ye iltijā duā ye tamannā fuzūl hai

sūkhī nadī ke paas samundar na jā.egā

ye iltija dua ye tamanna fuzul hai

sukhi nadi ke pas samundar na jaega

ab diloñ meñ koī gunjā.ish nahīñ miltī 'hayāt'

bas kitāboñ meñ likkhā harf-e-vafā rah jā.egā

ab dilon mein koi gunjaish nahin milti 'hayat'

bas kitabon mein likkha harf-e-wafa rah jaega

chehre ko tere dekh ke ḳhāmosh ho gayā

aisā nahīñ savāl tirā lā-javāb thā

chehre ko tere dekh ke KHamosh ho gaya

aisa nahin sawal tera la-jawab tha

silsila ḳhvāboñ kā sab yūñhī dharā rah jā.egā

ek din bistar pe koī jāgtā rah jā.egā

silsila KHwabon ka sab yunhi dhara rah jaega

ek din bistar pe koi jagta rah jaega

ḳhudā ke vāste mohr-e-sukūt toḌ bhī de

tamām shahr tirī guftugū kā pyāsā hai

KHuda ke waste mohr-e-sukut toD bhi de

tamam shahr teri guftugu ka pyasa hai

ye jazba-e-talab to mirā mar na jā.egā

tum bhī agar miloge to jī bhar na jā.egā

ye jazba-e-talab to mera mar na jaega

tum bhi agar miloge to ji bhar na jaega

mudda.ā ham apnā kāġhaz par raqam kar jā.eñge

vaqt ke hāthoñ meñ apnā faislā rah jā.egā

muddaa hum apna kaghaz par raqam kar jaenge

waqt ke hathon mein apna faisla rah jaega

har sadā se bach ke vo ehsās-e-tanhā.ī meñ hai

apne hī dīvār-o-dar meñ gūñjtā rah jā.egā

har sada se bach ke wo ehsas-e-tanhai mein hai

apne hi diwar-o-dar mein gunjta rah jaega