کی تلاش کا نتیجه | موضو - نظم, صفحہ rele

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "rele"

نظم کے متعلقہ نتیجہ "rele"

نظم

زندگی کے میلے میں خواہشوں کے ریلے میں
تم سے کیا کہیں جاناں اس قدر جھمیلے میں
وقت کی روانی ہے بخت کی گرانی ہے
سخت بے زمینی ہے سخت لا مکانی ہے
ہجر کے سمندر میں
تخت اور تختے کی ایک ہی کہانی ہے
تم کو جو سنانی ہے
بات گو ذرا سی ہے
بات عمر بھر کی ہے
عمر بھر کی باتیں کب دو گھڑی میں ہوتی ہیں
درد کے سمندر میں
ان گنت جزیرے ہیں بے شمار موتی ہیں
آنکھ کے دریچے میں تم نے جو سجایا تھا
بات اس دئے کی ہے
بات اس گلے کی ہے
جو لہو کی خلوت میں چور بن کے آتا ہے
لفظ کی فصیلوں پر ٹوٹ ٹوٹ جاتا ہے
زندگی سے لمبی ہے بات رت جگے کی ہے
راستے میں کیسے ہو
بات تخلیئے کی ہے
تخلیئے کی باتوں میں گفتگو اضافی ہے
پیار کرنے والوں کو اک نگاہ کافی ہے
ہو سکے تو سن جاؤ ایک روز اکیلے میں
تم سے کیا کہیں جاناں اس قدر جھمیلے ہیں

امجد اسلام امجد

نظم

کچھ لوگ
جو میرے دل کو اچھے لگتے تھے
عمروں کے ریلے میں آئے
اور جا بھی چکے
کچھ دھندوں میں مصروف ہوئے
کچھ چوہا دوڑ میں جیتے گئے
کچھ ہار گئے
کچھ قتل ہوئے
کچھ بڑھتی بھیڑ میں
اپنے آپ سے دور ہوئے
کچھ ٹوٹ گئے کچھ ڈوب گئے

بلراج کومل

نظم

کیسا سخت طوفاں تھا
کتنی تیز بارش تھی
اور میں ایسے موسم میں
جانے کیوں بھٹکتی تھی
وہ سڑک کے اس جانب
روشنی کے کھمبے سے!
سر لگائے استادہ
آنے والے گاہک کے
انتظار میں گم تھی!
خال و خد کی آرائش
بہہ رہی تھی بارش میں
تیر نوک مژگاں کے
مل گئے تھے مٹی میں
گیسوؤں کی خوش رنگی
اڑ رہی تھی جھونکوں میں
میں نے دل میں یہ سوچا
آب و باد کا ریلا!
اس کو راکھ کر دے گا
یہ سجا بنا چہرہ!
کیا ڈراؤنا ہوگا
پھر بھی اس کو لے جانا
آنے والے گاہک کا
اپنا حوصلہ ہوگا

زہرا نگاہ

نظم

گھٹ گیا اندھیرے کا آج دم اکیلے میں
ہر نظر ٹہلتی ہے روشنی کے میلے میں
آج ڈھونڈھنے پر بھی مل سکی نہ تاریکی
موت کھو گئی شاید زندگی کے ریلے میں
اس طرح سے ہنستی ہیں آج دیپ مالائیں
شوخیاں کریں جیسے ساتھ مل کے بالائیں
ہر گلی نئی دلہن ہر سڑک حسینہ ہے
ہر دیہات انگوٹھی ہے ہر نگر نگینہ ہے
پڑ گئی ہے خطرے میں آج یم کی یمراجی
موت کے بھی ماتھے پر موت کا پسینہ ہے
رات کے کروں میں ہے آج رات کا کنگن
اک سہاگنی بن کر چھائی جاتی ہے جوگن
قمقمے جلے گھر گھر روشنی ہے پٹ پٹ پر
لے کے کوئی منگل گھٹ چھا گیا ہے گھٹ گھٹ پر
روشنی کرو لیکن فرض پر نہ آنچ آئے
ہو نگاہ سیما پر اور کان آہٹ پر
ہوشیار ان سے بھی جو نگاہ پھیرے ہیں
پاک ہی نہیں تنہا اور بھی لٹیرے ہیں
چھوڑ اپنی ناپاکی یا بدل دے اپنی دھن
موت لے گا یا جیون دو میں جس کو چاہے چن
ہم ہیں کرشن کی لیلا ہم ہیں ویر بھارت کے
ہم نکل ہیں ہم سہدیو ہم ہیں بھیم ہم ارجن
دروپدیؔ سے درگھٹنا دور کر کے چھوڑیں گے
اے سمے کے دریودھن چور کر کے چھوڑیں گے
قبر ہو سمادھی ہو سب کو جگمگائیں گے
دھوم سے شہیدوں کا سوگ ہم منائیں گے
تم سے کام لینا ہے ہم کو دیپ مالاؤ
سارے دیپ کی لو سے دل کی لو بڑھائیں گے
سب سے گرمیاں لے کر سینے میں چھپانا ہے
دل کو اس دوالی سے اگنی بم بنانا ہے

