mil-milā ke donoñ ne dil ko kar diyā barbād

husn ne kiyā be-ḳhud ishq ne kiyā āzād

mil-mila ke donon ne dil ko kar diya barbaad

husn ne kiya be-KHud ishq ne kiya aazad

naqsh-e-qadam haiñ raah meñ farhād-o-qais ke

ai ishq khīñch kar mujhe laayā idhar kahāñ

naqsh-e-qadam hain rah mein farhad-o-qais ke

ai ishq khinch kar mujhe laya idhar kahan

sher kyā hai aah hai yā vaah hai

jis se har dil kī ubhar aatī hai choT

sher kya hai aah hai ya wah hai

jis se har dil ki ubhar aati hai choT

yuuñ to har diin meñ hai sāhab-e-īmāñ honā

ham ko ik but ne sikhāyā hai musalmāñ honā

yun to har din mein hai sahab-e-iman hona

hum ko ek but ne sikhaya hai musalman hona

azal se ham-nafasī hai jo jān-e-jāñ se hameñ

payām dam-ba-dam aatā hai lā-makāñ se hameñ

azal se ham-nafasi hai jo jaan-e-jaan se hamein

payam dam-ba-dam aata hai la-makan se hamein

kitāb-e-dars-e-majnūñ mus.haf-e-ruḳhsār-e-lailā hai

harīf-e-nukta-dān-e-ishq ko maktab se kyā matlab

kitab-e-dars-e-majnun mushaf-e-ruKHsar-e-laila hai

harif-e-nukta-dan-e-ishq ko maktab se kya matlab

ġham-e-maujūd ġhalat aur ġham-e-fardā bātil

rāhat ik ḳhvāb hai jis kī koī tābīr nahīñ

gham-e-maujud ghalat aur gham-e-farda baatil

rahat ek KHwab hai jis ki koi tabir nahin

vā hote haiñ mastī meñ ḳharābāt ke asrār

rindī mirā īmān hai mastī hai mirā farz

wa hote hain masti mein KHarabaat ke asrar

rindi mera iman hai masti hai mera farz

thā anal-haq lab-e-mansūr pe kyā aap se aap

thā jo parde meñ chhupā bol uThā aap se aap

tha anal-haq lab-e-mansur pe kya aap se aap

tha jo parde mein chhupa bol uTha aap se aap

ahd-e-mīsāq kā lāzim hai adab ai vaa.iz

hai ye paimān-e-vafā rishta-e-zunnār na toḌ

ahd-e-misaq ka lazim hai adab ai waiz

hai ye paiman-e-wafa rishta-e-zunnar na toD

jo lā-maz.hab ho us ko millat-o-mashrab se kyā matlab

mirā mashrab hai rindī riñd ko maz.hab se kyā matlab

jo la-mazhab ho us ko millat-o-mashrab se kya matlab

mera mashrab hai rindi rind ko mazhab se kya matlab

ai parī-rū tire dīvāne kā īmāñ kyā hai

ik nigāh-e-ġhalat-andāz pe qurbāñ honā

ai pari-ru tere diwane ka iman kya hai

ek nigah-e-ghalat-andaz pe qurban hona

maiñ dīvāna huuñ aur dair-o-haram se mujh ko vahshat hai

paḌī rahne do mere paañv meñ zanjīr-e-mai-ḳhāna

main diwana hun aur dair-o-haram se mujh ko wahshat hai

paDi rahne do mere panw mein zanjir-e-mai-KHana

kyā shauq kā aalam thā ki hāthoñ se uḌā ḳhat

dil thaam ke us shoḳh ko likhne jo lagā ḳhat

kya shauq ka aalam tha ki hathon se uDa KHat

dil tham ke us shoKH ko likhne jo laga KHat

pābandī-e-ahkām-e-sharī.at hai vahāñ farz

rindoñ ko ruḳh-e-sāqī-o-sāġhar hue maḳhsūs

pabandi-e-ahkaam-e-shariat hai wahan farz

rindon ko ruKH-e-saqi-o-saghar hue maKHsus

hai sanam-ḳhāna mirā paimān-e-ishq

zauq-e-mai-ḳhāna mujhe sāmān-e-ishq

hai sanam-KHana mera paiman-e-ishq

zauq-e-mai-KHana mujhe saman-e-ishq

aate hue is tan meñ na jaate hue tan se

hai jān-e-makīñ ko na lagāvaT na rukāvaT

aate hue is tan mein na jate hue tan se

hai jaan-e-makin ko na lagawaT na rukawaT

ham gadā-e-dar-e-mai-ḳhāna haiñ ai pīr-e-muġhāñ

kaam apnā tire sadqe meñ chalā lete haiñ

hum gada-e-dar-e-mai-KHana hain ai pir-e-mughan

kaam apna tere sadqe mein chala lete hain

kaunain-e-ain-e-ilm meñ hai jalva-gāh-e-husn

jeb-e-ḳhirad se ainak-e-irfāñ nikāliye

kaunain-e-ain-e-ilm mein hai jalwa-gah-e-husn

jeb-e-KHirad se ainak-e-irfan nikaliye

be-nishāñ sāhir nishāñ meñ aa ke shāyad ban gayā

lā-makāñ ho kar makāñ meñ ḳhud makīñ hotā rahā

be-nishan sahir nishan mein aa ke shayad ban gaya

la-makan ho kar makan mein KHud makin hota raha

qadam hai ain hudūs aur hudūs ain qadam

jo tū na jalve meñ aatā to maiñ kahāñ hotā

qadam hai ain hudus aur hudus ain qadam

jo tu na jalwe mein aata to main kahan hota

qulzum-e-fikr meñ hai kashtī-e-īmāñ sālim

nā-ḳhudā husn hai aur ishq hai lañgar apnā

qulzum-e-fikr mein hai kashti-e-iman salim

na-KHuda husn hai aur ishq hai langar apna

ayaañ 'alīm' se hai jism-o-jān kā ilhāq

makīñ makāñ meñ na hotā to lā-makāñ hotā

ayan 'alim' se hai jism-o-jaan ka ilhaq

makin makan mein na hota to la-makan hota