ہم نے گھر کی سلامتی کے لئے

خود کو گھر سے نکال رکھا ہے

تو اپنی مرضی کے سبھی کردار آزما لے

مرے بغیر اب تری کہانی نہیں چلے گی

نکل آیا ہوں آگے اس جگہ سے

جہاں سے لوٹ جانا چاہیے تھا

ہم ان کی آس پہ عمریں گزار دیتے ہیں

وہ معجزے جو کبھی رونما نہیں ہوتے

لہجے اور آواز میں رکھا جاتا ہے

اب تو زہر الفاظ میں رکھا جاتا ہے

ذرا سی دیر تجھے آئنہ دکھایا ہے

ذرا سی بات پر اتنے خفا نہیں ہوتے

اسی نے سب سے پہلے ہار مانی

وہی سب سے دلاور لگ رہا تھا

ہمیں روکو نہیں ہم نے بہت سے کام کرنے ہیں

کسی گل میں مہکنا ہے کسی بادل میں رہنا ہے

ہمارے نام کی تختی بھی ان پہ لگ نہ سکی

لہو میں گوندھ کے مٹی جو گھر بنائے گئے

یہ شخص جو تجھے آدھا دکھائی دیتا ہے

اس آدھے شخص کو اپنا بنا کے دیکھ کبھی

سمجھ میں آ تو سکتی ہے صبا کی گفتگو بھی

مگر اس کے لیے معصوم ہونا لازمی ہے

دشت شب میں پتا ہی نہیں چل سکا

اپنی آنکھیں گئیں یا ستارے گئے

اس لیے میں نے محافظ نہیں رکھے اپنے

مرے دشمن مرے اس جسم سے باہر کم ہیں

ہوا کو ضد کہ اڑائے گی دھول ہر صورت

ہمیں یہ دھن ہے کہ آئینہ صاف کرنا ہے

میں اس کا نام لے بیٹھا تھا اک دن

زمانے کو بہانہ چاہئے تھا

ایک لمحے کو سہی اس نے مجھے دیکھا تو ہے

آج کا موسم گزشتہ روز سے اچھا تو ہے

کسی کی ذات میں ضم ہو گیا ہوں

میں اپنے آپ میں غم ہو گیا ہوں

جب بھی چاہوں تیرا چہرا سوچ سکوں

بس اتنی سی بات مرے امکان میں رکھ

بے خوابی کب چھپ سکتی ہے کاجل سے بھی

جاگنے والی آنکھ میں لالی رہ جاتی ہے

دیر لگتی ہے بہت لوٹ کے آتے آتے

اور وہ اتنے میں ہمیں بھول چکا ہوتا ہے

لوگو ہم تو ایک ہی صورت میں ہتھیار اٹھاتے ہیں

جب دشمن ہو اپنے جیسا خود سر بھی اور ہمسر بھی

سارے منظر میں سمایا ہوا لگتا ہے مجھے

کوئی اس شہر میں آیا ہوا لگتا ہے مجھے

اے شہر ستم چھوڑ کے جاتے ہوئے لوگو

اب راہ میں کوئی بھی مدینہ نہیں آتا

صبح کیسی ہے وہاں شام کی رنگت کیا ہے

اب ترے شہر میں حالات کی صورت کیا ہے

میں جس لمحے کو زندہ کر رہا ہوں مدتوں سے

وہی لمحہ مرا انکار کرنا چاہتا ہے

دونوں ہاتھوں سے چھپا رکھا ہے منہ

آئنے کے وار سے ڈرتا ہوں میں

جو زندگی کی مانگ سجاتے رہے سدا

قسطوں میں بانٹ کر انہیں جینا دیا گیا

آج نکلے یاد کی زنبیل سے

مور کے ٹوٹے ہوئے دو چار پر

اتنا بھی انحصار مرے سائے پر نہ کر

کیا جانے کب یہ موم کی دیوار گر پڑے

کبھی اس سے دعا کی کھیتیاں سیراب کرنا

جو پانی آنکھ کے اندر کہیں ٹھہرا ہوا ہے

شب بھر آنکھ میں بھیگا تھا

پورے دن میں سوکھا خواب

اسے بام پذیرائی پہ کیسے چھوڑ دوں اب

یہی تنہائی تو میرے لیے سیڑھی بنی ہے

میرے ہرے وجود سے پہچان اس کی تھی

بے چہرہ ہو گیا ہے وہ جب سے جھڑا ہوں میں

غزل اس کے لئے کہتے ہیں لیکن درحقیقت ہم

گھنے جنگل میں کرنوں کے لئے رستہ بناتے ہیں