maiñ roz idhar se guzartā huuñ kaun dekhtā hai

maiñ jab idhar se na guzrūñgā kaun dekhegā

main roz idhar se guzarta hun kaun dekhta hai

main jab idhar se na guzrunga kaun dekhega

haa.e vo zindagī-fareb āñkheñ

tū ne kyā sochā maiñ ne kyā samjhā

hae wo zindagi-fareb aankhen

tu ne kya socha main ne kya samjha

salām un pe tah-e-teġh bhī jinhoñ ne kahā

jo terā hukm jo terī razā jo tū chāhe

salam un pe tah-e-tegh bhi jinhon ne kaha

jo tera hukm jo teri raza jo tu chahe

maiñ ek pal ke rañj-e-farāvāñ meñ kho gayā

murjhā ga.e zamāne mire intizār meñ

main ek pal ke ranj-e-farawan mein kho gaya

murjha gae zamane mere intizar mein

masīh-o-ḳhizr kī umreñ nisār hoñ us par

vo ek lamha jo yāroñ ke darmiyāñ guzre

masih-o-KHizr ki umren nisar hon us par

wo ek lamha jo yaron ke darmiyan guzre

baḌe salīqe se duniyā ne mere dil ko diye

vo ghaao jin meñ thā sachchā.iyoñ kā charkā bhī

baDe saliqe se duniya ne mere dil ko diye

wo ghao jin mein tha sachchaiyon ka charka bhi

kyā ruup dostī kā kyā rañg dushmanī kā

koī nahīñ jahāñ meñ koī nahīñ kisī kā

kya rup dosti ka kya rang dushmani ka

koi nahin jahan mein koi nahin kisi ka

har vaqt fikr-e-marg-e-ġharībāna chāhiye

sehhat kā ek pahlū marīzāna chāhiye

har waqt fikr-e-marg-e-gharibana chahiye

sehhat ka ek pahlu marizana chahiye

zindagī kī rāhateñ miltī nahīñ miltī nahīñ

zindagī kā zahr pī kar justujū meñ ghūmiye

zindagi ki rahaten milti nahin milti nahin

zindagi ka zahr pi kar justuju mein ghumiye

tire ḳhayāl ke pahlū se uTh ke jab dekhā

mahak rahā thā zamāne meñ chār-sū tirā ġham

tere KHayal ke pahlu se uTh ke jab dekha

mahak raha tha zamane mein chaar-su tera gham

is jaltī dhuup meñ ye ghane sāya-dār peḌ

maiñ apnī zindagī unheñ de duuñ jo ban paḌe

is jalti dhup mein ye ghane saya-dar peD

main apni zindagi unhen de dun jo ban paDe

nigah uThī to zamāne ke sāmne tirā ruup

palak jhukī to mire dil ke rū-ba-rū tirā ġham

nigah uThi to zamane ke samne tera rup

palak jhuki to mere dil ke ru-ba-ru tera gham

ye kyā tilism hai ye kis kī yāsmīñ bāñheñ

chhiḌak ga.ī haiñ jahāñ-dar-jahāñ gulāb ke phuul

ye kya tilism hai ye kis ki yasmin banhen

chhiDak gai hain jahan-dar-jahan gulab ke phul

merī mānind ḳhud-nigar tanhā

ye surāhī meñ phuul nargis kā

meri manind KHud-nigar tanha

ye surahi mein phul nargis ka

din kaT rahe haiñ kashmakash-e-rozgār meñ

dam ghuT rahā hai sāya-e-abr-e-bahār meñ

din kaT rahe hain kashmakash-e-rozgar mein

dam ghuT raha hai saya-e-abr-e-bahaar mein

chāñdnī meñ sāya-hā-e-kāḳh-o-kū meñ ghūmiye

phir kisī ko chāhne kī aarzū meñ ghūmiye

chandni mein saya-ha-e-kaKH-o-ku mein ghumiye

phir kisi ko chahne ki aarzu mein ghumiye

supurdagī meñ bhī ik ramz-e-ḳhud-nigah-dārī

vo mere dil se mire vāste nahīñ guzre

supurdagi mein bhi ek ramz-e-KHud-nigah-dari

wo mere dil se mere waste nahin guzre

jab anjuman tavajjoh-e-sad-guftugū meñ ho

merī taraf bhī ik nigah-e-kam-suḳhan paḌe

jab anjuman tawajjoh-e-sad-guftugu mein ho

meri taraf bhi ek nigah-e-kam-suKHan paDe

shāyad ik bhūlī tamannā miTte miTte jī uThe

aur bhī is jalva-zār-e-rañg-o-bū meñ ghūmiye

shayad ek bhuli tamanna miTte miTte ji uThe

aur bhi is jalwa-zar-e-rang-o-bu mein ghumiye