دہر میں اک ترے سوا کیا ہے

تو نہیں ہے تو پھر بھلا کیا ہے

مل ہی جائے گی کبھی منزل مقصود سحر

شرط یہ ہے کہ سفر کرتے رہو شام کے ساتھ

یہ غم نہیں کہ مجھ کو جاگنا پڑا ہے عمر بھر

یہ رنج ہے کہ میرے سارے خواب کوئی لے گیا

ایک سناٹا تھا آواز نہ تھی اور نہ جواب

دل میں اتنے تھے سوالات کہ ہم سو نہ سکے

کچھ کام آ سکیں نہ یہاں بے گناہیاں

ہم پر لگا ہوا تھا وہ الزام عمر بھر

تھپکیاں دیتے رہے ٹھنڈی ہوا کے جھونکے

اس قدر جل اٹھے جذبات کہ ہم سو نہ سکے

باقی ابھی قفس میں ہے اہل قفس کی یاد

بکھرے پڑے ہیں بال کہیں اور پر کہیں

ان کو ہے دعویٰ مسیحائی

جو نہیں جانتے شفا کیا ہے

ہزار بار آزما چکا ہے مگر ابھی آزما رہا ہے

ابھی زمانے کو آدمی کا نہیں ہے کچھ اعتبار شاید

اب کون سی متاع سفر دل کے پاس ہے

اک روشنئ صبح تھی وہ بھی اداس ہے

جس کو چلنا ہے چلے رخت سفر باندھے ہوئے

ہم جہاں گشت ہیں اٹھے ہیں کمر باندھے ہوئے

اے موج خوش خرام ذرا تیز تیز چل

بنتی ہے سطح آب کنارہ کبھی کبھی

وہ شے کہاں ہے پنہاں اے موج آب حیواں

جو وجۂ سر خوشی تھی برسوں کی تشنگی میں

ہمیں نے زیست کے ہر روپ کو سنوارا ہے

لٹا کے روشنئ طبع جلوہ گاہوں میں

ہم نے جو تمنائیؔ بیابان طلب میں

اک عمر گزاری ہے تو دو چار برس اور

وہیں بہار بکف قافلے لپک کے چلے

جہاں جہاں ترے نقش قدم ابھرتے رہے