نذیر بنارسی

نظم

یہ عام لوگوں کی عزتوں سے بنے
گھروندوں کی سمت آتے
ہوس کے پانی کے
بپھرے ریلے سنبھالتے ہیں

شعیب کیانی

نظم

ابھی ابھی تم کو
کسی ہوئی بھیڑ کے آخری سرے پر
دیکھا ہے اچانک
ریلے پر ریلا، دھکے پر دھکا
کہیں بھی کوئی شگاف نہیں
انسانی جسموں کی اونچی دیوار
تم تک کبھی بھی
پہنچنے نہ دے گی

فرحت احساس

نظم

سر برآوردہ صنوبر کی گھنی شاخوں میں
زندگی کتنے حقائق کو جنم دیتی ہے
دامن کوہ میں پھیلے ہوئے میدانوں پر
ذوق تخلیق نے اعجاز دکھائے ہیں لہو اگلا ہے
آسماں گردش ایام کے ریلے سے ہراساں تو نہیں
خیر مقدم کے بھی انداز ہوا کرتے ہیں
وقت کی راہ میں موڑ آتے ہیں منزل تو نہیں آ سکتی

احمد ندیم قاسمی

نظم

دنیا بنانے والے سن
میرا دل منافقت میں نہیں لگ رہا ہے
سن
میں جھوٹ کی فضا
سے اوب چکی ہوں
سن
مجھے ہلاک کر دے
مجھے تہس نہس کر دے
مجھے زلزلے میں دفن کر دے
سیلابی ریلے میں بہا دے
بم دھماکے سے اڑا دے
ہوائی فائرنگ میں مار دے
ہارٹ اٹیک میں میری جان لے لے
یا اور کسی مہلک بیماری سے مار ڈال مجھے
مجھے اس عذاب سے نکال دے بس
تیری دنیا میں دھوکے فریب اور الزام کیوں ہیں
میں حق پر ہوں تو
میں مجرم کیوں ہوں
میں سچی ہوں تو بری کیوں ہوں
سن لے ایک بار تو ہی میری
میری تو اور کوئی سنتا ہی نہیں ہے
سنتا ہے تو سمجھتا ہی نہیں ہے
سن
میں اب چپ ہونا چاہتی ہوں یا پھر
زور زور سے چیخنا چاہتی ہوں
مگر مجھے تیری دنیا والے
یہ دونوں کام نہیں کرنے دیتے ہیں
وہ کہتے ہیں کہ بولو تو ان کی مرضی کا بولو
وہ کہتے ہیں کہ اپنی آواز دھیمی رکھ کے بولو
سن
اگر تو معاف کرنے کا حوصلہ رکھتا ہے تو سن
تیری بنائی ہوئی دنیا مجھے راس نہیں آئی

مریم تسلیم کیانی

نظم

خواہشوں کی منزل پر
حسرتوں کے رستے میں
دلبری کے پربت پر
وحشتوں کی وادی میں
بے خودی کے صحرا میں
آگہی کے دریا میں
وقت کے جھمیلے میں
روز و شب کے ریلے میں
دل پہ جو گزرتی ہے
وہ اسی حقیقت کا
انکشاف کرتی ہے
ہر مقام و منزل پر
آدمی اکیلا ہے

