دیکھو گے تو ہر موڑ پہ مل جائیں گی لاشیں

ڈھونڈوگے تو اس شہر میں قاتل نہ ملے گا

چہرے پہ سارے شہر کے گرد ملال ہے

جو دل کا حال ہے وہی دلی کا حال ہے

وہی قاتل وہی منصف عدالت اس کی وہ شاہد

بہت سے فیصلوں میں اب طرف داری بھی ہوتی ہے

دریا کے تلاطم سے تو بچ سکتی ہے کشتی

کشتی میں تلاطم ہو تو ساحل نہ ملے گا

انہیں ٹھہرے سمندر نے ڈبویا

جنہیں طوفاں کا اندازا بہت تھا

خواب کا رشتہ حقیقت سے نہ جوڑا جائے

آئینہ ہے اسے پتھر سے نہ توڑا جائے

رسم تعظیم نہ رسوا ہو جائے

اتنا مت جھکئے کہ سجدہ ہو جائے

عجیب درد کا رشتہ ہے ساری دنیا میں

کہیں ہو جلتا مکاں اپنا گھر لگے ہے مجھے

روشن چہرہ بھیگی زلفیں دوں کس کو کس پر ترجیح

ایک قصیدہ دھوپ کا لکھوں ایک غزل برسات کے نام

کچھ غم جاناں کچھ غم دوراں دونوں میری ذات کے نام

ایک غزل منسوب ہے اس سے ایک غزل حالات کے نام

اب دیکھ کے اپنی صورت کو اک چوٹ سی دل پر لگتی ہے

گزرے ہوئے لمحے کہتے ہیں آئینہ بھی پتھر ہوتا ہے

عرض طلب پر اس کی چپ سے ظاہر ہے انکار مگر

شاید وہ کچھ سوچ رہا ہو ایسا بھی ہو سکتا ہے

جن سفینوں نے کبھی توڑا تھا موجوں کا غرور

اس جگہ ڈوبے جہاں دریا میں طغیانی نہ تھی

کیا جانئے کیسی تھی وہ ہوا چونکا نہ شجر پتہ نہ ہلا

بیٹھا تھا میں جس کے سائے میں منظورؔ وہی دیوار گری

زندگی میں پہلے اتنی تو پریشانی نہ تھی

تنگ دامانی تھی لیکن چاک دامانی نہ تھی

وقت شاہد ہے کہ ہر دور میں عیسیٰ کی طرح

ہم صلیبوں پہ لیے اپنی صداقت آئے

حال پریشاں سن کر میرا آنکھ میں اس کی آنسو ہیں

میں نے اس سے جھوٹ کہا ہو ایسا بھی ہو سکتا ہے

دیوانہ ہر اک حال میں دیوانہ رہے گا

فرزانہ کہا جائے کہ دیوانہ کہا جائے

کھل اٹھے گل یا کھلے دست حنائی تیرے

ہر طرف تو ہے تو پھر تیرا پتا کس سے کریں

نہ خوف برق نہ خوف شرر لگے ہے مجھے

خود اپنے باغ کو پھولوں سے ڈر لگے ہے مجھے

بے چہرگی کی بھیڑ میں گم ہے مرا وجود

میں خود کو ڈھونڈھتا ہوں مجھے خد و خال دے

کاش دولت غم ہی اپنے پاس بچ رہتی

وہ بھی ان کو دے بیٹھے ایسی مات کھائی ہے

دور عشرت نے سنوارے ہیں غزل کے گیسو

فکر کے پہلو مگر غم کی بدولت آئے