nazar kahīñ hai muḳhātab kisī se haiñ dil meñ

javāb kis ko milā hai savāl kis kā thā

nazar kahin hai muKHatab kisi se hain dil mein

jawab kis ko mila hai sawal kis ka tha

ho liye jis ke ho liye 'beḳhud'

yaar apnā to ye hisāb rahā

ho liye jis ke ho liye 'beKHud'

yar apna to ye hisab raha

unheñ to sitam kā mazā paḌ gayā hai

kahāñ kā tajāhul kahāñ kā taġhāful

unhen to sitam ka maza paD gaya hai

kahan ka tajahul kahan ka taghaful

milā ke ḳhaak meñ sarmāya-e-dil-e-'beḳhud'

vo pūchhte haiñ batāo ye maal kis kā thā

mila ke KHak mein sarmaya-e-dil-e-'beKHud'

wo puchhte hain batao ye mal kis ka tha

aa.ina dekh ke ḳhurshīd pe karte haiñ nazar

phir chhupā lete haiñ vo chehra-e-anvar apnā

aaina dekh ke KHurshid pe karte hain nazar

phir chhupa lete hain wo chehra-e-anwar apna

qayāmat hai tirī uThtī javānī

ġhazab Dhāne lagīñ nīchī nigāheñ

qayamat hai teri uThti jawani

ghazab Dhane lagin nichi nigahen

raqīboñ ke liye achchhā Thikānā ho gayā paidā

ḳhudā ābād rakhe maiñ to kahtā huuñ jahannam ko

raqibon ke liye achchha Thikana ho gaya paida

KHuda aabaad rakhe main to kahta hun jahannam ko

kyā kah diyā ye aap ne chupke se kaan meñ

dil kā sambhālnā mujhe dushvār ho gayā

kya kah diya ye aap ne chupke se kan mein

dil ka sambhaalna mujhe dushwar ho gaya

hūroñ se na hogī ye mudārāt kisī kī

yaad aa.egī jannat meñ mulāqāt kisī kī

huron se na hogi ye mudaraat kisi ki

yaad aaegi jannat mein mulaqat kisi ki

nau-giraftār-e-mohabbat huuñ vafā mujh meñ kahāñ

kam se kam dil abhī sau baar to aane diije

nau-giraftar-e-mohabbat hun wafa mujh mein kahan

kam se kam dil abhi sau bar to aane dije

koī is tarah se milne kā mazā miltā hai

uuprī dil se vo miltā hai to kyā miltā hai

koi is tarah se milne ka maza milta hai

upri dil se wo milta hai to kya milta hai

zamāna ham ne zālim chhān maarā

nahīñ miltīñ tire milne kī rāheñ

zamana hum ne zalim chhan mara

nahin miltin tere milne ki rahen

tumhāre haath ḳhālī jeb ḳhālī zulf ḳhālī thī

na the tum chor dil ke lo idhar dekho ye kyā niklā

tumhaare hath KHali jeb KHali zulf KHali thi

na the tum chor dil ke lo idhar dekho ye kya nikla

is jabīn-e-araq-afshāñ pe na chuniye afshāñ

ye sitāre kahīñ mil jaa.eñ na sayyāroñ meñ

is jabin-e-araq-afshan pe na chuniye afshan

