ہم گنہ گاروں کے کیا خون کا پھیکا تھا رنگ

مہندی کس واسطے ہاتھوں پہ رچائی پیارے

تیرے مژگاں کی کیا کروں تعریف

تیر یہ بے کمان جاتا ہے

ہم فراموش کی فراموشی

اور تم یاد عمر بھر بھولے

کون کہتا ہے کہ تو نے ہمیں ہٹ کر مارا

دل جھپٹ آنکھ لڑا نظروں سے ڈٹ کر مارا

ہم عشق تیرے ہاتھ سے کیا کیا نہ دیکھیں حالتیں

دیکھ آب دیدہ خوں نہ ہو خون جگر پانی نہ کر

کس زمانے کی یہ دشمن تھی مری

اس محبت کا ہو منہ کالا میاں

اے مصور شتاب ہو کہ ابھی

اس کا نقشہ دھیان میں کچھ ہے

یہ دیوانے ہیں محو دید دلبر

نہیں کچھ مانتے یاں کو نہ واں کو

جلاؤ مارو درکارو بلا لو گالیاں دے لو

کرو جو چاہو ہم کس بات سے اکراہ رکھتے ہیں

رفو جیب مجنوں ہوا کب اے ناصح

تو مر جائے گا اس کے سیتے ہی سیتے

کاکل نہیں لٹکتے کچھ ان کی چھاتیوں پر

چوکاں سے یہ کھلنڈرے گیندیں اچھالتے ہیں

ہم عشق تیرے ہاتھ سے کیا کیا نہ دیکھیں حالتیں

دیکھ اب یہ دیدہ خوں نہ ہو خون جگر پانی نہ کر

بہہ چکا خون دل آنکھ تک آ پہنچا سیل

روئے جا اور بھی اے دیدۂ تر دیکھیں تو

قسم مے کی مجھ بن ہے میرے لہو کی

جو ہم بن پیو تو ہمارا لہو ہے

دھانی جوڑے پہ ترے سانولے میں مرتا ہوں

مر بھی جاؤں تو کفن دیکھ کے کاہی دینا

جو آیا یار تو تو ہو چلا غش اے دوانے دل

اسی دم تجھ کو مرنا تھا بتا کیا تجھ کو دہاڑ آئی

تاک لاگی تری دختر سے ہماری اے تاک

آج شب جی میں ہے گھر تیرے یہ داماد رہے

اوسوں گئی ہے پیاس کہیں دیدۂ نمیں

بجھتا ہے آنسوؤں سے کہاں دل پھنکا ہوا

ہے جانی تجھ میں سب خوبی پہ جاں سا

تو اک دم میں بچھڑ جاتا ہے مجھ سے

شتابی اپنے دیوانے کو کر بند

مسلسل زلف سے کر یا نظر بند

وہ اٹھا کر یک قدم آیا نہ گاہ

ہم قلم ساں اس کے، سر کے بھل گئے

بے غمی ترک علائق ہے سدا اظفریاؔ

جس کو دنیا سے علاقہ نہیں غم ناک نہیں

اظفریؔ غنچۂ دل بند اور آئی ہے بہار

سیر گل کو کہ یہ شاید بہ تکلف کھل لے

سونی گئی میں ہوئی یار سے مڈبھیڑ آج

پوچھو کوئی کس لئے منہ پہ کر اوجھل گیا

دل لیا تاب و تواں لے چکا جاں بھی لے لے

پاک کر ڈال بکھیڑا یہ سبھی جھنجھٹ کا

او عطارد زحل نحس سے ٹک مانگ مداد

بخت کا ماجرا لکھتا ہوں سیاہی دینا