تمہارے شہر کا موسم بڑا سہانا لگے

میں ایک شام چرا لوں اگر برا نہ لگے

گھر لوٹ کے روئیں گے ماں باپ اکیلے میں

مٹی کے کھلونے بھی سستے نہ تھے میلے میں

زندگی بھر کے لیے روٹھ کے جانے والے

میں ابھی تک تری تصویر لیے بیٹھا ہوں

ہوا خفا تھی مگر اتنی سنگ دل بھی نہ تھی

ہمیں کو شمع جلانے کا حوصلہ نہ ہوا

دیواروں سے مل کر رونا اچھا لگتا ہے

ہم بھی پاگل ہو جائیں گے ایسا لگتا ہے

کتنے دنوں کے پیاسے ہوں گے یارو سوچو تو

شبنم کا قطرہ بھی جن کو دریا لگتا ہے

تو اس طرح سے مرے ساتھ بے وفائی کر

کہ تیرے بعد مجھے کوئی بے وفا نہ لگے

تمہارے بس میں اگر ہو تو بھول جاؤ مجھے

تمہیں بھلانے میں شاید مجھے زمانہ لگے

جو ڈوبنا ہے تو اتنے سکون سے ڈوبو

کہ آس پاس کی لہروں کو بھی پتا نہ لگے

یہ وقت بند دریچوں پہ لکھ گیا قیصرؔ

میں جا رہا ہوں مرا انتظار مت کرنا

مسافر چلتے چلتے تھک گئے منزل نہیں ملتی

قدم کے ساتھ بڑھتا جا رہا ہو فاصلہ جیسے

ساون ایک مہینے قیصرؔ آنسو جیون بھر

ان آنکھوں کے آگے بادل بے اوقات لگے

تم آ گئے ہو خدا کا ثبوت ہے یہ بھی

قسم خدا کی ابھی میں نے تم کو سوچا تھا

آج برسوں میں تو قسمت سے ملاقات ہوئی

آپ منہ پھیر کے بیٹھے ہیں یہ کیا بات ہوئی

زندگی نے مرا پیچھا نہیں چھوڑا اب تک

عمر بھر سر سے نہ اتری یہ بلا کیسی تھی

راستا دیکھ کے چل ورنہ یہ دن ایسے ہیں

گونگے پتھر بھی سوالات کریں گے تجھ سے

تم سے بچھڑے دل کو اجڑے برسوں بیت گئے

آنکھوں کا یہ حال ہے اب تک کل کی بات لگے

ہر شخص ہے اشتہار اپنا

ہر چہرہ کتاب ہو گیا ہے

دستک میں کوئی درد کی خوشبو ضرور تھی

دروازہ کھولنے کے لیے گھر کا گھر اٹھا

وہ پھول جو مرے دامن سے ہو گئے منسوب

خدا کرے انہیں بازار کی ہوا نہ لگے

میں زہر پیتا رہا زندگی کے ہاتھوں سے

یہ اور بات ہے میرا بدن ہرا نہ ہوا

جس دن سے بنے ہو تم مسیحا

حال اور خراب ہو گیا ہے

رکھی نہ زندگی نے مری مفلسی کی شرم

چادر بنا کے راہ میں پھیلا گئی مجھے

فن وہ جگنو ہے جو اڑتا ہے ہوا میں قیصرؔ

بند کر لو گے جو مٹھی میں تو مر جائے گا

بستی میں ہے وہ سناٹا جنگل مات لگے

شام ڈھلے بھی گھر پہنچوں تو آدھی رات لگے

کم سے کم ریت سے آنکھیں تو بچیں گی قیصرؔ

میں ہواؤں کی طرف پیٹھ کیے بیٹھا ہوں

شاعری پہلے رسولوں کی دعا تھی قیصرؔ

آج اس عہد میں اک شعبدۂ ذات ہوئی

گھر بسا کر بھی مسافر کے مسافر ٹھہرے

لوگ دروازوں سے نکلے کہ مہاجر ٹھہرے