ye sitare kahin mil jaen na sayyaron mein

hameñ islām use itnā ta.alluq hai abhī baaqī

butoñ se jab bigaḌtī hai ḳhudā ko yaad karte haiñ

hamein islam use itna talluq hai abhi baqi

buton se jab bigaDti hai KHuda ko yaad karte hain

ye kah ke mere sāmne Taalā raqīb ko

mujh se kabhī kī jaan na pahchān jā.iye

ye kah ke mere samne Tala raqib ko

mujh se kabhi ki jaan na pahchan jaiye

chashm-e-bad-dūr vo bhole bhī haiñ nādāñ bhī haiñ

zulm bhī mujh pe kabhī soch-samajh kar na huā

chashm-e-bad-dur wo bhole bhi hain nadan bhi hain

zulm bhi mujh pe kabhi soch-samajh kar na hua

aa.ina dekh kar vo ye samjhe

mil gayā husn-e-be-misāl hameñ

aaina dekh kar wo ye samjhe

mil gaya husn-e-be-misal hamein

saḳht-jāñ huuñ mujhe ik vaar se kyā hotā hai

aisī choTeñ koī do-chār to aane diije

saKHt-jaan hun mujhe ek war se kya hota hai

aisi choTen koi do-chaar to aane dije

na dekhe hoñge rind-e-lā-ubālī tum ne 'beḳhud' se

ki aise log ab āñkhoñ se ojhal hote jaate haiñ

na dekhe honge rind-e-la-ubaali tum ne 'beKHud' se

ki aise log ab aankhon se ojhal hote jate hain

'beḳhud' zarūr raat ko so.e ho pī ke tum

ye to kaho namāz paḌhī yā qazā huī

'beKHud' zarur raat ko soe ho pi ke tum

ye to kaho namaz paDhi ya qaza hui

ġham meñ Duube hī rahe dam na hamārā niklā

bahr-e-hastī kā bahut duur kinārā niklā

gham mein Dube hi rahe dam na hamara nikla

bahr-e-hasti ka bahut dur kinara nikla

paḌhe jaao 'beḳhud' ġhazal par ġhazal

vo but ban ga.e haiñ sune jā.eñge

paDhe jao 'beKHud' ghazal par ghazal

wo but ban gae hain sune jaenge

apne jalve kā vo ḳhud aap tamāshā.ī hai

ā.īne us ne lagā rakkhe haiñ dīvāroñ meñ

apne jalwe ka wo KHud aap tamashai hai

aaine us ne laga rakkhe hain diwaron mein

tirī teġh kā laal kar dūñgā muñh

jo ye khelne mujh se aa.egī rañg

teri tegh ka lal kar dunga munh

jo ye khelne mujh se aaegi rang

vo kuchh muskurānā vo kuchh jheñp jaanā

javānī adā.eñ sikhātī haiñ kyā kyā

wo kuchh muskurana wo kuchh jhenp jaana

jawani adaen sikhati hain kya kya

javāb soch ke vo dil meñ muskurāte haiñ

abhī zabān pe merī savāl bhī to na thā

jawab soch ke wo dil mein muskuraate hain

abhi zaban pe meri sawal bhi to na tha

dil mohabbat se bhar gayā 'beḳhud'

ab kisī par fidā nahīñ hotā

dil mohabbat se bhar gaya 'beKHud'

