ḳhvābīda apne chāhne vāloñ ko dekh kar

mumkin hai lauT jaa.e sahar jāgte raho

KHwabida apne chahne walon ko dekh kar

mumkin hai lauT jae sahar jagte raho

hasad kā rañg pasandīda rañg hai sab kā

yahāñ kisī ko koī ab duā nahīñ detā

hasad ka rang pasandida rang hai sab ka

yahan kisi ko koi ab dua nahin deta

kitne mahbūb gharoñ se ga.e kis ko ma.alūm

vāpas aa.e haiñ jo apnoñ meñ ḳhabar kī sūrat

kitne mahbub gharon se gae kis ko malum

wapas aae hain jo apnon mein KHabar ki surat

dekho us ne qadam qadam par saath diyā begāne kā

'aḳhtar' jis ne ahd kiyā thā tum se saath nibhāne kā

dekho us ne qadam qadam par sath diya begane ka

'aKHtar' jis ne ahd kiya tha tum se sath nibhane ka

ik tere hī kūche par mauqūf nahīñ hai kuchh

har gaam haiñ ta.azīreñ ham log jahāñ bhī haiñ

ek tere hi kuche par mauquf nahin hai kuchh

har gam hain taziren hum log jahan bhi hain

jazbe kī kaḌī dhuup ho to kyā nahīñ mumkin

ye kis ne kahā sañg pighaltā hī nahīñ hai

jazbe ki kaDi dhup ho to kya nahin mumkin

ye kis ne kaha sang pighalta hi nahin hai

hameñ ḳhudā pe bharosa hai nā-ḳhudā pe nahīñ

ḳhudā jo detā hai vo nā-ḳhudā nahīñ detā

hamein KHuda pe bharosa hai na-KHuda pe nahin

KHuda jo deta hai wo na-KHuda nahin deta

isī hasrat meñ kaTī rāh-e-hayāt

koī do-chār qadam saath chale

isi hasrat mein kaTi rah-e-hayat

koi do-chaar qadam sath chale

suune kitne baam hue kitne āñgan be-nūr hue

chāñd se chehre yaad aate haiñ chāñd nikalte vaqt bahut

sune kitne baam hue kitne aangan be-nur hue

chand se chehre yaad aate hain chand nikalte waqt bahut

mausam-e-gul tire sadqe tirī aamad ke nisār

dekh mujh se mirā saaya bhī judā hai ab ke

mausam-e-gul tere sadqe teri aamad ke nisar

dekh mujh se mera saya bhi juda hai ab ke

mai-e-kohna na sahī ḳhūn-e-tamannā hī sahī

ek paimāna mire sāmne laayā to gayā

mai-e-kohna na sahi KHun-e-tamanna hi sahi

ek paimana mere samne laya to gaya