تمہیں منانے کا مجھ کو خیال کیا آئے

کہ اپنے آپ سے روٹھا ہوا تو میں بھی ہوں

پھول مہکیں گے یوں ہی چاند یوں ہی چمکے گا

تیرے ہوتے ہوئے منظر کو حسیں رہنا ہے

میں اپنی پیاس میں کھویا رہا خبر نہ ہوئی

قدم قدم پہ وہ دریا پکارتا تھا مجھے

جو خواب کی دہلیز تلک بھی نہیں آیا

آج اس سے ملاقات کی صورت نکل آئی

دل کی جاگیر میں میرا بھی کوئی حصہ رکھ

میں بھی تیرا ہوں مجھے بھی تو کہیں رہنا ہے

وہ ہو نہ سکا اپنا تو ہم ہو گئے اس کے

اس شخص کی مرضی ہی میں ڈھالے ہوئے ہم ہیں

دن بھر کے جھمیلوں سے بچا لایا تھا خود کو

شام آتے ہی اشفاقؔ میں ٹوٹا ہوا کیوں ہوں

بہت چھوٹا سا دل اور اس میں اک چھوٹی سی خواہش

سو یہ خواہش بھی اب نیلام کرنے کے لیے ہے

کھل کر تو وہ مجھ سے کبھی ملتا ہی نہیں ہے

اور اس سے بچھڑ جانے کا امکان ہے یوں بھی

تلاش اپنی خود اپنے وجود کو کھو کر

یہ کار عشق ہے اس میں لگا تو میں بھی ہوں

لفظوں میں ہر اک رنج سمونے کا قرینہ

اس آنکھ میں ٹھہرے ہوئے پانی سے ملا ہے

ٹوٹے ہوئے لوگ ہیں سلامت

یہ نقل مکانی کا معجزہ ہے

کام جو عمر رواں کا ہے اسے کرنے دے

میری آنکھوں میں سدا تجھ کو حسیں رہنا ہے

دل میں سو تیر ترازو ہوئے تب جا کے کھلا

اس قدر سہل نہ تھا جاں سے گزرنا میرا

کوئی گھر ہی نہیں تو بے گھری کا زخم کیسا

سکونت کے لیے اک استعارہ ڈھونڈتے ہیں

کون ہیں وہ جنہیں آفاق کی وسعت کم ہے

یہ سمندر نہ یہ دریا، نہ یہ صحرا میرا