suno ki ab ham gulāb deñge gulāb leñge

mohabbatoñ meñ koī ḳhasāra nahīñ chalegā

suno ki ab hum gulab denge gulab lenge

mohabbaton mein koi KHasara nahin chalega

jo din chaḌhā to hameñ niiñd kī zarūrat thī

sahar kī aas meñ ham log raat bhar jaage

jo din chaDha to hamein nind ki zarurat thi

sahar ki aas mein hum log raat bhar jage

nikal gulāb kī muTThī se aur ḳhushbū ban

maiñ bhāgtā huuñ tire pīchhe aur tū jugnū ban

nikal gulab ki muTThi se aur KHushbu ban

main bhagta hun tere pichhe aur tu jugnu ban

koī kahānī koī vāqi.a sunā to sahī

agar hañsā nahīñ saktā mujhe rulā to sahī

koi kahani koi waqia suna to sahi

agar hansa nahin sakta mujhe rula to sahi

be-tukī raushnī meñ parā.e andhere liye

ek manzar hai tere liye ek mere liye

be-tuki raushni mein parae andhere liye

ek manzar hai tere liye ek mere liye

shaam pyārī shaam us par bhī koī dar khol de

shāḳh par baiThī huī hai ek beghar fāḳhta

sham pyari sham us par bhi koi dar khol de

shaKH par baiThi hui hai ek beghar faKHta

tujhe maiñ ġhaur se dekhūñ maiñ tujh se pyaar karūñ

ai mere but tū mire but-kadoñ se bāhar aa

tujhe main ghaur se dekhun main tujh se pyar karun

ai mere but tu mere but-kadon se bahar aa

ajiib sāneha guzrā hai in gharoñ pe koī

ki chauñktā hī nahīñ ab to dastakoñ pe koī

ajib saneha guzra hai in gharon pe koi

ki chaunkta hi nahin ab to dastakon pe koi

har ek had se pare apnā boriyā le jā

badī kā naam na le aur nekiyoñ se nikal

har ek had se pare apna boriya le ja

badi ka nam na le aur nekiyon se nikal

ajab ḳhvāboñ se merā rābta rakkhā gayā

mujhe so.e-huoñ meñ jāgtā rakkhā gayā

ajab KHwabon se mera rabta rakkha gaya

mujhe soe-huon mein jagta rakkha gaya