یہ بادشاہ نہیں ہے فقیر ہے سورج

ہمیشہ رات کی جھولی سے دن نکالتا ہے

مجھے سونے کی قیمت مت بتاؤ

میں مٹی ہوں مری عظمت بہت ہے

جس بات کا مطلب خوشبو ہے ہر گاؤں کے کچے رستے پر

اس بات کا مطلب بدلے گا جب پکی سڑک آ جائے گی

جو دوستوں کی محبت سے جی نہیں بھرتا

تو آستین میں دو چار سانپ پال کے رکھ

مشہور بھی ہیں بدنام بھی ہیں خوشیوں کے نئے پیغام بھی ہیں

کچھ غم کے بڑے انعام بھی ہیں پڑھیے تو کہانی کام کی ہے

گھر بار چھوڑ کر وہ فقیروں سے جا ملے

چاہت نے بادشاہوں کو محکوم کر دیا

غیر تو آنسو پوچھیں گے

دھوکا دیں گے اپنے لوگ

جو سارے دن کی تھکن اوڑھ کر میں سوتا ہوں

تو ساری رات مرا گھر سفر میں رہتا ہے

اے آسمان حرف کو پھر اعتبار دے

ورنہ حقیقتوں کو کہانی لکھیں گے لوگ

تجھے تو کتنی بہاریں سلام بھیجیں گی

ابھی یہ پھول سا چہرہ ذرا سنبھال کے رکھ

ذرا محفوظ رستوں سے گزرنا

تمہاری شہر میں شہرت بہت ہے

میں نے سورج کی طرح خود کو بنایا جس دن

دیکھنے آئیں گے یہ مغرب و مشرق مجھ کو

کتاب عشق کے جو معتبر رسالے ہیں

انہیں میں حسن کے کچھ مستند حوالے ہیں

شہرت کی روشنی ہو کہ نفرت کی تیرگی

کیا کیا اسے دیا ہے خدا نے پتا کرو

معراج عقیدت ہے کہ تعویذ کی صورت

بازو پہ کوئی خاک وطن باندھے ہوئے ہے

تجھ کو خبر نہیں ہے مگر اک ترے بغیر

یہ دل پسند شہر بھی خالی لگا مجھے

میں ایسے در کا گدا ہوں جہاں پہ موتی کیا

ہزار بار مجھے سنگ آب دار ملے