ہم لوگ تو اخلاق بھی رکھ آئے ہیں ساحلؔ

ردی کے اسی ڈھیر میں آداب پڑے تھے

گزر رہی ہے جو دل پر وہی حقیقت ہے

غم جہاں کا فسانہ غم حیات سے پوچھ

خواب دیکھا تھا محبت کا محبت کی قسم

پھر اسی خواب کی تعبیر میں مصروف تھا میں

بس ایک خوف تھا زندہ تری جدائی کا

مرا وہ آخری دشمن بھی آج مارا گیا

تم مصلحت کہو یا منافق کہو مجھے

دل میں مگر غبار بہت دیر تک رہا

چمک رہے تھے اندھیرے میں سوچ کے جگنو

میں اپنی یاد کے خیمے میں سو نہیں پایا

جنوں کا کوئی فسانہ تو ہاتھ آنے دو

میں رو پڑوں گا بہانہ تو ہاتھ آنے دو

کسی خیال کا کوئی وجود ہو شاید

بدل رہا ہوں میں خوابوں کو تجربہ کر کے

اس شہر کے لوگوں پہ بھروسا نہیں کرنا

زنجیر کوئی در پہ لگاؤ کہ چلا میں

میں تماشا ہوں تماشائی ہیں چاروں جانب

شرم ہے شرم کے مارے نہیں رو سکتا میں

میں کس یقین سے لکھا گیا ہوں مٹی پر

وہ کون ہے جو مرے سلسلے کی ڈھال بنا

بعض اوقات ترا نام بدل جاتا ہے

بعض اوقات ترے نقش بھی کھو جاتے ہیں

ذرے ذرے میں قیامت کا سماں ہے ساحلؔ

ایک ہی دل کے سہارے نہیں رو سکتا میں

لفظ رنگوں میں نہائے ہوئے گھر میں آئے

تیری آواز کی تصویر میں مصروف تھا میں

روشنی کی اگر علامت ہے

راکھ اڑتی ہے کیوں شرارے پر

جواب جس کا نہیں کوئی وہ سوال بنا

میں خواب میں اسے دیکھوں کوئی خیال بنا

دنیا سے دور اپنے برابر کھڑے رہے

خوابوں میں جاگتے تھے مگر رات ہو گئی

اس تشنہ لبی پر مجھے اعزاز تو بخشو

اے بادہ کشو جام اٹھاؤ کہ چلا میں

میں اپنی آنکھ بھی خوابوں سے دھو نہیں پایا

میں کیسے دوں گا زمانے کو جو نہیں پایا