Sher on Aib

na thī haal kī jab hameñ apne ḳhabar rahe dekhte auroñ ke aib o hunar

paḌī apnī burā.iyoñ par jo nazar to nigāh meñ koī burā na rahā

na thi haal ki jab hamein apne KHabar rahe dekhte auron ke aib o hunar

paDi apni buraiyon par jo nazar to nigah mein koi bura na raha

shart salīqa hai har ik amr meñ

aib bhī karne ko hunar chāhiye

shart saliqa hai har ek amr mein

aib bhi karne ko hunar chahiye

hamāre aib ne be-aib kar diyā ham ko

yahī hunar hai ki koī hunar nahīñ aatā

hamare aib ne be-aib kar diya hum ko

yahi hunar hai ki koi hunar nahin aata

husn ye hai ki dilrubā ho tum

aib ye hai ki bevafā ho tum

husn ye hai ki dilruba ho tum

aib ye hai ki bewafa ho tum

sab kī tarah tū ne bhī mire aib nikāle

tū ne bhī ḳhudāyā mirī niyyat nahīñ dekhī

sab ki tarah tu ne bhi mere aib nikale

tu ne bhi KHudaya meri niyyat nahin dekhi

ḳhush-nasībī meñ hai yahī ik aib

bad-nasīboñ ke ghar nahīñ aatī

KHush-nasibi mein hai yahi ek aib

bad-nasibon ke ghar nahin aati

dost har aib chhupā lete haiñ

koī dushman bhī tirā hai ki nahīñ

dost har aib chhupa lete hain

koi dushman bhi tera hai ki nahin

maiñ us ke aib us ko batātā bhī kis tarah

vo shaḳhs aaj tak mujhe tanhā nahīñ milā

main us ke aib us ko batata bhi kis tarah

wo shaKHs aaj tak mujhe tanha nahin mila

ham ko aapas meñ mohabbat nahīñ karne dete

ik yahī aib hai is shahr ke dānāoñ meñ

hum ko aapas mein mohabbat nahin karne dete

ek yahi aib hai is shahr ke danaon mein

kisī ke aib chhupānā savāb hai lekin

kabhī kabhī koī parda uThānā paḌtā hai

kisi ke aib chhupana sawab hai lekin

kabhi kabhi koi parda uThana paDta hai

ik din vo mere aib gināne lagā 'farāġh'

jab ḳhud hī thak gayā to mujhe sochnā paḌā

ek din wo mere aib ginane laga 'faragh'

jab KHud hi thak gaya to mujhe sochna paDa

sach hai is ek parde meñ chhupte haiñ laakh aib

ya.anī janāb-e-shaiḳh kī dāḌhī darāz hai

sach hai is ek parde mein chhupte hain lakh aib

yani janab-e-shaiKH ki daDhi daraaz hai

hamāre aib meñ jis se madad mile ham ko

hameñ hai aaj kal aise kisī hunar kī talāsh

hamare aib mein jis se madad mile hum ko

hamein hai aaj kal aise kisi hunar ki talash

tesha-ba-kaf ko ā.ina-gar kah diyā gayā

jo aib thā use bhī hunar kah diyā gayā

tesha-ba-kaf ko aaina-gar kah diya gaya

jo aib tha use bhi hunar kah diya gaya

'qā.em' maiñ iḳhtiyār kiyā shā.irī kā aib

pahuñchā na koī shaḳhs jab apne hunar talak

'qaem' main iKHtiyar kiya shairi ka aib

pahuncha na koi shaKHs jab apne hunar talak