ab kisi par fida nahin hota

raah meñ baiThā huuñ maiñ tum sañg-e-rah samjho mujhe

aadmī ban jā.ūñgā kuchh Thokareñ khāne ke ba.ad

rah mein baiTha hun main tum sang-e-rah samjho mujhe

aadmi ban jaunga kuchh Thokaren khane ke baad

aap ko rañj huā aap ke dushman ro.e

maiñ pashemān huā haal sunā kar apnā

aap ko ranj hua aap ke dushman roe

main pasheman hua haal suna kar apna

dī qasam vasl meñ us but ko ḳhudā kī to kahā

tujh ko aatā hai ḳhudā yaad hamāre hote

di qasam wasl mein us but ko KHuda ki to kaha

tujh ko aata hai KHuda yaad hamare hote

mahfil vahī makān vahī aadmī vahī

yā ham na.e haiñ yā tirī aadat badal ga.ī

mahfil wahi makan wahi aadmi wahi

ya hum nae hain ya teri aadat badal gai

maut aa rahī hai va.ade pe yā aa rahe ho tum

kam ho rahā hai dard dil-e-be-qarār kā

maut aa rahi hai wade pe ya aa rahe ho tum

kam ho raha hai dard dil-e-be-qarar ka

chalne kī nahīñ aaj koī ghaat kisī kī

sunñe ke nahīñ vasl meñ ham baat kisī kī

chalne ki nahin aaj koi ghat kisi ki

sunne ke nahin wasl mein hum baat kisi ki

dil to lete ho magar ye bhī rahe yaad tumheñ

jo hamārā na huā kab vo tumhārā hogā

dil to lete ho magar ye bhi rahe yaad tumhein

jo hamara na hua kab wo tumhaara hoga

kuchh tarah rindoñ ne dī kuchh mohtasib bhī dab gayā

chheḌ aapas meñ sar-e-bāzār ho kar rah ga.ī

kuchh tarah rindon ne di kuchh mohtasib bhi dab gaya

chheD aapas mein sar-e-bazar ho kar rah gai

sun ke saarī dāstān-e-rañj-o-ġham

kah diyā us ne ki phir ham kyā kareñ

sun ke sari dastan-e-ranj-o-gham

kah diya us ne ki phir hum kya karen

jhūTā jo kahā maiñ ne to sharmā ke vo bole

allāh bigāḌe na banī baat kisī kī

jhuTa jo kaha main ne to sharma ke wo bole

allah bigaDe na bani baat kisi ki

baat vo kahiye ki jis baat ke sau pahlū hoñ

koī pahlū to rahe baat badalne ke liye

baat wo kahiye ki jis baat ke sau pahlu hon

koi pahlu to rahe baat badalne ke liye

dil vo kāfir hai ki mujh ko na diyā chain kabhī

bevafā tū bhī ise le ke pashemāñ hogā

dil wo kafir hai ki mujh ko na diya chain kabhi

bewafa tu bhi ise le ke pasheman hoga

takiya haTtā nahīñ pahlū se ye kyā hai 'beḳhud'

koī botal to nahīñ tum ne chhupā rakkhī hai

takiya haTta nahin pahlu se ye kya hai 'beKHud'

koi botal to nahin tum ne chhupa rakkhi hai

dil vo kāfir hai ki mujh ko na diyā chiin kabhī

bevafā tū bhī use le ke pashemāñ hogā

dil wo kafir hai ki mujh ko na diya chin kabhi

bewafa tu bhi use le ke pasheman hoga

hameñ piine se matlab hai jagah kī qaid kyā 'beḳhud'

usī kā naam jannat rakh diyā botal jahāñ rakh dī

hamein pine se matlab hai jagah ki qaid kya 'beKHud'

usi ka nam jannat rakh diya botal jahan rakh di

tum ko āshufta-mizājoñ kī ḳhabar se kyā kaam

tum sañvārā karo baiThe hue gesū apne

tum ko aashufta-mizajon ki KHabar se kya kaam

tum sanwara karo baiThe hue gesu apne

nāma-bar ye to kahī baat pate kī tū ne

zikr us bazm meñ rahtā to hai akasr apnā

nama-bar ye to kahi baat pate ki tu ne

zikr us bazm mein rahta to hai akasr apna

dil churā kar le gayā thā koī shaḳhs

pūchhne se fā.eda, thā koī shaḳhs

dil chura kar le gaya tha koi shaKHs

puchhne se faeda, tha koi shaKHs

mohabbat aur majnūñ ham to saudā is ko kahte haiñ

fidā lailā pe thā āñkhoñ kā andhā is ko kahte haiñ

mohabbat aur majnun hum to sauda is ko kahte hain

fida laila pe tha aankhon ka andha is ko kahte hain

merā har sher hai ik rāz-e-haqīqat 'beḳhud'

maiñ huuñ urdu kā 'nazīrī' mujhe tū kyā samjhā

mera har sher hai ek raaz-e-haqiqat 'beKHud'

main hun urdu ka 'naziri' mujhe tu kya samjha

zāhidoñ se na banī hashr ke din bhī yā-rab

vo khaḌe haiñ tirī rahmat ke talabgār judā

zahidon se na bani hashr ke din bhi ya-rab

wo khaDe hain teri rahmat ke talabgar juda

ab aap koī kaam sikhā dījiye ham ko

ma.alūm huā ishq ke qābil to nahīñ ham

ab aap koi kaam sikha dijiye hum ko

malum hua ishq ke qabil to nahin hum