مبین مرزا

نظم

ہم اپنے اہل سیاست کے دل سے قائل ہیں
کہ حق میں قوم کے وہ مادر مسائل ہیں
قدم قدم پہ نئے گل کھلاتے رہتے ہیں
طرح طرح کے مسائل اگاتے رہتے ہیں
کبھی یہ دھن ہے کہ صوبوں کی پھر سے ہو تشکیل
کبھی یہ ضد ہے کہ حد بندیاں نہ ہوں تبدیل
کبھی یہ شور کرو ختم چور بازاری
منافع خوروں کی لیکن نہ ہو گرفتاری
برائے بحث کھڑا ہے کبھی یہ ہنگامہ
لباس قوم کا دھوتی ہو یا کہ پاجامہ
ہر ایک بحث میں کچھ کشت و خوں ضروری ہے
نہیں تو جو بھی ہے تحریک وہ ادھوری ہے
ہر ایک فتنہ و شورش کا آخری جلوہ
مظاہرات و جلوس و تصادم و بلوہ
یونہی اٹھائی گئی بحث جب زباں کے لیے
''سخن بہانہ ہوا مرگ ناگہاں کے لیے''
وہ مسئلہ کہ جو دانش کدوں میں حل ہوتا
بلا سے آج اگر طے نہ ہوتا کل ہوتا
اسے بھی اہل سیاست نے کر لیا اغوا
اور اس کے بعد وہ سب کچھ ہوا جو ہونا تھا
نفاق و بغض و تعصب کے آ گئے ریلے
زباں کی آڑ میں اہل فساد کھل کھیلے
مخالفت میں ہوئی جا بہ جا صف آرائی
جلوس لے کے چلے اک طرف سے بلوائی
لبوں پہ غلغلۂ ''انقلاب زندہ باد''
مگر دلوں میں دبائے ہوئے شرار فساد
دکانیں لوٹی گئیں راہ گیر مارے گئے
گھروں میں آگ لگی طفل و پیر مارے گئے
وہ پہلا شخص جو کھا کر چھرے کا زخم گرا
مزے کی بات تو یہ ہے، غریب گونگا تھا
مزید یہ کہ اسے جاں سے مارنے والے
کسی زبان سے واقف نہ تھے خود ان پڑھ تھے

رضا نقوی واہی

نظم

زندگی کے میلے میں
خواہشوں کے ریلے میں
راستے پہ چلتے میں
بادلوں کو تکتے میں
چاند کے اجالے میں
تتلیوں کے ہالے میں
موسموں کی بارش میں
الفتوں میں رنجش میں
بے بسی کے عالم میں
بے دلی کے موسم میں
محفلوں میں کونے میں
ہنسنے اور رونے میں
رات کے اندھیرے میں
شام میں سویرے میں
دھڑکنوں کی الجھن میں
پت جھڑوں میں ساون میں
خامشی کی سرگم میں
ہر خوشی میں ہر غم میں
مجھ کو تیری یاد آئے
مجھ کو تیری یاد آئے

