کیسی بپتا پال رکھی ہے قربت کی اور دوری کی

خوشبو مار رہی ہے مجھ کو اپنی ہی کستوری کی

اب کی سردی میں کہاں ہے وہ الاؤ سینہ

اب کی سردی میں مجھے خود کو جلانا ہوگا

میں جنہیں دل پہ کھائے پھرتا ہوں

ترے حصے کے رنج تھے مولا

میں اک خواب ہوں تیرا دیکھا ہوا ہوں

تو اک نیند ہے مجھ میں سوئی پڑی ہے

وہ جو اک بات ہے جو تجھ کو بتائی نہ گئی

وہ جو اک راز ہے جو کھل نہ سکا وحشت ہے

اپنے ہونے سے بھی انکار کئے جاتے ہیں

تیرے ہونے کا یقیں خود کو دلاتے ہوئے ہم

وہ ایک لڑکی جو مر رہی ہے حیا کے مارے

وہ ایک لڑکا جو دیکھنے پر تلا ہوا ہے

ہم لوگوں کو پانی اچھا لگتا ہے

ہم لوگوں نے مٹی پہنی ہوئی ہے دوست

وصال یار گر حرام ہے تو سن

حرام کو حلال کر وصال کر

جاننے والے ماننے والوں سے افضل ہے دھیان رہے

مجنوں مت بن ہوش میں رہ اور پھر لیلہ کا بھید سمجھ