is parde meñ ye husn kā aalam hai ilāhī

be-parda vo ho jaa.eñ to kyā jāniye kyā ho

is parde mein ye husn ka aalam hai ilahi

be-parda wo ho jaen to kya jaaniye kya ho

terī āñkheñ jise chāheñ use apnā kar leñ

kaash aisā hī sikhā deñ koī afsūñ mujh ko

teri aankhen jise chahen use apna kar len

kash aisa hi sikha den koi afsun mujh ko

allāh allāh ḳhusūsiyyat-e-zāt-e-hasnain

saarī ummat ke haiñ potoñ se navāse baḌh kar

allah allah KHususiyyat-e-zat-e-hasnain

sari ummat ke hain poton se nawase baDh kar

dil meñ mire jigar meñ mire aañkh meñ mirī

har jā hai dost aur nahīñ miltī hai jā-e-dost

dil mein mere jigar mein mere aankh mein meri

har ja hai dost aur nahin milti hai ja-e-dost

tamām chāragaroñ se to mil chukā hai javāb

tumheñ bhī dard-e-mohabbat sunā.e dete haiñ

tamam chaaragaron se to mil chuka hai jawab

tumhein bhi dard-e-mohabbat sunae dete hain

hazrat-e-nāseh bhī mai piine lage

ab mujhe samjhāne vaalā kaun thā

hazrat-e-naseh bhi mai pine lage

ab mujhe samjhane wala kaun tha

jī meñ aatā hai ki phūloñ kī uḌā duuñ ḳhushbū

rañg uḌā laa.e haiñ zālim tirī ra.anā.ī kā

ji mein aata hai ki phulon ki uDa dun KHushbu

rang uDa lae hain zalim teri ranai ka

pārsā ban ke sū-e-mai-ḳhāna

sar jhukā.e hue ham jaate haiñ

parsa ban ke su-e-mai-KHana

sar jhukae hue hum jate hain

tasavvur ne tire ābād jab se ghar kiyā merā

nikaltā hī nahīñ din raat apne ghar meñ rahtā hai

tasawwur ne tere aabaad jab se ghar kiya mera

nikalta hi nahin din raat apne ghar mein rahta hai

jis ko chāhā tū ne us ko mil gayā

varna tujh ko paane vaalā kaun thā

jis ko chaha tu ne us ko mil gaya

warna tujh ko pane wala kaun tha

duḳht-e-raz aur tū kahāñ miltī

khīñch laa.e sharāb-ḳhāne se

duKHt-e-raz aur tu kahan milti

khinch lae sharab-KHane se

qadmoñ pe girā to haT ke bole

andhā hai to dekhtā nahīñ hai

qadmon pe gira to haT ke bole

andha hai to dekhta nahin hai

kam-sinī jin kī hameñ yaad hai aur kal kī hī baat

aaj unheñ dekhiye kyā ho ga.e kyā se baḌh kar

kam-sini jin ki hamein yaad hai aur kal ki hi baat

aaj unhen dekhiye kya ho gae kya se baDh kar

ushshāq ke aage na laḌā ġhairoñ se āñkheñ

Dar hai ki na ho jaa.e laḌā.ī tire dar par

ushshaq ke aage na laDa ghairon se aankhen

Dar hai ki na ho jae laDai tere dar par

ab to mai-ḳhānoñ se bhī kuchh baḌh kar

jaam chalte haiñ ḳhānqāhoñ meñ

ab to mai-KHanon se bhi kuchh baDh kar

jam chalte hain KHanqahon mein

intihā-e-ma.arifat se ai 'sharaf'

maiñ ne jo dekhā jo samjhā kuchh na thā

intiha-e-marifat se ai 'sharaf'

main ne jo dekha jo samjha kuchh na tha

ālam-e-ishq meñ allāh-re nazar kī vus.at

nuqta-e-vahm huā gumbad-e-gardūñ mujh ko

aalam-e-ishq mein allah-re nazar ki wusat

nuqta-e-wahm hua gumbad-e-gardun mujh ko

shaiḳh kuchh apne-āp ko samjheñ

mai-kashoñ kī nazar meñ kuchh bhī nahīñ

shaiKH kuchh apne-ap ko samjhen

mai-kashon ki nazar mein kuchh bhi nahin

duḳht-e-raz zāhid se bolī mujh se ghabrāte ho kyuuñ

kyā tumhīñ ho pāk-dāman pārsā maiñ bhī to huuñ

duKHt-e-raz zahid se boli mujh se ghabraate ho kyun

kya tumhin ho pak-daman parsa main bhi to hun

pāmāliyoñ kā ziina hai arsh se bhī ūñchā

dil us kī raah meñ hai kyā sarfarāz merā

pamaliyon ka zina hai arsh se bhi uncha

dil us ki rah mein hai kya sarfaraaz mera

hairat meñ huuñ ilāhī kyūñ-kar ye ḳhatm hogā

kotāh roz-e-mahshar qissa darāz merā

hairat mein hun ilahi kyun-kar ye KHatm hoga

kotah roz-e-mahshar qissa daraaz mera

ek ko ek nahīñ rashk se marne detā

ye nayā kūcha-e-qātil meñ tamāshā dekhā

ek ko ek nahin rashk se marne deta

ye naya kucha-e-qatil mein tamasha dekha