سحر علیگ

نظم

مجھے بتاؤ کہ میں کہاں ہوں
مجھے سمجھاؤ میں کون ہوں کیا ہوں اور کیوں ہوں
میں بے بصر بے خبر
سفر کی بے رحم ساعتوں کا اسیر
ان راستوں کا راہی
کہ جن کا ہر سنگ میل بے چہرہ بے نشاں ہے
خزاں زدہ برگ خشک
اندھی ہوا کے پر شور بے سماعت بپھرتے ریلے
کی رہ گزر پر
میں ان گنت بے شمار سالوں سے
نارسائی کے کرب سے دل شکستہ اور پا فگار راہی
کہ جس کی ہر سعی بے ثمر نے
کہ جس کی ہر کاوش سفر نے
کچھ اور منزل کے فاصلوں کو بڑھا دیا ہے
مثال میرے سفر کی تمثیل آل موسیٰ
کہ اپنے دشت عمل میں اپنی سیاہ بختی کا ہاتھ پکڑے
رواں دواں ہوں کئی زمانوں سے
اور جب بھی ٹھہر کے کچھ دیکھتا ہوں اپنے سفر کا حاصل
تو کوئی منزل نہ راہ منزل
چلا تھا میں جس جگہ سے اب بھی وہاں کھڑا ہوں
مجھے بتاؤ کہ میں کہاں ہوں
مجھے سجھاؤ میں کون ہوں کیا ہوں اور کیوں ہوں
مرے بدن پر نہ میرا چہرہ
نہ میرے منہ میں زبان میری
نہ میری آنکھیں نہ کان میرے
میں اجنبی جسم کے حوالے سے اپنی پہچان کا ہوں عادی
نہ سوچ میری نہ ذہن میرا
نہ فکر میری نہ مجھ کو اپنا شعور ذاتی
مرے تشخص کے واسطے میرے محسن و چارہ ساز لاتے
رہے ہیں برسوں
حسیں حسیں خوش لباس سرخ و سفید چہرے
کوئی مصر ہے سفید چہرہ مرے بدن پر بہار دے گا
کسی کو اصرار سرخ چہرہ بہت سجے گا
حسیں حسیں خوش لباس چہروں کی یورش بے پنہہ کے ہاتھوں
میں اپنا چہرہ بھلا چکا ہوں
میں اپنی پہچان کھو چکا ہوں
مجھے دکھاؤ تو میرا چہرہ
کہ میں بھی جانوں
کہ میں بھی سمجھوں
میں کیسا لگتا ہوں آئنے میں
کہ میری پہچان مستقل ہو
میں اپنے ہی جسم کے حوالے سے اپنی پہچان تو کراؤں
میں کون ہوں کیا ہوں اور کیوں ہوں
سوال اول سوال آخر
مری ہر اک سمت آج لکھا ہوا ہے حرف سوال دیکھو
سوال جو سوچ کی کرن ہے
سوال جو آگہی کا زینہ ہے خود شناسی کا اک چلن ہے
مجھے بتاؤ
جواب کتنا ہی تلخ ہو اس کو میں سنوں گا
مجھے پلاؤ
میں قطرہ قطرہ یہ زہر خود آگہی پیوں گا
کہ اس طرح وہ جو میں نہیں ہوں
یہ زہر پی کر مٹے تو شاید میں دیکھ پاؤں
اسے جو میں ہوں

اکمل مبارک گیلانی

نظم

پودے نہیں اکیلے
چھایا ہے ان کی سنگی ساتھی
پر آتما اکیلی
وادی کی گود میں چاند
درپن اچھالتا ہے
چاندی کا جگمگاتا
وہ جھلملاتا منڈوا
خوشہ سا کھل اٹھا ہے
اس میں جنونی تارا
پربت نہیں اکیلے چلتے
چلتے ہیں ساتھ ان کے
وحشی ہوا کے جھونکے ریلے
پر آتما اکیلی
گاتی ہے جب یہ دھرتی
ساتھ اس کے گونجتی ہے
اک صورت سرمدی بھی
ساگر لہر لہر میں
بیلا چرا رہا ہے
نر ناری کے ملن کی
دریا نہیں اکیلے بہتے
بہتی ہیں ساتھ ان کے
موجیں
ان کی
پر آتما اکیلی

شفیق فاطمہ شعریٰ

نظم

نظمیں مجھ کو ڈھونڈ رہی ہیں
لیکن شاید
میں تو قبرستان کا رستہ بھول گئی ہوں
اور اپنے بوسیدہ اور مردہ خوابوں کو
اپنے ہی کاندھے پہ اٹھائے
قریہ قریہ گھوم رہی ہوں
یہ بھی یاد نہیں ہے مجھ کو
ماضی اک آسیب زدہ ویران کھنڈر ہے
حال فقط پرکار کی گردش
مستقبل اک بہلاوا ہے
تینوں دریا ایک سمندر میں گرتے ہیں
نظمیں مجھ کو ڈھونڈ رہی ہیں
لیکن میں امکان کا رستہ بھول گئی ہوں
یہ بھی یاد نہیں ہے مجھ کو
دکھ کے ریلے میں اکثر
تخلیق کی کڑیاں کھو جاتی ہیں
نظمیں بھی گم ہو جاتی ہیں

