ہوا سے کہہ دو کہ کچھ دیر کو ٹھہر جائے

خجل ہماری عبارت ہوا سے ہوتی ہے

مری مشکل مری مشکل نہیں ہے

وسیلہ تیری آسانی کا میں ہوں

عزیزو آؤ اب اک الوداعی جشن کر لیں

کہ اس کے بعد اک لمبا سفر افسوس کا ہے

آج دریا میں عجب شور عجب ہلچل ہے

کس کی کشتی نے قدم آب رواں پر رکھا

ہمیں ہر وقت یہ احساس دامن گیر رہتا ہے

پڑے ہیں ڈھیر سارے کام اور مہلت ذرا سی ہے

روز دیوار میں چن دیتا ہوں میں اپنی انا

روز وہ توڑ کے دیوار نکل آتی ہے

ہر ایک عہد نے لکھا ہے اپنا نامۂ شوق

کسی نے خوں سے لکھا ہے کسی نے آنسو سے

طلبؔ بڑی ہی اذیت کا کام ہوتا ہے

بکھرتے ٹوٹتے رشتوں کا بوجھ ڈھونا بھی

کبھی دماغ کو خاطر میں ہم نے لایا نہیں

ہم اہل دل تھے ہمیشہ رہے خسارے میں

کہ ہم بنے ہی نہ تھے ایک دوسرے کے لیے

اب اس یقین کو جینا حیات کرتے ہوئے

ہوا تو ہے ہی مخالف مجھے ڈراتا ہے کیا

ہوا سے پوچھ کے کوئی دیئے جلاتا ہے کیا

اس نے آ کر ہاتھ ماتھے پر رکھا

اور منٹوں میں بخار اڑتا ہوا

آئیے بیچ کی دیوار گرا دیتے ہیں

کب سے اک مسئلہ بے کار میں الجھا ہوا ہے

سب ایک دھند لیے پھر رہے ہیں آنکھوں میں

کسی کے چہرے پہ ماضی نہ حال دیکھتا ہوں

بہت نقصان ہوتا ہے

زیادہ ہوشیاری میں

خدا نے بخشا ہے کیا ظرف موم بتی کو

پگھلتے رہنا مگر ساری رات چپ رہنا

سب نے دیکھا اور سب خاموش تھے

ایک صوفی کا مزار اڑتا ہوا

زمینیں تنگ ہوئی جا رہی ہیں دل کی طرح

ہم اب مکان نہیں مقبرہ بناتے ہیں

کوئی چراغ جلاتا نہیں سلیقے سے

مگر سبھی کو شکایت ہوا سے ہوتی ہے

کہیں بھی جائیں کسی شہر میں سکونت ہو

ہم اپنی طرز کی آب و ہوا بناتے ہیں

زندگی میں جو تمہیں خود سے زیادہ تھے عزیز

ان سے ملنے کیا کبھی جاتے ہو قبرستان بھی