ai gardisho tumheñ zarā tāḳhīr ho ga.ī

ab merā intizār karo maiñ nashe meñ huuñ

ai gardisho tumhein zara taKHir ho gai

ab mera intizar karo main nashe mein hun

ahl-e-dil ke vāste paiġhām ho kar rah ga.ī

zindagī majbūriyoñ kā naam ho kar rah ga.ī

ahl-e-dil ke waste paigham ho kar rah gai

zindagi majburiyon ka nam ho kar rah gai

ye mahal ye maal o daulat sab yahīñ rah jā.eñge

haath aa.egī faqat do gaz zamīñ marne ke baad

ye mahal ye mal o daulat sab yahin rah jaenge

hath aaegi faqat do gaz zamin marne ke baad

'dāġh' ke sher javānī meñ bhale lagte haiñ

'mīr' kī koī ġhazal gaao ki kuchh chain paḌe

'dagh' ke sher jawani mein bhale lagte hain

'mir' ki koi ghazal gao ki kuchh chain paDe

ab maiñ hudūd-e-hosh-o-ḳhirad se guzar gayā

Thukrāo chāhe pyaar karo maiñ nashe meñ huuñ

ab main hudud-e-hosh-o-KHirad se guzar gaya

Thukrao chahe pyar karo main nashe mein hun

arz-e-dakan meñ jaan to dillī meñ dil banī

aur shahr-e-lucknow meñ hinā ban ga.ī ġhazal

arz-e-dakan mein jaan to dilli mein dil bani

aur shahr-e-lucknow mein hina ban gai ghazal

raat kī raat bahut dekh lī duniyā terī

sub.h hone ko hai ab 'tarz' ko so jaane de

raat ki raat bahut dekh li duniya teri

subh hone ko hai ab 'tarz' ko so jaane de

sub.h haiñ sajde meñ ham to shaam saaqī ke huzūr

bandagī apnī jagah aur mai-kashī apnī jagah

subh hain sajde mein hum to sham saqi ke huzur

bandagi apni jagah aur mai-kashi apni jagah

pattharoñ ke des meñ shīshe kā hai apnā vaqār

devtā apnī jagah aur aadmī apnī jagah

pattharon ke des mein shishe ka hai apna waqar

dewta apni jagah aur aadmi apni jagah

dil-e-ġham-zada pe guzar gayā hai vo hādsa ki mire liye

na to ġham rahā na ḳhushī rahī na junūñ rahā na parī rahī

dil-e-gham-zada pe guzar gaya hai wo hadsa ki mere liye

na to gham raha na KHushi rahi na junun raha na pari rahi

bazm-e-yārāñ hai ye saaqī mai nahīñ to ġham na kar

kitne haiñ jo mai-kada bar-dosh haiñ yāroñ ke biich

bazm-e-yaran hai ye saqi mai nahin to gham na kar

kitne hain jo mai-kada bar-dosh hain yaron ke bich

sāñsoñ kī jal-tarañg par naġhma-e-ishq gaa.e jā

ai mirī jān-e-ārzū tū yūñhī muskurā.e jā

sanson ki jal-tarang par naghma-e-ishq gae ja

ai meri jaan-e-arzu tu yunhi muskurae ja

vahī 'tarz' tujh pe rahīm hai ye usī kā faiz-e-karīm hai

ki asātiza ke bhī rañg meñ jo ġhazal kahī vo kharī rahī

wahi 'tarz' tujh pe rahim hai ye usi ka faiz-e-karim hai

ki asatiza ke bhi rang mein jo ghazal kahi wo khari rahi