رخسانہ صبا

نظم

یہ زندگی وہ سمندر ہے جس کے ریلے میں
بہے ہی جاتے ہیں انسان خار و خس کی طرح
مگر حیات کی رنگینیوں پہ مرتے ہیں
رقیق شہد میں ڈوبی ہوئی مگس کی طرح

دھرم پال عاقل

نظم

سیرابی کے اس ریلے نے لک چھپ کیسی راس رچائی
ہاتھوں بیٹھ وہ برکھا چہرہ پھول سریکھا کھل اٹھا ہے
گھپ رنگوں کے گھاٹ اترتی ریچھ کی یہ ادھلی سرسائی
دل کی اجلی بے سرو سامانی اس میں کیا کیا ٹھاٹ چھپا ہے
جیتے جی اس چہل پہل کی تہ تک کب ہوتی ہے رسائی

صلاح الدین پرویز

نظم

ساری دھرتی جاگ رہی تھی
میں خوش تھا ہو بالک جیسے
چھوڑ کے بارش کے ریلے میں
ننھی سی کاغذ کی کشتی

راج نرائن راز

نظم

ٹی وی پر اک خبر چلی ہے
شہر کی جانب
بڑھنے والے سیلابی ریلے کا رخ
گاؤں کی جانب موڑ دیا ہے
گاؤں میں بیٹھے اک دیہاتی نے غصے میں
اپنا ٹی وی توڑ دیا ہے

عمران شمشاد نرمی

نظم

درد کی رات پھر آ گئی
میرے پاؤں کی زنجیر پھر جانے مجھ کو کہاں لے چلے گی
کبھی شہر کی نیم روشن سی ویران گلیاں
خمیدہ سی دیوار کے سائے سائے
میں پاؤں میں کنکر چبھوتا چلوں گا
کبھی چوڑی چکی سی بل کھاتی سڑکوں کی
ہنستی ہوئی رونقوں میں
سلگتی ہوئی خوشبوؤں کی جنوں خیز لہروں کے ریلے میں
بے بس اڑوں گا
کھلی بارکوں میں
درختوں کے چمکیلے پتوں پہ گرتی ہوئی روشنی میں
کبھی چاند کے نیلگوں سائے میں بیٹھ کر
درد کے تیز کانٹے نکالوں گا چپ چاپ
بجھتی ہوئی رات کے آخری پہر میں
سونے بستر کی ڈستی ہوئی ناگنوں پر
میں بھوکے بدن کو رلاتا رہوں گا

نظم

آنکھ کے آبنائے میں
ڈوبا مچھیرا نہ جانے
فلک تاز دھارے میں
گاتی نہاتی ہوئی سرخ لڑکی کی جاں
اس مچھیرے میں ہے
لڑکی کے گیتوں میں
لنگر انداز کشتی ہے
لہروں کی کروٹ ہے
ساحل کا پھل ہے
مچھیرے کی تازہ جوانی ہے
مستی بھرا نیلا پانی ہے
لڑکی امنڈتی ہوئی وقت کی دھار ہے
جس کے ریلے سے
محشر بپا کرتی لہریں نکلتی ہیں
لڑکی سمندر ہے
گہرے سمندر کی گھمبیر خاموشی
پانی سے اڑتی ہوئی ڈاریں
چکنے کنارے
ہر اک چیز لڑکی کے گیتوں کے اندر ہے
لڑکی پرندہ ہے آبی پرندہ
سمندر کے بے انت سینے پہ
اڑتا ہے صدیوں سے
صدیوں سے لمبی معمر چٹانوں سے جڑتا ہے
مڑتا ہے واپس
سمندر کے بے انت پھیلاؤ کی سمت
لڑکی کوئی معجزہ ہے
سمندر میں جوں ہی اترتی ہے
پانی کو رنگین کرتی ہے
لہروں کی چادر کو اوپر اٹھاتی ہے
نیچے سے موتی کے انبار لاتی ہے
موتی اٹھاتے ہوئے گیت گاتی ہے
لڑکی کے گیتوں کے معنی
فقط اس مچھیرے پہ روشن ہیں
جو آنکھ کے آبنائے میں ڈوبا پڑا ہے

اقتدار جاوید

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے