mohabbat karne vaale dard meñ tanhā nahīñ hote

jo rūThoge kabhī mujh se to apnā dil dukhāoge

mohabbat karne wale dard mein tanha nahin hote

jo ruThoge kabhi mujh se to apna dil dukhaoge

zindagī sundar ġhazal hai dosto

zindagī ko gungunānā chāhiye

zindagi sundar ghazal hai dosto

zindagi ko gungunana chahiye

maiñ jī bhar ke royā to ārām aayā

mirā ġham hī āḳhir mire kaam aayā

main ji bhar ke roya to aaram aaya

mera gham hi aaKHir mere kaam aaya

dukh pe mere ro rahā thā jo bahut

jaate jaate kah gayā achchhā huā

dukh pe mere ro raha tha jo bahut

jate jate kah gaya achchha hua

dekhnā kaise pighalte jāoge

jab mirī āġhosh meñ tum aaoge

dekhna kaise pighalte jaoge

jab meri aaghosh mein tum aaoge

ham lakīreñ kured kar dekheñ

rañg lā.egā kyā ye saal nayā

hum lakiren kured kar dekhen

rang laega kya ye sal naya

ham ne mil-jul ke guzāre the jo din achchhe the

lamhe vo phir se jo aate to bahut achchhā thā

hum ne mil-jul ke guzare the jo din achchhe the

lamhe wo phir se jo aate to bahut achchha tha

niilā ambar chāñd sitāre bachchoñ kī jāgīreñ haiñ

apnī duniyā meñ to bas dīvāreñ hī zanjīreñ haiñ

nila ambar chand sitare bachchon ki jagiren hain

apni duniya mein to bas diwaren hi zanjiren hain

dekhā na tujhe ai rab ham ne haañ duniyā terī dekhī hai

saḌkoñ par bhūke bachche bhī koThe par abla naarī bhī

dekha na tujhe ai rab hum ne han duniya teri dekhi hai

saDkon par bhuke bachche bhi koThe par abla nari bhi

jo huā jaisā huā achchhā huā

jab jahāñ jo ho gayā achchhā huā

jo hua jaisa hua achchha hua

jab jahan jo ho gaya achchha hua

sabr kī takrār thī josh o junūn-e-ishq se

zindagī bhar dil mujhe maiñ dil ko samjhātā rahā

sabr ki takrar thi josh o junun-e-ishq se

zindagi bhar dil mujhe main dil ko samjhata raha

'āzim' terī barbādī meñ sab ne mil-jul kar kaam kiyā

kuchh khel lakīroñ kā bhī hai kuchh vaqt kī kār-guzārī bhī

'azim' teri barbaadi mein sab ne mil-jul kar kaam kiya

kuchh khel lakiron ka bhi hai kuchh waqt ki kar-guzari bhi

aadmī ko chāhiye taufīq chalne kī faqat

kuchh nahīñ to guzre vaqtoñ kā dhuāñ le kar chale

aadmi ko chahiye taufiq chalne ki faqat

kuchh nahin to guzre waqton ka dhuan le kar chale

baat chal niklegī phir iqrār kī inkār kī

phir vahī bachpan ke bhūle giit gaa.e jā.eñge

baat chal niklegi phir iqrar ki inkar ki

phir wahi bachpan ke bhule git gae jaenge

rañg aa jaatā thā un kī diid se ruḳh par mire

dekh kar ab vo bhī mujh ko surḳh-rū hone lage

rang aa jata tha un ki did se ruKH par mere

dekh kar ab wo bhi mujh ko surKH-ru hone lage

kaun bāñdhegā mirī bikhrī huī ummīd ko

khul rahā hai ab to har halqa mirī zanjīr kā

kaun bandhega meri bikhri hui ummid ko

khul raha hai ab to har halqa meri zanjir ka

ye kyā huā ki ab tujhī se bad-gumāñ maiñ ho gayā

maiñ sochtā thā zindagī tū mujh ko raas aa ga.ī

ye kya hua ki ab tujhi se bad-guman main ho gaya

main sochta tha zindagi tu mujh ko ras aa gai

vo jaate jaate mujhe apne ġham bhī sauñp gayā

ajiib Dhañg nikālā hai ġham-gusārī kā

wo jate jate mujhe apne gham bhi saunp gaya

ajib Dhang nikala hai gham-gusari ka

mujhe ayyāriyāñ sab aa ga.ī haiñ

maiñ ab tere nagar kā ho gayā huuñ

mujhe ayyariyan sab aa gai hain

main ab tere nagar ka ho gaya hun

mire har zaḳhm par ik dāstāñ thī us ke zulmoñ kī

mire ḳhūñ-bār dil par us ke hāthoñ kā nishāñ bhī thā

mere har zaKHm par ek dastan thi us ke zulmon ki

mere KHun-bar dil par us ke hathon ka nishan bhi tha

kaun jaane kis ghaḌī yaañ kyā se kyā ho kar rahe

ḳhauf sā ik darmiyāñ hotā hai tere shahr meñ

kaun jaane kis ghaDi yan kya se kya ho kar rahe

KHauf sa ek darmiyan hota hai tere shahr mein