غیر ہو کوئی تو اس سے کھل کے باتیں کیجئے

دوستوں کا دوستوں سے ہی گلہ اچھا نہیں

نہ جانے کب وہ پلٹ آئیں در کھلا رکھنا

گئے ہوئے کے لیے دل میں کچھ جگہ رکھنا

اس کے چہرے کی چمک کے سامنے سادہ لگا

آسماں پہ چاند پورا تھا مگر آدھا لگا

کوئی بادل میرے تپتے جسم پر برسا نہیں

جل رہا ہوں جانے کب سے جسم کی گرمی کے ساتھ

جی میں ٹھانی ہے کہ جینا ہے بہرحال مجھے

جس کو مرنا ہے وہ چپ چاپ ہی مرتا جائے

طاق پر جزدان میں لپٹی دعائیں رہ گئیں

چل دیئے بیٹے سفر پر گھر میں مائیں رہ گئیں

بہتی رہی ندی مرے گھر کے قریب سے

پانی کو دیکھنے کے لیے میں ترس گیا

مجھ سے نفرت ہے اگر اس کو تو اظہار کرے

کب میں کہتا ہوں مجھے پیار ہی کرتا جائے

یہ کون مجھ کو ادھورا بنا کے چھوڑ گیا

پلٹ کے میرا مصور کبھی نہیں آیا

اگرچہ پھول یہ اپنے لیے خریدے ہیں

کوئی جو پوچھے تو کہہ دوں گا اس نے بھیجے ہیں

جس گھڑی آیا پلٹ کر اک مرا بچھڑا ہوا

عام سے کپڑوں میں تھا وہ پھر بھی شہزادہ لگا

نہ ہو کہ قرب ہی پھر مرگ ربط بن جائے

وہ اب ملے تو ذرا اس سے فاصلہ رکھنا

دیوار و در جھلستے رہے تیز دھوپ میں

بادل تمام شہر سے باہر برس گیا

کٹی ہے عمر کسی آب دوز کشتی میں

سفر تمام ہوا اور کچھ نہیں دیکھا

ترا ہے کام کماں میں اسے لگانے تک

یہ تیر خود ہی چلا جائے گا نشانے تک

ہزار تلخ ہوں یادیں مگر وہ جب بھی ملے

زباں پہ اچھے دنوں کا ہی ذائقہ رکھنا

میں شیشہ کیوں نہ بنا آدمی ہوا کیونکر

مجھے تو عمر لگی ٹوٹ پھوٹ جانے تک

خود کو ہجوم دہر میں کھونا پڑا مجھے

جیسے تھے لوگ ویسا ہی ہونا پڑا مجھے

تو تو ان کا بھی گلہ کرتا ہے جو تیرے نہ تھے

تو نے دیکھا ہی نہیں کچھ بھی تو پاگل ہے ابھی

فصل گل میں بھی دکھاتا ہے خزاں دیدہ درخت

ٹوٹ کر دینے پہ آئے تو گھٹا جیسا بھی ہے

اس قدر بھی تو نہ جذبات پہ قابو رکھو

تھک گئے ہو تو مرے کاندھے پہ بازو رکھو