kitnā dushvār lag rahā thā safar

dekho ham aa ga.e vahāñ se yahāñ

kitna dushwar lag raha tha safar

dekho hum aa gae wahan se yahan

bahut ghāTe meñ hai urdu zabāñ kyoñ

mohabbat kī zabāñ hote hue bhī

bahut ghaTe mein hai urdu zaban kyon

mohabbat ki zaban hote hue bhi

tere kahne se chup nahīñ huuñ maiñ

jāntā huuñ ki bolnā kab hai

tere kahne se chup nahin hun main

jaanta hun ki bolna kab hai

hoñT apne haiñ daañt bhī apne

kyā shikāyat kareñ kisī se ham

honT apne hain dant bhi apne

kya shikayat karen kisi se hum

shor meñ nafrat ke merī baat zaa.e.a ho ga.ī

merā kahnā aur thā un kā samajhnā aur thā

shor mein nafrat ke meri baat zaea ho gai

mera kahna aur tha un ka samajhna aur tha

nazar rakhte haiñ us kī har adā par

ba-zāhir be-ḳhabar hote hue bhī

nazar rakhte hain us ki har ada par

ba-zahir be-KHabar hote hue bhi

ek tum ho ki tumheñ sochnā aatā hī nahīñ

ek ham haiñ ki bahut soch ke nuqsān meñ haiñ

ek tum ho ki tumhein sochna aata hi nahin

ek hum hain ki bahut soch ke nuqsan mein hain

ab tire shahr meñ rahnā koī āsān kahāñ

sab mujhe tere havāle hī se pahchānte haiñ

ab tere shahr mein rahna koi aasan kahan

sab mujhe tere hawale hi se pahchante hain

hādse se hādse tak zindagī kā hai safar

beach meñ ḳhushiyāñ haiñ kuchh vo bhī ġhamoñ ke saath haiñ

hadse se hadse tak zindagi ka hai safar

beach mein KHushiyan hain kuchh wo bhi ghamon ke sath hain

āsmāñ kah rahā hai apnī baat

ai zamīñ terā tajraba kyā hai

aasman kah raha hai apni baat

ai zamin tera tajraba kya hai

ajiib ḳhauf kā aalam hai apne chāroñ taraf

safar meñ lagtā hai ye āḳhirī safar to nahīñ

ajib KHauf ka aalam hai apne chaaron taraf

safar mein lagta hai ye aaKHiri safar to nahin

ab to sannāTe bhī achchhe nahīñ lagte ham ko

shor sunte the kabhī shor machāte the kabhī

ab to sannaTe bhi achchhe nahin lagte hum ko

shor sunte the kabhi shor machate the kabhi

ab aur kyā kahūñ maiñ mohabbat ke baab meñ

maiñ un ke saath huuñ jo mohabbat ke saath haiñ

ab aur kya kahun main mohabbat ke bab mein

main un ke sath hun jo mohabbat ke sath hain

kamī jo aane lagī hai hamārī vahshat meñ

hamāre haath se sahrā nikal bhī saktā hai

kami jo aane lagi hai hamari wahshat mein

hamare hath se sahra nikal bhi sakta hai

mire hī ghar meñ rahnā chāhtī hai

mohabbat dar-ba-dar hote hue bhī

mere hi ghar mein rahna chahti hai

mohabbat dar-ba-dar hote hue bhi

bahut kuchh kaam ham sab kar chuke haiñ

diloñ meñ ghar banānā rah gayā hai

bahut kuchh kaam hum sab kar chuke hain

dilon mein ghar banana rah gaya hai

shāyad jaḌoñ ke zahr ne shāḳhoñ ko chhū liyā

uḌtā huā shajar se parinda dikhā.ī de

shayad jaDon ke zahr ne shaKHon ko chhu liya

uDta hua shajar se parinda dikhai de

har sub.h nikalte haiñ yahī soch ke ghar se

bikhrī huī duniyā ko sameTeñge kisī din

har subh nikalte hain yahi soch ke ghar se

bikhri hui duniya ko sameTenge kisi din

idhar se maiñ bhī jaanā chāhtā huuñ

udhar se bhī ishāra ho gayā hai

idhar se main bhi jaana chahta hun

udhar se bhi ishaara ho gaya hai

hamāre 'ahd meñ kyoñ jahl kā hai rutba buland

shikast khaa.ī huī āgahī savāl uThā

hamare 'ahd mein kyon jahl ka hai rutba buland

shikast khai hui aagahi sawal uTha

bahut ghāTe meñ hai urdu zabāñ kyoñ

mohabbat kī zabāñ hote hue bhī

bahut ghaTe mein hai urdu zaban kyon

mohabbat ki zaban hote hue bhi

masjid mandir ke jhagḌe to hote miTte rahte haiñ

dafn haiñ jis meñ dil ke rishte us malbe kī baat kareñ

masjid mandir ke jhagDe to hote miTte rahte hain

dafn hain jis mein dil ke rishte us malbe ki baat karen

bhañvar kī samt baḌhtī jā rahī hai

ye kashtī bādbāñ hote hue bhī

bhanwar ki samt baDhti ja rahi hai

ye kashti baadban hote hue bhi

jo mire dost haiñ dushman bhī vahī haiñ mere

kis salīqe se nibhāte haiñ vo donoñ rishte

jo mere dost hain dushman bhi wahi hain mere

kis saliqe se nibhate hain wo donon rishte

'ishq meñ kāmyāb honā bhī

ik hunar hai koī mazāq nahīñ

'ishq mein kaamyab hona bhi

ek hunar hai koi mazaq nahin

sach kī raah pe chalte chalte haar ga.e har baazī ham

jin logoñ ne duniyā jiitī vo kab apne jaise the

sach ki rah pe chalte chalte haar gae har bazi hum

jin logon ne duniya jiti wo kab apne jaise the

vaqt kaisā ye aa gayā hai ab

vo bhī mashkūk haiñ jo achchhe haiñ

waqt kaisa ye aa gaya hai ab

wo bhi mashkuk hain jo achchhe hain

sab dostoñ se mujh ko ziyāda 'azīz hai

aisā bhī ek shaḳhs mire dushmanoñ meñ hai

sab doston se mujh ko ziyaada 'aziz hai

aisa bhi ek shaKHs mere dushmanon mein hai

sunā to ye hai ki aisā kabhī nahīñ hotā

huā to ye hai ki ye baar baar hotā hai

suna to ye hai ki aisa kabhi nahin hota

hua to ye hai ki ye bar bar hota hai