āshiq ko dekhte haiñ dupaTTe ko taan kar

dete haiñ ham ko sharbat-e-dīdār chhān kar

aashiq ko dekhte hain dupaTTe ko tan kar

dete hain hum ko sharbat-e-didar chhan kar

ashk-e-ġham dīda-e-pur-nam se sambhāle na ga.e

ye vo bachche haiñ jo maañ baap se paale na ga.e

ashk-e-gham dida-e-pur-nam se sambhaale na gae

ye wo bachche hain jo man bap se pale na gae

'anīs' āsāñ nahīñ ābād karnā ghar mohabbat kā

ye un kā kaam hai jo zindagī barbād karte haiñ

'anis' aasan nahin aabaad karna ghar mohabbat ka

ye un ka kaam hai jo zindagi barbaad karte hain

'anīs' dam kā bharosā nahīñ Thahar jaao

charāġh le ke kahāñ sāmne havā ke chale

'anis' dam ka bharosa nahin Thahar jao

charagh le ke kahan samne hawa ke chale

tamām umr jo kī ham se be-ruḳhī sab ne

kafan meñ ham bhī azīzoñ se muñh chhupā ke chale

tamam umr jo ki hum se be-ruKHi sab ne

kafan mein hum bhi azizon se munh chhupa ke chale

tamām umr isī ehtiyāt meñ guzrī

ki āshiyāñ kisī shāḳh-e-chaman pe baar na ho

tamam umr isi ehtiyat mein guzri

ki aashiyan kisi shaKH-e-chaman pe bar na ho

sivā.e ḳhaak ke baaqī asar nishāñ se na the

zamīñ se dab ga.e dabte jo āsmāñ se na the

siwae KHak ke baqi asar nishan se na the

zamin se dab gae dabte jo aasman se na the

lagā rahā huuñ mazāmīn-e-nau ke phir ambār

ḳhabar karo mere ḳhirman ke ḳhoshā-chīnoñ ko

laga raha hun mazamin-e-nau ke phir ambar

KHabar karo mere KHirman ke KHosha-chinon ko

karīm jo tujhe denā hai be-talab de de

faqīr huuñ pa nahīñ ādat-e-savāl mujhe

karim jo tujhe dena hai be-talab de de

faqir hun pa nahin aadat-e-sawal mujhe

garmī se muztarib thā zamāna zamīn par

bhun jaatā thā jo girtā thā daanā zamīn par

garmi se muztarib tha zamana zamin par

bhun jata tha jo girta tha dana zamin par

ḳhaak se hai ḳhaak ko ulfat taḌaptā huuñ 'anīs'

karbalā ke vāste maiñ karbalā mere liye

KHak se hai KHak ko ulfat taDapta hun 'anis'

karbala ke waste main karbala mere liye

gul-dasta-e-ma.ānī ko na.e Dhañg se bāñdhūñ

ik phuul kā mazmūñ ho to sau rañg se bāñdhūñ

gul-dasta-e-maani ko nae Dhang se bandhun

ek phul ka mazmun ho to sau rang se bandhun

tū sarāpā ajr ai zāhid maiñ sar-tā-pā gunāh

bāġh-e-jannat terī ḳhātir karbalā mere liye

tu sarapa ajr ai zahid main sar-ta-pa gunah

bagh-e-jannat teri KHatir karbala mere liye

misāl-e-māhī-e-be-āb mauj taḌpā kī

habāb phuuT ke ro.e jo tum nahā ke chale

misal-e-mahi-e-be-ab mauj taDpa ki

habab phuT ke roe jo tum naha ke chale

chhā.e phūloñ se bhī sayyād to ābād na ho

vo qafas kyā jo tah-e-dāman-esayyād na ho

chhae phulon se bhi sayyaad to aabaad na ho

wo qafas kya jo tah-e-daman-esayyaad na ho