ساری عزت نوکری سے اس زمانے میں ہے مہرؔ

جب ہوئے بے کار بس توقیر آدھی رہ گئی

ابرو کا اشارہ کیا تم نے تو ہوئی عید

اے جان یہی ہے مہ شوال ہمارا

مار ڈالا تری آنکھوں نے ہمیں

شیر کا کام ہرن کرتے ہیں

اپنا باطن خوب ہے ظاہر سے بھی اے جان جاں

آنکھ کے لڑنے سے پہلے جی لڑا بیٹھے ہیں ہم

ہم بھی باتیں بنایا کرتے ہیں

شعر کہنا مگر نہیں آتا

داغوں کی بس دکھا دی دوالی میں روشنی

ہم سا نہ ہوگا کوئی جہاں میں دیوالیہ

دونوں رخسار عنایت کریں اک اک بوسہ

عاشقوں کے لیے سرکار سے چندا ہو جائے

قاضی کا نہ ڈر ہے نہ غم محتسب شہر

ہوشیار نہ ہو کوئی تغافل کے برابر

میں جیتا ہوں دیکھے سے صورت تمہاری

مجھے ہے نہایت ضرورت تمہاری

کسی کا رخ ہمیں قرآن کا جواب ملا

خدا کا شکر ہے بت صاحب کتاب ملا

پاؤں پوجوں میں اپنے ہاتھوں کے

ان کی انگیا کے بند کھولے ہیں

پستاں ہیں حباب اور شکم بحر لطافت

موجیں ہیں بٹیں پیٹ کی دریا کا بھنور ناف

کوئی ہوگا نہ خریدار ہمارے دل کا

تم تو بازار میں ہڑتال کئے جاتے ہو

میں نے مانا آپ نے بوسے دئے میں نے لئے

وہ کہاں نکلی جو ہے میری تمنا ایک اور

نماز صبح وہ ہی پڑھ رہے تھے کعبہ میں

جناب مہرؔ جو مندر میں تھے پجاری رات

یاد میں اک شوخ پنجابی کے روتے ہیں جو ہم

آج کل پنجاب میں بہتا ہے دریا ایک اور

ابر آئے تو شراب پئیں بادہ خوار ہیں

امیدوار رحمت پروردگار ہیں

وحدہ لا شریک کی ہے قسم

اے صنم تم بتوں میں یکتا ہو

راتوں کو بت بغل میں ہیں قرآں تمام دن

ہندو تمام شب ہوں مسلماں تمام دن

یاد رکھنے کی یہ باتیں ہیں بجا ہے سچ ہے

آپ بھولے نہ ہمیں آپ کو ہم بھول گئے

آپ ہی پر نہیں دیوانہ پن اپنا موقوف

اور بھی چند پری زاد ہیں اچھے اچھے

زاہد حرم میں بیٹھ کے خالی میں کیا کروں

کوسوں یہاں شراب کہیں بوند بھر نہیں

نہ ذقن ہے وہ نہ لب ہیں نہ وہ پستاں نہ وہ قد

سیب و عناب و انار ایک شجر سے نکلے

رات دن سجدے کیا کرتا ہے حوروں کے لئے

کوئی زاہد کی نمازوں میں تو نیت دیکھتا

مری تو خاک بھی تیرے قدم نہ چھوڑے گی

ذرا تو آنے تو دے اپنے پائمال کا وقت

مے کدہ چھوڑ کے کیوں دیر و حرم میں جائیں

اس میں ہندو رہیں اس میں ہوں مسلماں آباد

چھو جائے جو بندے کے سوا جسم سے تیرے

اللہ کرے ہاتھ وہ گل جائے تو اچھا

بوسے لیتے ہیں چشم جاناں کے

ہم ہرن کا شکار کرتے ہیں

دیوانہ ہوں پر کام میں ہوشیار ہوں اپنے

یوسف کا خیال آیا جو زنداں نظر آیا

آگرہ چھوٹ گیا مہرؔ تو چنار میں بھی

ڈھونڈھا کرتی ہیں وہی کوچہ و بازار آنکھیں

کس پر نہیں رہی ہے عنایت حضور کی

صاحب نہیں مجھی پہ تمہارا کرم فقط

خوبروئی پہ ہے کیا ناز بتان لندن

ہیں فقط روئی کے گالوں کی طرح گال سفید

ہے یہ پورب کی زبان دانی مہرؔ

کہتے ہیں بات کو ہم سنتا ہوں

کعبہ میں ہم کو دیر کا ہر دم خیال تھا

اللہ جانتا ہے بتوں کا رہا لحاظ

در بہ در مارا پھرا میں جستجوئے یار میں

زاہد کعبہ ہوا رہبان بت خانہ ہوا

جنت کی نعمتوں کا مزا واعظوں کو ہو

ہم تو ہیں محو لذت بوس و کنار میں

تری تلاش سے باقی کوئی مکاں نہ رہا

حرم میں دیر میں بندہ کہاں کہاں نہ رہا

یوں اگر جھگڑا محبت کا چکے تو خوب ہے

ہم زیادہ چاہیں وہ اے مہرؔ کم چاہا کریں

شیخ کعبہ میں یہ دعا مانگو

مہرؔ ہو بت کدہ ہو دنیا ہو

کیا بتوں میں ہے خدا جانے بقول استاد

نہ کمر رکھتے ہیں کافر نہ دہن رکھتے ہیں

بندھ گئی باغ میں تیری تو ہوا باد صبا

ان کے کوچہ میں مری آہ کی بندھ جائے ہوا

کرتے ہیں شوق دید میں باتیں ہوا سے ہم

جاتے ہیں کوئے یار میں پہلے صبا سے ہم

ہم مہرؔ محبت سے بہت تنگ ہیں اب تو

روکیں گے طبیعت کو جو رک جائے تو اچھا

پاس آداب حسن یار رہا

عشق میرے لیے ادیب ہوا

عین کعبہ میں ہے مستوں کی جگہ

کہہ رہی ہیں تہہ ابرو آنکھیں

تو نے وحدت کو کر دیا کثرت

کبھی تنہا نظر نہیں آتا

گل بانگ تھی گلوں کی ہمارا ترانہ تھا

اپنا بھی اس چمن میں کبھی آشیانہ تھا

اے بتوں اللہ سے لی ہے اجازت وصل کی

کل ہزاروں دیکھ ڈالے استخارے رات کو

کیا تفرقہ ہوا جو ہوئے یار سے الگ

دل ہم سے اور ہم ہیں دل زار سے الگ

کافر عشق ہوں مشتاق شہادت بھی ہوں

کاش مل جائے تری تیغ کا زنار کہیں