aa.ine meñ kahīñ gum ho ga.ī sūrat merī

mujh se miltī hī nahīñ shakl-o-shabāhat merī

aaine mein kahin gum ho gai surat meri

mujh se milti hi nahin shakl-o-shabahat meri

raunaq-e-bazm nahīñ thā koī tujh se pahle

raunaq-e-bazm tire ba.ad nahīñ hai koī

raunaq-e-bazm nahin tha koi tujh se pahle

raunaq-e-bazm tere baad nahin hai koi

us se kah do ki mujhe us se nahīñ milnā hai

vo hai masrūf to be-kār nahīñ huuñ maiñ bhī

us se kah do ki mujhe us se nahin milna hai

wo hai masruf to be-kar nahin hun main bhi

dil jo TuuTā hai to phir yaad nahīñ hai koī

is ḳharābe meñ ab ābād nahīñ hai koī

dil jo TuTa hai to phir yaad nahin hai koi

is KHarabe mein ab aabaad nahin hai koi

usī ke ḳhvāb the saare usī ko sauñp diye

so vo bhī jiit gayā aur maiñ bhī haarā nahīñ

usi ke KHwab the sare usi ko saunp diye

so wo bhi jit gaya aur main bhi haara nahin

apne hī saa.e se har gaam laraz jaatā huuñ

mujh se tai hī nahīñ hotī hai masāfat merī

apne hi sae se har gam laraz jata hun

mujh se tai hi nahin hoti hai masafat meri

der tak jāgte rahne kā sabab yaad aayā

tum se bichhḌe the kisī moḌ pe ab yaad aayā

der tak jagte rahne ka sabab yaad aaya

tum se bichhDe the kisi moD pe ab yaad aaya

milte ho to ab tum bhī bahut rahte ho ḳhāmosh

kyā tum ko bhī ab merī ḳhabar hone lagī hai

milte ho to ab tum bhi bahut rahte ho KHamosh

kya tum ko bhi ab meri KHabar hone lagi hai

ab mujh meñ koī baat na.ī DhūñDhne vaalo

ab mujh meñ koī baat purānī bhī nahīñ hai

ab mujh mein koi baat nai DhunDhne walo

ab mujh mein koi baat purani bhi nahin hai

ham kisī aur vaqt ke haiñ asiir

sub.h ke shaam ke rahe hī nahīñ

hum kisi aur waqt ke hain asir

subh ke sham ke rahe hi nahin

na chāñd kā na sitāroñ na āftāb kā hai

savāl ab ke mirī jaañ tire javāb kā hai

na chand ka na sitaron na aaftab ka hai

sawal ab ke meri jaan tere jawab ka hai

jo tum kahte ho mujh se pahle tum aa.e the mahfil meñ

to phir tum hī batāo aaj kyā kyā hone vaalā hai

jo tum kahte ho mujh se pahle tum aae the mahfil mein

to phir tum hi batao aaj kya kya hone wala hai

usī se pūchho use niiñd kyuuñ nahīñ aatī

ye us kā kaam nahīñ hai to merā kaam hai kyā

usi se puchho use nind kyun nahin aati

ye us ka kaam nahin hai to mera kaam hai kya

ab jism ke andar se āvāz nahīñ aatī

ab jism ke andar vo rahtā hī nahīñ hogā

ab jism ke andar se aawaz nahin aati

ab jism ke andar wo rahta hi nahin hoga

āñkhoñ ne banā.ī thī koī ḳhvāb kī tasvīr

tum bhuul ga.e ho to kise dhyān rahegā

aankhon ne banai thi koi KHwab ki taswir

tum bhul gae ho to kise dhyan rahega

lambī hai bahut aaj kī shab jāgne vaalo

aur yaad mujhe koī kahānī bhī nahīñ hai

lambi hai bahut aaj ki shab jagne walo

aur yaad mujhe koi kahani bhi nahin hai

