دل بھی اک ضد پہ اڑا ہے کسی بچے کی طرح

یا تو سب کچھ ہی اسے چاہئے یا کچھ بھی نہیں

شام کو جس وقت خالی ہاتھ گھر جاتا ہوں میں

مسکرا دیتے ہیں بچے اور مر جاتا ہوں میں

مرے دل کے کسی کونے میں اک معصوم سا بچہ

بڑوں کی دیکھ کر دنیا بڑا ہونے سے ڈرتا ہے

کسی دن زندگانی میں کرشمہ کیوں نہیں ہوتا

میں ہر دن جاگ تو جاتا ہوں زندہ کیوں نہیں ہوتا

یہاں ہر شخص ہر پل حادثہ ہونے سے ڈرتا ہے

کھلونا ہے جو مٹی کا فنا ہونے سے ڈرتا ہے

جتنی بٹنی تھی بٹ چکی یہ زمیں

اب تو بس آسمان باقی ہے

دھوکہ ہے اک فریب ہے منزل کا ہر خیال

سچ پوچھئے تو سارا سفر واپسی کا ہے

غم بک رہے تھے میلے میں خوشیوں کے نام پر

مایوس ہو کے لوٹے ہیں ہر اک دکاں سے ہم

یہ جو زندگی کی کتاب ہے یہ کتاب بھی کیا کتاب ہے

کہیں اک حسین سا خواب ہے کہیں جان لیوا عذاب ہے

کس نے پایا سکون دنیا میں

زندگانی کا سامنا کر کے

کیا جانے کس جہاں میں ملے گا ہمیں سکون

ناراض ہیں زمیں سے خفا آسماں سے ہم

ملتے نہیں ہیں اپنی کہانی میں ہم کہیں

غائب ہوئے ہیں جب سے تری داستاں سے ہم

میں نے تو بعد میں توڑا تھا اسے

آئینہ مجھ پہ ہنسا تھا پہلے

کچھ اس طرح گزارا ہے زندگی کو ہم نے

جیسے کہ خود پہ کوئی احسان کر لیا ہے

دوستوں کا کیا ہے وہ تو یوں بھی مل جاتے ہیں مفت

روز اک سچ بول کر دشمن کمانے چاہئیں

بلندی کے لیے بس اپنی ہی نظروں سے گرنا تھا

ہماری کم نصیبی ہم میں کچھ غیرت زیادہ تھی

کون پڑھتا ہے یہاں کھول کے اب دل کی کتاب

اب تو چہرے کو ہی اخبار کیا جانا ہے

نیند کو ڈھونڈ کے لانے کی دوائیں تھیں بہت

کام مشکل تو کوئی خواب حسیں ڈھونڈھنا تھا

مری اک زندگی کے کتنے حصے دار ہیں لیکن

کسی کی زندگی میں میرا حصہ کیوں نہیں ہوتا

کچھ پرندوں کو تو بس دو چار دانے چاہئیں

کچھ کو لیکن آسمانوں کے خزانے چاہئیں

بہانہ کوئی تو اے زندگی دے

کہ جینے کے لئے مجبور ہو جاؤں

دل بھی بچے کی طرح ضد پہ اڑا تھا اپنا

جو جہاں تھا ہی نہیں اس کو وہیں ڈھونڈھنا تھا

سفر میں اب کے عجب تجربہ نکل آیا

بھٹک گیا تو نیا راستہ نکل آیا

میسر مفت میں تھے آسماں کے چاند تارے تک

زمیں کے ہر کھلونے کی مگر قیمت زیادہ تھی

مسئلہ یہ نہیں کہ عشق ہوا ہے ہم کو

مسئلہ یہ ہے کہ اظہار کیا جانا ہے

کیا ایجاد جس نے بھی خدا کو

وہ خود کو کیسے بہلاتا تھا پہلے

ساتھ غالبؔ کے گئی فکر کی گہرائی بھی

اور لہجہ بھی گیا میرتقی میرؔ کے ساتھ

سب لوگ اس سے پہلے کہ دیوتا سمجھتے

ہم نے ذرا سا خود کو انسان کر لیا ہے

اب تو سراب ہی سے بجھانے لگے ہیں پیاس

لینے لگے ہیں کام یقیں کا گماں سے ہم

مری غزل میں کسی بے وفا کا ذکر نہ تھا

نہ جانے کیسے ترا تذکرہ نکل آیا

آدمی ہی کے بنائے ہوئے زنداں ہیں یہ سب

کوئی پیدا نہیں ہوتا کسی زنجیر کے ساتھ

میری آنکھیں یہ کہا کرتی ہیں اکثر مجھ سے

آپ دیکھی ہوئی چیزوں کو بہت دیکھتے ہیں

بڑی تصویر لٹکا دی ہے اپنی

جہاں چھوٹا سا آئینہ تھا پہلے

جستجو کا اک عجب سلسلہ تا عمر رہا

خود کو کھونا تھا کہیں اور کہیں ڈھونڈھنا تھا

اجازت کم تھی جینے کی مگر مہلت زیادہ تھی

ہمارے پاس مرنے کے لیے فرصت زیادہ تھی

یا خدا اب کے یہ کس رنگ میں آئی ہے بہار

زرد ہی زرد ہے پیڑوں پہ ہرا کچھ بھی نہیں

ہاتھ اٹھاتا ہے دعاؤں کو فلک بھی اس دم

جب پرندہ کوئی پرواز کو پر تولتا ہے

سوچ لو کل کہیں آنسو نہ بہانے پڑ جائیں

خون کا کیا ہے رگوں میں وہ یونہی کھولتا ہے

وہ دل سے کم زباں ہی سے زیادہ بات کرتا تھا

جبھی اس کے یہاں گہرائی کم وسعت زیادہ تھی

نئی لاشیں بچھانے کے لیے ہی

گڑے مردے اکھاڑے جا رہے ہیں