiinā paanī par

paḌhiye to kyā kyā likkhā hai dariyā kī peshānī par

hansna rona pana khona marna jina pani par

paDhiye to kya kya likkha hai dariya ki peshani par

aql vāloñ meñ hai guzar merā

merī dīvāngī sambhāl mujhe

aql walon mein hai guzar mera

meri diwangi sambhaal mujhe

har-dam badan kī qaid kā ronā fuzūl hai

mausam sadā.eñ de to bikhar jaanā chāhiye

har-dam badan ki qaid ka rona fuzul hai

mausam sadaen de to bikhar jaana chahiye

vo shakl vo shanāḳht vo paikar kī aarzū

patthar kī ho ke rah ga.ī patthar kī aarzū

wo shakl wo shanaKHt wo paikar ki aarzu

patthar ki ho ke rah gai patthar ki aarzu

phislan ye kināroñ pa ye Thahrāv nadī kā

sab saaf ishāre haiñ ki gahrā.ī bahut hai

phislan ye kinaron pa ye Thahraw nadi ka

sab saf ishaare hain ki gahrai bahut hai

be-sabab kuchh bhī nahīñ hotā hai yā yuuñ kahiye

aag lagtī hai kahīñ par to dhuāñ hotā hai

be-sabab kuchh bhi nahin hota hai ya yun kahiye

aag lagti hai kahin par to dhuan hota hai

ḳhayāl aayā hameñ bhī ḳhudā kī rahmat kā

sunā.ī jab bhī paḌī hai azaan pinjre meñ

KHayal aaya hamein bhi KHuda ki rahmat ka

sunai jab bhi paDi hai azan pinjre mein

to kyā palaT ke vahī din phir aane vaale haiñ

ka.ī dinoñ se hai dil be-qarār pahle sā

to kya palaT ke wahi din phir aane wale hain

kai dinon se hai dil be-qarar pahle sa

qadam baḌhā to luuñ ābādiyoñ kī samt magar

mujhe vo DhūñDhtā tanhā.iyoñ meñ aayā to

qadam baDha to lun aabaadiyon ki samt magar

mujhe wo DhunDhta tanhaiyon mein aaya to

yahīñ se raah koī āsmāñ ko jaatī thī

ḳhayāl aayā hameñ sīḌhiyāñ utarte hue

yahin se rah koi aasman ko jati thi

KHayal aaya hamein siDhiyan utarte hue

koī to baat hai pichhle pahar meñ rātoñ ke

ye band kamra ajab raushnī se bhar jaa.e

koi to baat hai pichhle pahar mein raaton ke

ye band kamra ajab raushni se bhar jae

jise parchhā.īñ samjhe the haqīqat meñ na paikar ho

parakhnā chāhiye thā aap ko us shai ko chhū kar bhī

jise parchhain samjhe the haqiqat mein na paikar ho

parakhna chahiye tha aap ko us shai ko chhu kar bhi