na raat baaqī hai koī na ḳhvāb baaqī hai

magar abhī mire ġham kā hisāb kā baaqī hai

na raat baqi hai koi na KHwab baqi hai

magar abhi mere gham ka hisab ka baqi hai

tum the to har ik dard tumhīñ se thā ibārat

ab zindagī ḳhānoñ meñ basar hone lagī hai

tum the to har ek dard tumhin se tha ibarat

ab zindagi KHanon mein basar hone lagi hai

siyāh raat ke pahlū meñ jism ke andar

kisī gunāh kī ḳhvāhish ko pālte rahnā

siyah raat ke pahlu mein jism ke andar

kisi gunah ki KHwahish ko palte rahna

ajiib fursat-e-āvārgī milī hai mujhe

bichhaḌ ke tujh se zamāne kā Dar nahīñ hai koī

ajib fursat-e-awargi mili hai mujhe

bichhaD ke tujh se zamane ka Dar nahin hai koi

mausam koī bhī ho pe badaltā nahīñ huuñ maiñ

ya.anī kisī bhī sāñche meñ Dhaltā nahīñ huuñ maiñ

mausam koi bhi ho pe badalta nahin hun main

yani kisi bhi sanche mein Dhalta nahin hun main

ziist kī yaksāniyat se tañg aa jaate haiñ sab

ek din tū bhī mirī bātoñ se uktā jā.egā

zist ki yaksaniyat se tang aa jate hain sab

ek din tu bhi meri baaton se ukta jaega

pairoñ se bāñdh letā huuñ pichhlī masāfateñ

tanhā kisī safar pe nikaltā nahīñ huuñ maiñ

pairon se bandh leta hun pichhli masafaten

tanha kisi safar pe nikalta nahin hun main

vo chehra mujhe saaf dikhā.ī nahīñ detā

rah jaatī haiñ sāyoñ meñ ulajh kar mirī āñkheñ

wo chehra mujhe saf dikhai nahin deta

rah jati hain sayon mein ulajh kar meri aankhen

sharīk vo bhī rahā kāvish-e-mohabbat meñ

shurūa us ne kiyā thā tamām maiñ ne kiyā

sharik wo bhi raha kawish-e-mohabbat mein

shurua us ne kiya tha tamam main ne kiya

ye kā.enāt bhī kyā qaid-ḳhāna hai koī

ye zindagī bhī koī tarz-e-intiqām hai kyā

ye kaenat bhi kya qaid-KHana hai koi

ye zindagi bhi koi tarz-e-intiqam hai kya

maiñ apne-āp se aage nikal gayā huuñ bahut

kisī safar ke havāle ye jism-o-jāñ kar ke

main apne-ap se aage nikal gaya hun bahut

kisi safar ke hawale ye jism-o-jaan kar ke

ḳhvāb maile ho ga.e the un ko dhonā chāhiye thā

raat kī tanhā.iyoñ meñ ḳhuub ronā chāhiye thā

KHwab maile ho gae the un ko dhona chahiye tha

raat ki tanhaiyon mein KHub rona chahiye tha

tirī duā.eñ bhī shāmil haiñ koshishoñ meñ mirī

musībatoñ kā na Talnā ajiib lagtā hai

teri duaen bhi shamil hain koshishon mein meri

musibaton ka na Talna ajib lagta hai

kisī ne jaañ hī luTā dī vafāoñ kī ḳhātir

tum hī batāo ki qissa ye kis kitāb kā hai

kisi ne jaan hi luTa di wafaon ki KHatir

tum hi batao ki qissa ye kis kitab ka hai

baat to ye hai ki vo ghar se nikaltā bhī nahīñ

aur mujh ko sar-e-bāzār liye phirtā hai

baat to ye hai ki wo ghar se nikalta bhi nahin

aur mujh ko sar-e-bazar liye phirta hai

bāda-o-jām ke rahe hī nahīñ

ham kisī kaam ke rahe hī nahīñ

