ہوس شامل ہے تھوڑی سی دعا میں

ابھی اس لو میں ہلکا سا دھواں ہے

شام اتری ہے پھر احاطے میں

جسم پر روشنی کے گھاؤ لیے

وہی آنسو وہی ماضی کے قصے

جسے دیکھو کٹے کو کاٹتا ہے

مسکرانے کا فن تو بعد کا ہے

پہلے ساعت کا انتخاب کرو

تعلق ترک تو کر لیں سبھی سے

بھلے لگتے ہیں کچھ نقصان لیکن

سمندر ہے کوئی آنکھوں میں شاید

کناروں پر چمکتے ہیں گہر سے

سمت دنیا کے ہم گئے ہی نہیں

اس علاقے سے دشمنی سی رہی

میں سارے فاصلے طے کر چکا ہوں

خودی جو درمیاں تھی درمیاں ہے

ملے اب کے تو روئے ٹوٹ کر ہم

گناہ اپنی سزا کے رو بہ رو تھا

اتر جاتا تو رسوائی بہت ہوتی

کہ سر کا بوجھ بھی دستار جیسا تھا

خواب ندی سا گزر جائے گا

دشت آنکھوں میں ٹھہر جانا ہے

ایک نشہ ہے خود نمائی بھی

جو یہ اترے تو پھر تجھے دیکھوں

کشش تجھ سی نہ تھی تیرے غموں میں

لب و لہجہ مگر ہاں ہو بہ ہو تھا

ہم جو ٹوٹے ہیں بتا ہار بھلا کس کی ہوئی

زندگی تیری اٹھائی ہوئی سوگند تھے ہم

اب کے تعبیر مسئلہ نہ رہے

یہ جو دنیا ہے اس کو خواب کرو

ہمیں اس طرح ہی ہونا تھا آباد

ہمارے ساتھ ویرانے لگے ہیں

زیر لب رکھ چھپا کے نام اس کا

لفظ ہوتے ہیں کچھ بیاں سے خراب

آئنہ میں ہے پھر وہی صورت

یوں ہی ہوتی ہے ترجمانی کیا

اور کچھ دیر غم نظر میں رکھ

کیا خبر مل ہی جائے تھاہ کہیں

بعد مدت یہ جلا کس کے ہنر نے بخشی

بعد مدت مرے آئینے میں چہرہ آئے