سبھی کردار تھک کر سو گئے ہیں

مگر اب تک کہانی چل رہی ہے

وقت گزر جاتا ہے لیکن دل کی رنجش

دل میں بیٹھی کی بیٹھی ہی رہ جاتی ہے

اک چنگاری آگ لگا جاتی ہے بن میں اور کبھی

ایک کرن سے ظلمت کو چھٹ جانا پڑتا ہے

جینا تو الگ بات ہے مرنا بھی یہاں پر

ہر شخص کی اپنی ہی ضرورت کے لیے ہے

یوں ہی بے کار میں پڑا خود کو

کار آمد بنا رہا ہوں میں

وہ کچھ سے کچھ بنا ڈالے گا تسلیمات کے معنی

سلیقہ آ گیا اس کو اگر انکار کرنے کا

دلوں کی شیشہ گری کارگاہ ہستی میں

ہنر کے زیر و زبر سے بھی ٹوٹ سکتی تھی

سچائی وہ جنگ ہے جس میں بعض اوقات سپاہی کو

آپ مقابل اپنے ہی ڈٹ جانا پڑتا ہے

بننے والی بات وہی ہوتی ہے وہ جو

بنتے بنتے یکسر بنتی رہ جاتی ہے

نہیں ہے کوئی بھی حتمی یہاں حد معلوم

ہر ایک انتہا اک اور انتہا تک ہے

صبح ہوتی ہے تو کنج خوش گمانی میں کہیں

پھینک دی جاتی ہے شب بھر کی سیاہی باندھ کر

اپنے صحرا سے بندھے پیاس کے مارے ہوئے ہم

منتظر ہیں کہ ادھر کوئی کنواں آ نکلے

وہ کہ بن پا نہیں رہا مجھ سے

جو کہ شاید بنا رہا ہوں میں

روح کے دامن سے اپنی دنیا داری باندھ کر

چل رہے ہیں دم بہ دم آنکھوں پہ پٹی باندھ کر