sub.h hotī hai shaam hotī hai

umr yūñhī tamām hotī hai

subh hoti hai sham hoti hai

umr yunhi tamam hoti hai

aas kyā ab to umīd-e-nā-ummīdī bhī nahīñ

kaun de mujh ko tasallī kaun bahlā.e mujhe

aas kya ab to umid-e-na-ummidi bhi nahin

kaun de mujh ko tasalli kaun bahlae mujhe

nāseh ḳhatā muaaf suneñ kyā bahār meñ

ham iḳhtiyār meñ haiñ na dil iḳhtiyār meñ

naseh KHata muaf sunen kya bahaar mein

hum iKHtiyar mein hain na dil iKHtiyar mein

taḌaptī dekhtā huuñ jab koī shai

uThā letā huuñ apnā dil samajh kar

taDapti dekhta hun jab koi shai

uTha leta hun apna dil samajh kar

ham ne paalā muddatoñ pahlū meñ ham koī nahīñ

tum ne dekhā ik nazar se dil tumhārā ho gayā

hum ne pala muddaton pahlu mein hum koi nahin

tum ne dekha ek nazar se dil tumhaara ho gaya

dimāġh de jo ḳhudā gulshan-e-mohabbat meñ

har ek gul se tire pairahan kī bū aa.e

dimagh de jo KHuda gulshan-e-mohabbat mein

har ek gul se tere pairahan ki bu aae

dil-lagī meñ hasrat-e-dil kuchh nikal jaatī to hai

bose le lete haiñ ham do-chār hañste bolte

dil-lagi mein hasrat-e-dil kuchh nikal jati to hai

bose le lete hain hum do-chaar hanste bolte

jaane de sabr o qarār o hosh ko

tū kahāñ ai be-qarārī jā.egī

jaane de sabr o qarar o hosh ko

tu kahan ai be-qarari jaegi

ḳhālī sahī balā se tasallī to dil ko ho

rahne do sāmne mire sāġhar sharāb kā

KHali sahi bala se tasalli to dil ko ho

rahne do samne mere saghar sharab ka

dāstān-e-shauq-e-dil aisī nahīñ thī muḳhtasar

jī lagā kar tum agar sunte maiñ kahtā aur bhī

dastan-e-shauq-e-dil aisi nahin thi muKHtasar

ji laga kar tum agar sunte main kahta aur bhi

kyā ḳhabar mujh ko ḳhizāñ kyā chiiz hai kaisī bahār

āñkheñ kholīñ aa ke maiñ ne ḳhāna-e-sayyād meñ

kya KHabar mujh ko KHizan kya chiz hai kaisi bahaar

aankhen kholin aa ke main ne KHana-e-sayyaad mein

ahd ke ba.ad liye bose dahan ke itne

ki lab-e-zūd-pashīmāñ ko mukarne na diyā

ahd ke baad liye bose dahan ke itne

ki lab-e-zud-pashiman ko mukarne na diya

kījiye aisā jahāñ paidā jahāñ koī na ho

zarra-o-aḳhtar zamīn-o-āsmāñ koī na ho

kijiye aisa jahan paida jahan koi na ho

zarra-o-aKHtar zamin-o-asman koi na ho

fikr hai shauq-e-kamar ishq-e-dahāñ paidā karūñ

chāhtā huuñ ek dil meñ do makāñ paidā karūñ

fikr hai shauq-e-kamar ishq-e-dahan paida karun

chahta hun ek dil mein do makan paida karun

bas ki thī rone kī aadat vasl meñ bhī yaar se

kah ke apnā aap hāl-e-ārzū rone lagā

bas ki thi rone ki aadat wasl mein bhi yar se

kah ke apna aap haal-e-arzu rone laga

dil dhaḌaktā hai shab-e-ġham meñ kahīñ aisā na ho

marg bhī ban kar mizāj-e-yār tarsā.e mujhe

dil dhaDakta hai shab-e-gham mein kahin aisa na ho

marg bhi ban kar mizaj-e-yar tarsae mujhe

umr bhar rashk-e-adū saath thā kahtā kyā haal

vo milā bhī kabhī tanhā to maiñ tanhā na huā

umr bhar rashk-e-adu sath tha kahta kya haal

wo mila bhi kabhi tanha to main tanha na hua

zamāne se nirālā hai urūs-e-fikr kā jauban

javāñ hotī hai ai 'taslīm' jab ye piir hotī hai

zamane se nirala hai urus-e-fikr ka jauban

jawan hoti hai ai 'taslim' jab ye pir hoti hai

gar yahī hai pās-e-ādāb-e-sukūt

kis tarah fariyād lab tak aa.egī

gar yahi hai pas-e-adab-e-sukut

kis tarah fariyaad lab tak aaegi

vaqt-e-ravā-ravī hai uThe qāfila ke log

saaqī chale piyāla jahāñ tak ki bas chale

waqt-e-rawa-rawi hai uThe qafila ke log

saqi chale piyala jahan tak ki bas chale