kal yahī bachche samundar ko muqābil pā.eñge

aaj tairāte haiñ jo kāġhaz kī nannhī kashtiyāñ

kal yahi bachche samundar ko muqabil paenge

aaj tairaate hain jo kaghaz ki nannhi kashtiyan

vafā parchhā.īñ kī andhī parastish

mohabbat naam hai mahrūmiyoñ kā

wafa parchhain ki andhi parastish

mohabbat nam hai mahrumiyon ka

paayā jab se zaḳhm kisī ko khone kā

sīkhā fan ham ne be-āñsū rone kā

paya jab se zaKHm kisi ko khone ka

sikha fan hum ne be-ansu rone ka

na TuuTe aur kuchh din tujh se rishta is tarah merā

mujhe barbād kar de tū magar āhista āhista

na TuTe aur kuchh din tujh se rishta is tarah mera

mujhe barbaad kar de tu magar aahista aahista

dil meñ tire ḳhulūs samoyā na jā sakā

patthar meñ is gulāb ko boyā na jā sakā

dil mein tere KHulus samoya na ja saka

patthar mein is gulab ko boya na ja saka

diye bujhātī rahī dil bujhā sake to bujhā.e

havā ke sāmne ye imtihān rakhnā hai

diye bujhati rahi dil bujha sake to bujhae

hawa ke samne ye imtihan rakhna hai

ga.e dinoñ meñ ronā bhī to kitnā sachchā thā

dil halkā ho jaatā thā jab ashk bahāne se

gae dinon mein rona bhi to kitna sachcha tha

dil halka ho jata tha jab ashk bahane se

ek diyā kab rok sakā hai raat ko aane se

lekin dil kuchh sambhlā to ik diyā jalāne se

ek diya kab rok saka hai raat ko aane se

lekin dil kuchh sambhla to ek diya jalane se

baḌoñ ne us ko chhīn liyā hai bachchoñ se

ḳhabar nahīñ ab kyā ho haal khilaune kā

baDon ne us ko chhin liya hai bachchon se

KHabar nahin ab kya ho haal khilaune ka

banā.e jaatā thā maiñ apne haath ko kashkol

so merī ruuh meñ ḳhanjar utartā jaatā thā

banae jata tha main apne hath ko kashkol

so meri ruh mein KHanjar utarta jata tha

kyā tarjumānī-e-ġham-e-duniyā kareñ ki jab

fan meñ ḳhud apnā ġham bhī samoyā na jā sakā

kya tarjumani-e-gham-e-duniya karen ki jab

fan mein KHud apna gham bhi samoya na ja saka