sohbat-e-vasl hai masdūd haiñ dar haa.e hijāb

nahīñ mālūm ye kis aah se sharam aatī hai

sohbat-e-wasl hai masdud hain dar hae hijab

nahin malum ye kis aah se sharam aati hai

mushkil meñ kab kisī kā koī āshnā huā

talvār jab gale se milī sar judā huā

mushkil mein kab kisi ka koi aashna hua

talwar jab gale se mili sar juda hua

na taḌapne kī ijāzat hai na fariyād kī hai

ghuT ke mar jā.ūñ ye marzī mire sayyād kī hai

na taDapne ki ijazat hai na fariyaad ki hai

ghuT ke mar jaun ye marzi mere sayyaad ki hai

jab jīte-jī na pūchhā pūchheñge kyā mare par

murde kī ruuh ko bhī ghar se nikālte haiñ

jab jite-ji na puchha puchhenge kya mare par

murde ki ruh ko bhi ghar se nikalte hain

har ek javāhar besh-bahā chamkā to ye patthar kahne lagā

jo sañg tirā vo sañg mirā tū aur nahīñ maiñ aur nahīñ

har ek jawahar besh-baha chamka to ye patthar kahne laga

jo sang tera wo sang mera tu aur nahin main aur nahin

mirī be-rishta-dilī se use maza mil jaa.e

jigar kabāb jo koī jalā-bhunā mil jaa.e

meri be-rishta-dili se use maza mil jae

jigar kabab jo koi jala-bhuna mil jae

ishq-e-mizhgāñ meñ hazāroñ ne gale kaTvā.e

īd-e-qurbāñ meñ jo vo le ke chhurī baiTh gayā

ishq-e-mizhgan mein hazaron ne gale kaTwae

id-e-qurban mein jo wo le ke chhuri baiTh gaya

vasl meñ bekār hai muñh par naqāb

sharam kā āñkhoñ pe parda chāhiye

wasl mein bekar hai munh par naqab

sharam ka aankhon pe parda chahiye

ḳhudā kā Dar na hotā gar bashar ko

ḳhudā jaane ye banda kyā na kartā

KHuda ka Dar na hota gar bashar ko

KHuda jaane ye banda kya na karta

chashm-poshoñ se rahūñ 'shād' maiñ kyā ā.īna-dār

muñh pe kaanā nahīñ kahtā hai koī kaane ko

chashm-poshon se rahun 'shad' main kya aaina-dar

munh pe kana nahin kahta hai koi kane ko

ham na bigḌeñge agar chasm-numā.ī hogī

phir kahīñ aañkh laḌā.ī to laḌā.ī hogī

hum na bigDenge agar chasm-numai hogi

phir kahin aankh laDai to laDai hogi

paanī paanī ho ḳhajālat se har ik chashm-e-habāb

jo muqābil ho mirī ashk bharī āñkhoñ se

pani pani ho KHajalat se har ek chashm-e-habab

jo muqabil ho meri ashk bhari aankhon se

chashm-e-tar ne bahā ke jū-e-sarishk

mauj-e-dariyā ko dhaar par maarā

chashm-e-tar ne baha ke ju-e-sarishk

mauj-e-dariya ko dhaar par mara

rone se ek pal nahīñ mohlat firāq meñ

ye aañkh kyā lagī mire pīchhe balā lagī

rone se ek pal nahin mohlat firaq mein

ye aankh kya lagi mere pichhe bala lagi

lagā ke ThaT hai har suunā murādī

tamannā-e-dilī nikle kidhar se

laga ke ThaT hai har suna muradi

tamanna-e-dili nikle kidhar se

javānī se ziyāda vaqt-e-pīrī josh hotā hai

bhaḌaktā hai charāġh-e-sub.h jab ḳhāmosh hotā hai

jawani se ziyaada waqt-e-piri josh hota hai

bhaDakta hai charagh-e-subh jab KHamosh hota hai

vo nahā kar zulf-e-pechāñ ko jo bikhrāne lage

husn ke dariyā meñ pinhāñ saañp lahrāne lage

wo naha kar zulf-e-pechan ko jo bikhrane lage

husn ke dariya mein pinhan sanp lahrane lage

nishān-e-'mīr' hai ham se jo ham miTe ai 'shād'

ye jaan reḳhta-goī ga.ī zamāne se

nishan-e-'mir' hai hum se jo hum miTe ai 'shad'

ye jaan reKHta-goi gai zamane se

pūchhā jo shabāb-e-basharī chashm-e-fanā se

palkoñ ne sadā dī ki bharosā nahīñ pal kā

puchha jo shabab-e-bashari chashm-e-fana se

palkon ne sada di ki bharosa nahin pal ka

is se behtar aur kah leñge agar zinda haiñ 'shād'

kho gayā pahlā jo vo dīvān kyā thā kuchh na thā

is se behtar aur kah lenge agar zinda hain 'shad'

kho gaya pahla jo wo diwan kya tha kuchh na tha