چپ جو رہتے ہیں تو یہ بات غنیمت جانو

ورنہ ہم لوگ بھی اک حشر اٹھا سکتے ہیں

جانے کیا کیا اور ہوں راہ طلب میں مشکلیں

ساتھ رکھنا ہے کبھی زاد سفر مت بھولنا

زخم دیتا ہے ہر کوئی تنہاؔ

حوصلہ بھی دیا کرے کوئی

دوست ہی خوبیاں بتاتے ہیں

دوست ہی خامیاں نکالتے ہیں

آج آؤ اس طرح جیسے کہ پہلی بار تم

آ گئے تھے بے خیالی میں سنور کے سامنے

بہانے ترک تعلق کے کس نے ڈھونڈے تھے

یہ سارے حلقۂ یاراں میں فیصلے ہوں گے

میں جب بھی لڑا حق کے لیے اپنے عدو سے

میداں میں رہی کوئی نہ تلوار سلامت

بارہا ہم نے اسے رو کے کہا ہے صاحب

دن جدائی کے نہیں ہم سے گزارے جاتے

قافلے رہ میں لوٹنے والا

راہزن ایک رہنما نکلا

امیر شہر کی تھوڑی سی کجروی کے سبب

غریب شہر نے دیکھے ہیں المیے کتنے

ہنسے والوں کو جو اک پل میں رلا سکتے ہیں

ایسے لمحات بھی تو زیست میں آ سکتے ہیں

یادوں کے قافلے میں اداسی تھی ہم رکاب

ہجرت میں تیرے شہر سے تنہاؔ نہیں گئے

کوئی تازہ لگاؤ زخم دل پر

پرانی یہ نشانی ہو رہی ہے

مار ڈالے گی ایک دن تنہاؔ

یہ تری شوخیٔ جمال مجھے

جہاں بھی دیکھا انہیں دوستو سلام کیا

ہمیشہ ہم نے حسینوں کا احترام کیا

شہر میں رونقیں سہی تنہاؔ

اپنے گاؤں سے مت کنارا کر

بچ کے نکلا تھا جو کبھی مجھ سے

آ گیا ہے مرے نشانے پر

چھپا کر درد کو سینے میں تنہاؔ

بھرم اس کا بھی کچھ رکھنا پڑے گا

جنگل میں جو سناٹا تھا

شہر کی جانب آ نکلا ہے

کم ملنے کا احساس گراں لگتا ہے تیرا

اب لطف و کرم بھی ترا پہلے سا نہیں ہے

گناہوں نے مجھے جکڑا ہوا ہے اس طرح تنہاؔ

کہ لحظہ بھر عبادت بھی سزا معلوم ہوتی ہے

بھنور نے آ لیا ہے کشتیوں کو

نظارے دیکھ لو تم بھی اجل کے

بزم یاراں میں بیٹھتا ہوں مگر

میری جانب حریف دیکھتے ہیں

دشت غربت میں ہم سفر نہ بنا

ہم کئی مہربان چھوڑ آئے

وہ سخی ہے تو اس کی چوکھٹ پر

دلبری کا سوال کر دیکھیں

یہ تماشا سر بازار نہیں ہو سکتا

ہر کوئی میرا خریدار نہیں ہو سکتا

مسیحائی کا ہو اعجاز جس میں

کہیں وہ چارہ گر ملتا نہیں ہے

میں جانتا ہوں زمانے کی بے نیازی کو

مجھے پتا ہے سفر میں کہاں ٹھہرنا ہے

جس کو راحت ہے تیری یادوں سے

تیری فرقت میں اشک بار بھی ہے

حادثے پھر نہ پیش آتے ہمیں

یہ محافظ جو کرتے گھات پہ غور

سلوک رکھتا ہے مجھ سے منافقوں جیسا

تمام شہر میں جو معتبر زیادہ ہے

اس بار اکھڑ جائیں گے ایوان سیاست

دربان رہیں گے نہ یہ دربار رہے گا

بہت خاموش رہتا ہے جو تنہاؔ

وہ محفل میں برابر بولتا ہے