baada-o-jam ke rahe hi nahin

hum kisi kaam ke rahe hi nahin

ibtidā us ne hī kī thī mirī rusvā.ī kī

vo ḳhudā hai to gunahgār nahīñ huuñ maiñ bhī

ibtida us ne hi ki thi meri ruswai ki

wo KHuda hai to gunahgar nahin hun main bhi

sunte haiñ bayābāñ bhī kabhī shahr rahā thā

so shahr bhī ik roz bayābān rahegā

sunte hain bayaban bhi kabhi shahr raha tha

so shahr bhi ek roz bayaban rahega

hosh jaatā rahā duniyā kī ḳhabar hī na rahī

jab ki ham bhuul ga.e ḳhud ko vo tab yaad aayā

hosh jata raha duniya ki KHabar hi na rahi

jab ki hum bhul gae KHud ko wo tab yaad aaya

sitam kiye haiñ to kyā tujh se hai hayāt mirī

qarīb aa mirī āñkhoñ ke ḳhvāb, zinda huuñ

sitam kiye hain to kya tujh se hai hayat meri

qarib aa meri aankhon ke KHwab, zinda hun

hamāre kāñdhe pe is baar sirf āñkheñ haiñ

hamāre kāñdhe pe is baar sar nahīñ hai koī

hamare kandhe pe is bar sirf aankhen hain

hamare kandhe pe is bar sar nahin hai koi

vo muztarib thā bahut mujh ko darmiyāñ kar ke

so pā liyā hai use ḳhud ko rā.egāñ kar ke

wo muztarib tha bahut mujh ko darmiyan kar ke

so pa liya hai use KHud ko raegan kar ke

mire marne kā ġham to be-sabab hogā ki ab ke baar

mire andar to koī aur paidā hone vaalā hai

mere marne ka gham to be-sabab hoga ki ab ke bar

mere andar to koi aur paida hone wala hai

maiñ jis ko sochtā rahtā huuñ kyā hai vo āḳhir

mire laboñ pe jo rahtā hai us kā naam hai kyā

main jis ko sochta rahta hun kya hai wo aaKHir

mere labon pe jo rahta hai us ka nam hai kya

vo bhī na aayā umr-e-guzishta ke misl hī

ham bhī khaḌe rahe dar-o-dīvār kī tarah

wo bhi na aaya umr-e-guzishta ke misl hi

hum bhi khaDe rahe dar-o-diwar ki tarah

ek din us kī nigāhoñ se bhī gir jā.eñge

us ke baḳhshe hue lamhoñ pe basar karte hue

ek din us ki nigahon se bhi gir jaenge

us ke baKHshe hue lamhon pe basar karte hue

tamām umr ba-qaid-e-safar rahā huuñ maiñ

tavāf phir kisī ka.abe kā kar rahā huuñ maiñ

tamam umr ba-qaid-e-safar raha hun main

tawaf phir kisi kabe ka kar raha hun main

ik tū ne hī nahīñ kī junūñ kī dukān band

saudā koī hamāre bhī sar meñ nahīñ rahā

ek tu ne hi nahin ki junun ki dukan band

sauda koi hamare bhi sar mein nahin raha

to dekheñ aur kisī ko jo vo nahīñ maujūd

to jaa.eñ aur kahīñ us ne jab pukārā nahīñ

to dekhen aur kisi ko jo wo nahin maujud

to jaen aur kahin us ne jab pukara nahin

pāniyoñ meñ khel kuchh aisā bhī honā chāhiye thā

biich dariyā meñ koī kashtī Dubonā chāhiye thā

paniyon mein khel kuchh aisa bhi hona chahiye tha

bich dariya mein koi kashti Dubona chahiye tha

maiñ to ab shahr meñ huuñ aur koī raat ga.e

chīḳhtā rahtā hai sahrā-e-badan ke andar

main to ab shahr mein hun aur koi raat gae

chiKHta rahta hai sahra-e-badan ke andar